Mamidi Rama Reddy Padma Shri 2026 | మామిడి రామారెడ్డికి పద్మశ్రీ: ఎవరీయన? తెలంగాణ ‘అన్‌సంగ్ హీరో’ ప్రస్థానం ఇదే!

Mamidi Rama Reddy Padma Shri 2026 | త్రినేత్ర.న్యూస్: గణతంత్ర దినోత్సవం (జనవరి 26, 2026) వేళ తెలంగాణ ఖ్యాతి మరోసారి జాతీయ స్థాయిలో మెరిసింది. అట్టడుగు స్థాయిలో ఉంటూ, పాడి పరిశ్రమనే నమ్ముకున్న వేలమంది రైతుల జీవితాల్లో వెలుగులు నింపిన మామిడి రామారెడ్డిని కేంద్ర ప్రభుత్వం 'పద్మశ్రీ' పురస్కారంతో గౌరవించింది. పశుసంవర్ధక, పాడి పరిశ్రమ (Animal Husbandry and Dairy) రంగాల్లో ఆయన చేసిన నిస్వార్థ సేవలను గుర్తించి 'అన్‌సంగ్ హీరో' కేటగిరీలో ఈ అవార్డును ప్రకటించింది. ఆయనకు మరణానంతరం ఈ అవార్డు వరించింది. అక్టోబర్ 26, 2025న ఆయన తన 83 ఏళ్ల వయసులో పరమపదించారు.

'సహ వికాస'తో సరికొత్త విప్లవం

మామిడి రామారెడ్డి 'సహ వికాస' (Saha Vikasa) అనే సంస్థను స్థాపించి, సహకార సంఘాల (Cooperatives) ద్వారా పాడి పరిశ్రమను లాభసాటిగా మార్చారు. కేవలం పాలు సేకరించడమే కాకుండా, పశువుల పోషణ, శాస్త్రీయ పాడి నిర్వహణ, ఆర్థిక పరిపాలన వంటి అంశాల్లో వేలమంది రైతులకు ప్రత్యక్షంగా శిక్షణ ఇచ్చారు. గ్రామీణ ఆర్థిక వ్యవస్థను బలోపేతం చేయడంలో ఆయన కృషి అమోఘం.

మహిళా సాధికారతకు బాటలు

రామారెడ్డి సేవల్లో మరొక ముఖ్యమైన ఘట్టం.. మహిళలను పాడి పరిశ్రమలో భాగస్వామ్యం చేయడం. మహిళల నేతృత్వంలోని సహకార సంఘాలను ప్రోత్సహిస్తూ, వారికి స్వయం ఉపాధి కల్పించడంలో ఆయన మార్గదర్శకుడిగా నిలిచారు. పాడి పరిశ్రమను ఆధునీకరిస్తూనే, రైతులకు ఆర్థిక భరోసా కల్పించిన ఆయన ప్రస్థానం నేటి యువతకు స్ఫూర్తిదాయకం.