Karimnagar | క‌రీంన‌గ‌ర్‌లో కాల్పుల క‌ల‌క‌లం.. న‌గల దుకాణంలో ఆభ‌ర‌ణాలు దోపిడీ

Karimnagar | త్రినేత్ర‌.న్యూస్‌: కరీంనగర్‌లోని (Karimnagar) పీఎంజే (PMJ) జ్యువెల్ల‌రీ షాపులో కాల్పులు క‌ల‌క‌లం సృష్టించాయి. ఆదివారం ఉద‌యం కస్ట‌మ‌ర్ల ముసుగులో వ‌చ్చిన పీఎంజే దుకాణంలోకి వ‌చ్చిన ఆరుగురు గుర్తు తెలియని వ్యక్తులు.. ఆయుధాల‌తో సిబ్బందిని బెదిరించారు. బంగారు న‌గ‌లు చోరీ చేసేందుకు య‌త్నించారు. దీంతో సిబ్బంది, సెక్యూరిటీ ప్ర‌తిఘ‌టించ‌డంతో.. దొంగ‌లు త‌మ వ‌ద్ద ఉన్న తుపాకుల‌తో వారిపై కాల్పులు జ‌రిపారు. మిగిలిన సిబ్బందిని క‌ట్టేశారు. షో కేసుల‌లో ఉన్న బంగారు ఆభ‌ర‌ణాల‌ను పెద్ద‌మొత్తంలో దోచుకుని పారిపోయారు.

కాల్పుల శబ్ధంతో షోరూమ్ లోపల ఉన్నవారంతా భయంతో పరుగులు తీశారు. దుండగుల దాడిలో ముగ్గురు సిబ్బంది తీవ్రంగా గాయప‌డ్డారు. వారిని చికిత్స నిమిత్తం ద‌వాఖాన‌కు తరలించారు. స‌మాచారం అందుకున్న పోలీసులు ఘటనా స్థలానికి చేరుకున్నారు. షోరూమ్‌ను తమ ఆధీనంలోకి తీసుకుని క్లూస్ టీం సహాయంతో వేలిముద్రలు, ఇతర ఆధారాలను సేకరించారు. దొంగలు పారిపోయే క్రమంలో ఒక మ్యాగజైన్‌ను (Bullets Magazine) అక్కడే వదిలేశారు. దీంతో పోలీసులు దానిని స్వాధీనం చేసుకున్నారు. దోపిడీ దొంగలు ఎటువైపు వెళ్లారు, ఏ వాహనంపై వచ్చారని తెలుసుకోవడానికి నగరంలోని సీసీ కెమెరాల ఫుటేజీని పరిశీలిస్తున్నారు. నగరం నుంచి బయటకు వెళ్లే అన్ని రహదారులపై ముమ్మ‌రంగా తనిఖీలు నిర్వ‌హిస్తున్నారు. సరిహద్దు జిల్లాల పోలీసులను కూడా అప్రమత్తం చేశారు. ఈ ఘ‌ట‌న‌పై కేసు న‌మోదుచేసి ద‌ర్యాప్తు ప్రారంభించారు. కాగా, పట్టపగలే, రద్దీగా ఉండే ప్రాంతంలో కాల్పులు, దోపిడీ జరగడం సంచలనంగా మారింది.