IND Vs JPN | పోరాడి ఓడిన జ‌పాన్‌.. రెండు పరుగుల తేడాతో భారత్ విన్‌.. వైడ్ నిర్ణయంపై హాట్ టాపిక్..!

IND Vs JPN | వర్షం కారణంగా ఐదు ఓవర్లకు కుదించిన మ్యాచ్‌లో భారత్ రెండు పరుగుల తేడాతో జపాన్‌పై విజయం సాధించింది. చివరి ఓవర్‌లో చోటుచేసుకున్న వైడ్ నిర్ణయం మాత్రం మ్యాచ్ అనంతరం చర్చనీయాంశంగా మారింది. గెలుపునకు ఆఖరి నాలుగు బంతుల్లో ఆరు పరుగులు చేయాల్సిన సమయంలో అంపైర్ తొలుత ఇచ్చిన వైడ్‌గా ప్ర‌క‌టించ‌డంతో ఉత్కంఠ మరింత పెరిగింది. భారత్ తొలుత ఐదు ఓవర్లలో 32/4 పరుగులు చేసింది. లక్ష్యఛేదనలో జపాన్ నాలుగు ఓవర్లు ముగిసేసరికి 27/3తో నిలిచింది. చివరి ఆరు బంతుల్లో ఎనిమిది పరుగులు అవసరమయ్యాయి. కెప్టెన్ కెండెల్ కడోవాకి-ఫ్లెమింగ్ (12) వికెట్ కోల్పోవడంతో జపాన్ విజయానికి దూరమవుతుందనిపించింది. కానీ చివరి ఓవర్‌లోనూ మ్యాచ్ ఉత్కంఠగా సాగింది.

వరుసగా రెండు వైడ్లు

ఆఖరి ఓవర్‌ను అక్షర్ పటేల్ వేశాడు. ఎడమచేతి వాటం బ్యాటర్ అలెగ్జాండర్‌ను రౌండ్ ద వికెట్ నుంచి బౌలింగ్ చేశాడు. లెగ్ స్టంప్ లైన్‌లో పడిన బంతిని అలెగ్జాండర్ స్విచ్ హిట్‌తో ఆఫ్‌సైడ్‌కు ఆడే ప్రయత్నం చేశాడు. బ్యాట్‌కు బంతి తగలకపోవడంతో ఫీల్డ్ అంపైర్ క్రిస్ థర్గేట్ వైడ్‌గా ప్రకటించాడు. తర్వాతి బంతికీ దాదాపు ఇదే పరిస్థితి. మరోసారి వైడ్ ఇచ్చాడు. వరుసగా రెండు వైడ్లు ఇవ్వడంపై అక్షర్ పటేల్, వికెట్ కీపర్ సంజూ శాంసన్ అసంతృప్తి వ్యక్తం చేశారు. అనంతరం కెప్టెన్ శ్రేయస్ అయ్యర్ లెగ్ అంపైర్ క్రిస్ బ్రౌన్‌తో మాట్లాడాడు. ఇద్దరు అంపైర్లు చర్చించుకున్న తర్వాత.. రెండో బంతికి ఇచ్చిన వైడ్ నిర్ణయాన్ని థర్గేట్ వెనక్కి తీసుకున్నాడు.

అంపైర్ నిర్ణయం మార్చొచ్చా?

ఈ ఘటనలో ఇదే కీలక ప్రశ్నగా మారింది. క్రికెట్ చ‌ట్టాల్లోని లా 2.12 ప్రకారం అంపైర్ తన నిర్ణయాన్ని మార్చుకునే అవకాశం ఉంది. అయితే, నిర్ణ‌యాన్ని వెంట‌నే ప్ర‌క‌టించాల్సి ఉంటుంది. డెడ్ బాల్‌కు సంబంధించిన నిబంధనలకు విరుద్ధంగా ఉండకూడదు. ఆ తర్వాత తీసుకున్న నిర్ణయమే తుది నిర్ణయంగా పరిగణిస్తారు. కాబట్టి కేవలం నిర్ణయం మార్చిన కారణంతో అంపైర్ నిబంధనలు ఉల్లంఘించాడని తేల్చడం సరికాదు. అంపైర్ నిర్ణయంపై ఆటగాళ్ల స్పందనపైనా చర్చ మొదలైంది. ఐసీసీ ప్లేయింగ్ కండిషన్స్‌లోని ఆర్టికల్ 2.8 ప్రకారం అంపైర్ నిర్ణయంపై తీవ్ర అసంతృప్తి వ్యక్తం చేయడం, నిర్ణయంపై సుదీర్ఘంగా వాదించడం వంటి అంశాలు పరిశీలనకు వస్తాయి. ఈ ఘటనలో భారత ఆటగాళ్ల ప్రవర్తన నిబంధనల పరిధిని దాటిందా? అన్నది ఇప్పుడు చర్చనీయాంశంగా మారింది. ఈ విషయంలో భారత ప్లేయ‌ర్ల‌పై చ‌ర్య‌లు తీసుకుంటారా? అన్న సందేహాలు వ్య‌క్త‌మ‌వుతున్నాయి.

బ్యాటర్లు తడబాటు.. బౌలర్లు ఆదుకున్నారు

వర్షం కారణంగా మ్యాచ్‌ను ఐదు ఓవర్లకు కుదించడంతో భారత్‌కు బ్యాటింగ్‌లో పెద్దగా పరుగులు రాలేదు. శ్రేయస్ అయ్యర్ 12 బంతుల్లో అజేయంగా 16 పరుగులు చేశాడు. మిగతా బ్యాటర్లు భారీ స్కోరు చేయలేకపోయారు. అభిషేక్ శర్మ తొలి బంతికే ఔటయ్యాడు. జపాన్ ఎడమచేతి వాటం స్పిన్నర్ చార్లీ హారా-హింజ్ అతడిని పెవిలియన్‌కు పంపాడు. 2024లో వైభవ్ సూర్యవంశీని కూడా ఇదే బౌలర్ ఔట్ చేశాడు. అఫ్గానిస్థాన్‌పై ఇటీవ‌లే ఫాస్టెస్ట్ టీ20 సెంచరీ చేసిన అభిషేక్.. ఈ మ్యాచ్‌లో తొలి బంతికే వెనుదిరగడం గ‌మ‌నార్హం.

చివరి వరకు పోరాడిన జపాన్

32 పరుగుల స్వల్ప లక్ష్యాన్ని కాపాడుకునేందుకు భారత్ స్పిన్నర్లపై ఆధారపడింది. రెండు ఓవర్లు ముగిసేసరికి జపాన్ 8/2తో నిలిచింది. ఈ దశలో లక్ష్యాన్ని అందుకోవడం కష్టమే అనిపించింది. అయితే రవి బిష్ణోయ్ వేసిన ఓవర్లో 10 పరుగులు రావడంతో జపాన్ తిరిగి పోటీలోకి వచ్చింది. కెప్టెన్ కడోవాకి-ఫ్లెమింగ్ 12 బంతుల్లో 12 పరుగులు చేశాడు. జపాన్ విజయానికి తొమ్మిది పరుగులు అవసరమైన సమయంలో ఔటయ్యాడు. చివరి ఓవర్‌లో ఎనిమిది పరుగులు కావాల్సి ఉండగా.. జపాన్ ఐదు పరుగులే చేయగలిగింది. దీంతో 30/3కే పరిమితమై.. భారత్ చేతిలో రెండు పరుగుల తేడాతో ఓటమిపాలైంది. ఈ మ్యాచ్‌లో ఓడిపోయినా జ‌పాన్ త‌న ఆట‌తీరుతో ఆక‌ట్టుకుంది.