Stephen Raveendra | అక్టోబర్ నుంచే ధాన్యం కొనుగోళ్లు.. 65 లక్షల టన్నులు లక్ష్యం: స్టీఫెన్ రవీంద్ర

Stephen Raveendra | త్రినేత్ర న్యూస్‌: అక్టోబ‌ర్ నుంచి వానాకాలం ధాన్యం కొనుగోళ్లు చేప‌ట్టాల‌ని.. దాదాపు 65 ట‌న్నులే ల‌క్ష్యంగా ధాన్యం సేక‌ర‌ణ జ‌ర‌గాల‌ని పౌర స‌ర‌ఫ‌రాల శాఖ క‌మిష‌న‌ర్, ప్రభుత్వ ఎక్స్-అఫీషియో ప్రిన్సిపల్ సెక్రటరీ ఎం. స్టీఫెన్ రవీంద్ర సూచించారు. మంగ‌ళ‌వారం అన్ని జిల్లాల పౌర సరఫరాల అధికారులు, మేనేజర్లతో వీడియో కాన్ఫరెన్స్ ద్వారా సమీక్షించారు. 8,283 కొనుగోలు కేంద్రాలకు సరిపడా గన్నీ బ్యాగులు, టార్పాలిన్లు, రవాణా వాహనాలను అధికారులు ఇప్పటికే సిద్ధం చేయ‌డం సంతోష‌క‌ర‌మ‌న్నారు. రైతులకు ధాన్యం బోనస్ దక్కాలంటే కచ్చితంగా 'అగ్రిస్టాక్ ఫార్మర్ ఐడీ' (AgriStack Farmer ID) ఉండాలని స్పష్టం చేశారు.

ఈ సీజన్ కొనుగోళ్లలో ఎలాంటి ఆటంకాలు రాకుండా చూసుకోవడానికి 'SHT' (గోదాములు, హమాలీలు, రవాణా) వ్యూహం చాలా కీలకం కానుంది. కొనుగోలు కేంద్రాల్లో ధాన్యం బస్తాలు ఎక్కించడానికి, దించడానికి తగినంత మంది హమాలీలు ఉండేలా అధికారులు జాగ్రత్త పడుతున్నారు. చివర్లో గోదాముల కొరత రాకుండా ఉండటానికి.. వాడకంలో లేని రైస్ మిల్లులు, ఫంక్షన్ హాళ్లు, ఇతర ప్రత్యామ్నాయ స్థలాలను సైతం ముందుగానే సిద్ధం చేస్తున్నారు.

మిల్లింగ్ దశలో ఎలాంటి అవకతవకలు జరగకుండా ఒక కొత్త 'ఫిజికల్ వెరిఫికేషన్ (PV)' మొబైల్ యాప్‌ను ఉపయోగిస్తున్నారు. మండల, జిల్లా స్థాయి అధికారులు ఈ యాప్ ద్వారా ప్రతి వారం రైస్ మిల్లుల్లో ఆకస్మిక తనిఖీలు చేయనున్నారు. అవినీతి విషయంలో కమిషనర్ చాలా సీరియస్‌గా ఉన్నారు. ఎవరైనా రైస్ మిల్లర్లు లేదా కొనుగోలు కేంద్రం ఇన్‌ఛార్జ్‌లు తప్పుడు రికార్డులు సృష్టించినా, లెక్కల్లో మోసం చేసినా.. నేరుగా క్రిమినల్ కేసులు నమోదు చేస్తాం అని హెచ్చరించారు.

ఈ ప్రక్రియను మరింత పక్కాగా చేయడానికి, ధాన్యం తరలించే ప్రతి వాహనానికి కచ్చితంగా జీపీఎస్ (GPS - VLTS) ట్రాకింగ్ సిస్టమ్ ఉండాలని నిబంధన పెట్టారు. దీని వల్ల కొనుగోలు కేంద్రాల నుంచి గోదాములకు వెళ్లే దారిలో ధాన్యం ఎక్కడా పక్కదారి పట్టకుండా పూర్తి పారదర్శకత ఉంటుంది.

కనీస మద్దతు ధరకు (MSP) అదనంగా క్వింటాల్‌కు రూ.500 బోనస్ పొందే ఏడు సన్న బియ్యం రకాలను ప్రభుత్వం ప్రకటించింది. బీపీటీ 5204, ఆర్‌ఎన్‌ఆర్ 15048, హెచ్ఎంటీ సోనా, జై శ్రీరామ్, కేఎన్‌ఎం 1638, డబ్ల్యూజీఎల్ 44, మరియు కేఎన్‌ఎం 7715. ఈ రకాలను పండించి కొనుగోలు కేంద్రాలకు తెచ్చే రైతుల ఖాతాల్లో నేరుగా బోనస్ డబ్బులు జమ అవుతాయి. అయితే, వారు ప్రభుత్వ నిబంధనలు పాటించడంతో పాటు అగ్రిస్టాక్ ఫార్మర్ ఐడీ కలిగి ఉండాలి. వాతావరణ మార్పుల నుండి ధాన్యాన్ని రక్షించడానికి, ప్రతి కొనుగోలు కేంద్రంలో తేమను కొలిచే యంత్రాలు, క్లీనర్లు, ధాన్యం ఆరబెట్టే యంత్రాలను ముందుగానే అందుబాటులో ఉంచుతున్నారు.