Ponguleti Srinivas Reddy | ధరణి అక్రమార్కులపై మంత్రి పొంగులేటి ఆగ్రహం: ‘ప్రభుత్వ సొమ్మును అణా పైసాతో సహా వసూలు చేస్తాం’

Ponguleti Srinivas Reddy | ప్రభుత్వ సొమ్మును దుర్వినియోగం చేసినా, భూముల రిజిస్ట్రేషన్లలో అక్రమాలకు పాల్పడినా ఎంతటి వారినైనా వదిలిపెట్టే ప్రసక్తే లేదని రాష్ట్ర రెవెన్యూ శాఖ మంత్రి పొంగులేటి శ్రీనివాస రెడ్డి హెచ్చరించారు. ఆదివారం మినిస్టర్ క్వార్టర్స్‌లోని తన నివాసంలో రెవెన్యూ అధికారులతో నిర్వహించిన సమీక్షా సమావేశంలో ఆయన కీలక ఆదేశాలు జారీ చేశారు.

4,800 లావాదేవీలలో లోపాలు

గత ఐదు సంవత్సరాలలో జరిగిన సుమారు 52 లక్షల లావాదేవీలపై ప్రాథమిక ఆడిట్ నిర్వహించగా, అందులో 4,800 చోట్ల లోపాలు బయటపడ్డాయని మంత్రి వెల్లడించారు. ముఖ్యంగా రంగారెడ్డి, యాదాద్రి జిల్లాల్లోనే దాదాపు 3,000 అక్రమ లావాదేవీలు ఉన్నట్లు గుర్తించామన్నారు. స్టాంప్ డ్యూటీ, రిజిస్ట్రేషన్ చలాన్ సొమ్ము పక్కదారి పట్టినట్లు తేలిందని, ఈ మొత్తాన్ని అణాపైసాతో సహా రికవరీ చేస్తామని స్పష్టం చేశారు.

ధరణి లోపాలపై ఆగ్రహం

గత ప్రభుత్వం ప్రవేశపెట్టిన ధరణి పోర్టల్‌లో సరైన 'ఆడిటింగ్' విధానం లేకపోవడమే ఈ అక్రమాలకు ప్రధాన కారణమని మంత్రి పేర్కొన్నారు. "సాంకేతిక లోపాలను ఆసరాగా చేసుకుని అక్రమాలకు పాల్పడిన వారిపై చట్టపరంగా అత్యంత కఠిన చర్యలు తీసుకోవాలి. అవసరమైతే క్రిమినల్ కేసులు నమోదు చేయండి" అని అధికారులను ఆదేశించారు.

రాష్ట్రవ్యాప్తంగా సమగ్ర ఆడిటింగ్

ఈ స్కామ్‌లో రెవెన్యూ అధికారుల పాత్రపై కూడా లోతైన విచారణ జరపాలని మంత్రి ఆదేశించారు. ధరణి అమలులోకి వచ్చినప్పటి నుంచి జరిగిన ప్రతి లావాదేవీపై రాష్ట్రవ్యాప్తంగా సమగ్ర ఆడిటింగ్ నిర్వహించాలని చెప్పారు. ప్రభుత్వ భూముల ఆక్రమణలు లేదా ప్రభుత్వానికి రావాల్సిన ఆదాయానికి గండి కొట్టే ప్రయత్నాలను ఎట్టి పరిస్థితుల్లోనూ సహించబోమని తేల్చి చెప్పారు.

రాబోయే భూభారతి పోర్టల్ ద్వారా ఇలాంటి అక్రమాలకు శాశ్వతంగా కళ్లెం వేస్తామని, ప్రజల సొమ్ముతో ఆడుకునే వారిని కఠినంగా శిక్షిస్తామని మంత్రి పొంగులేటి పునరుద్ఘాటించారు.