Maha Varuna Yagam | వరుణుడి కరుణ కోసం మహా యాగం.. సాగర్ తీరాన అంగరంగ వైభవంగా ‘కరీరీ ఇష్టి’.. పూర్ణాహుతిలో సీఎం రేవంత్

• వరుణ యాగంలో భాగంగా పూర్ణాహుతి కార్యక్రమంలో పాల్గొన్న సీఎం రేవంత్
• 108 రుత్వికులతో, 11 హోమగుండాలతో వరుణ యాగం
• యాదగిరిగుట్ట శ్రీలక్ష్మీనరసింహస్వామి ఆలయ అర్చకులు, వేదపండితుల ఆధ్వ‌ర్యంలో వ‌రుణ‌యాగం
• కృష్ణా, గోదావరి పరీవాహక ప్రాంతాల్లో సమృద్ధిగా వర్షాలు కురవాలని యాగం
• యాగంలో పాల్గొన్న మంత్రి ఉత్తమ్ కుమార్ రెడ్డి దంపతులు

Maha Varuna Yagam | త్రినేత్ర.న్యూస్ : తెలంగాణ రాష్ట్రాన్ని కరువు ఛాయలు కమ్మకుండా, సకాలంలో సమృద్ధిగా వర్షాలు కురిసి పాడిపంటలతో విలసిల్లాలని ఆకాంక్షిస్తూ రేవంత్ రెడ్డి ప్రభుత్వం ఒక బృహత్తర కార్యక్రమానికి శ్రీకారం చుట్టింది. నల్గొండ జిల్లా నాగార్జున సాగర్ తీరంలోని విజయ్ విహార్ టూరిజం గెస్ట్‌హౌస్ ప్రాంగణంలో సోమవారం మహా వరుణ యాగాన్ని అంగరంగ వైభవంగా నిర్వహించింది. దేవాదాయ శాఖ ఆధ్వర్యంలో అత్యంత భక్తిశ్రద్ధలతో జరిగిన ఈ పవిత్ర క్రతువు.. కృష్ణా నది ఒడ్డున వేద పండితుల మంత్రోచ్ఛారణల మధ్య శాస్త్రోక్తంగా ముగిసింది.

పూర్ణాహుతిలో సీఎం దంపతులు

యాదగిరిగుట్ట శ్రీ లక్ష్మీనరసింహ స్వామి ఆలయ అర్చకులు, వేద పండితుల ఆధ్వర్యంలో జరిగిన ఈ వరుణ యాగం ముగింపు వేడుక (పూర్ణాహుతి)లో ముఖ్యమంత్రి రేవంత్ రెడ్డి, ఆయన సతీమణి గీత పాల్గొని వరుణ దేవుడికి ప్రత్యేక పూజలు చేశారు. అంతకుముందు తెల్లవారుజామున మంత్రి ఉత్తమ్ కుమార్ రెడ్డి, పద్మావతి రెడ్డి దంపతులు గోపూజ, విశ్వక్సేన పూజ చేసి యాగశాల ప్రవేశంతో ఈ క్రతువును లాంఛనంగా ప్రారంభించారు. ఈ ఆధ్యాత్మిక కార్యక్రమంలో మండలి చైర్మన్ గుత్తా సుఖేందర్ రెడ్డి, మంత్రులు కోమటిరెడ్డి వెంకట్ రెడ్డి, కొండా సురేఖ, ప్రభుత్వ సలహాదారులు కె.కేశవ రావు, మాజీ మంత్రి జానారెడ్డి తదితరులు పాలుపంచుకున్నారు.

క్లౌడ్ సీడింగ్‌ను తలపించే 'కరీరీ ఇష్టి' క్రతువు

కరవు పరిస్థితులను పారదోలి మేఘాలను ఆకర్షించడానికి వేదాల్లో సూచించిన 'కరీరీ ఇష్టి' అనే అద్భుతమైన క్రతువును ఈ యాగంలో నిర్వహించడం విశేషం. ఇది ఒక రకంగా ఆధునిక కాలపు 'క్లౌడ్ సీడింగ్' ప్రక్రియ లాంటిది. అగ్నికి సమర్పించే ద్రవ్యాలు, నల్ల నువ్వులు అన్నీ కూడా మేఘాలను ఆకర్షించే విధంగానే ఉంటాయి.

పర్జన్య శాంతి.. విశేష మూలికలతో హోమం

యాగశాలలో మొత్తం 11 హోమ గుండాలను ఏర్పాటు చేశారు. వాతావరణాన్ని చల్లబరిచేందుకు ఆయుర్వేదంలో ఉపయోగించే వరుణ వృక్ష బెరడు, వట్టివేరు, మర్రి, జువ్వి, రావి వంటి పంచక్షీర వృక్షాల సమిధలు, నవధాన్యాలు, ఆవు నెయ్యితో హోమాలు చేశారు. గాలిలో తేమ శాతం పెరిగి నష్టం కలిగించని శాంతమైన వానలు పడేలా మేఘాల దేవత అయిన పర్జన్యుడిని శాంతింపజేసేందుకు పండితులు 'పర్జన్య సూక్తం', 'పాశుపతాస్త్ర మంత్రాలు' పఠించారు.

వాన దేవుడికి సీఎం రేవంత్ ప్రార్థన

ఈ ఏడాది ఎల్ నినో ప్రభావంతో వర్షపాతం సాధారణం కంటే తక్కువగా నమోదయ్యే అవకాశం ఉందన్న వాతావరణ శాఖ అంచనాల నేపథ్యంలో.. ప్రభుత్వం ముందు జాగ్రత్తగా ఈ మహా వరుణయాగాన్ని నిర్వహించింది. "కృష్ణా, గోదావరి నదులు నిండుగా ప్రవహించాలి. శ్రీశైలం, నాగార్జున సాగర్ సహా రాష్ట్రంలోని ప్రాజెక్టులు, ప్రతి చెరువు జలకళతో కళకళలాడాలి. రైతుల ముఖాల్లో చిరునవ్వులు కనిపించాలి" అని సీఎం రేవంత్ వరుణ దేవుడిని ప్రార్థించారు. శాస్త్రీయ అంచనాలతో ముందుకెళ్తూనే.. మన పూర్వీకుల ఆధ్యాత్మిక సంప్రదాయాలను గౌరవిస్తూ రైతులు సుభిక్షంగా ఉండాలన్న సంకల్పంతోనే ఈ యాగాన్ని నిర్వహించినట్లు ప్రభుత్వం స్పష్టం చేసింది.