Two Independent Councilors Join BRS | గులాబీ గూటికి ఇండిపెండెంట్లు.. మారిన సీన్.. ఆ రెండు మున్సిపాలిటీలు బీఆర్ఎస్ వశం?

Two Independent Councilors Join BRS | త్రినేత్ర.న్యూస్ : పటాన్‌చెరు నియోజకవర్గ రాజకీయాల్లో కీలక పరిణామం చోటుచేసుకుంది.  మున్సిపల్ ఎన్నికల ఫలితాల తర్వాత.. చైర్మన్ పీఠమే లక్ష్యంగా బీఆర్ఎస్ పార్టీ వ్యూహాత్మక అడుగులు వేసింది. ఎమ్మెల్యే గూడెం మహిపాల్ రెడ్డి నేతృత్వంలో ఇద్దరు కీలక స్వతంత్ర కౌన్సిలర్లు కారు ఎక్కడంతో ఇంద్రేశం, ఇస్నాపూర్ మున్సిపాలిటీలపై గులాబీ జెండా ఎగరడం ఖాయంగా కనిపిస్తోంది.

ఎమ్మెల్యే సమక్షంలో చేరికలు

ఇంద్రేశం, ఇస్నాపూర్ మున్సిపల్ పరిధిలో స్వతంత్ర అభ్యర్థులుగా విజయం సాధించిన ఇద్దరు కౌన్సిలర్లు పటాన్‌చెరు శాసనసభ్యులు గూడెం మహిపాల్ రెడ్డి సమక్షంలో బీఆర్ఎస్ పార్టీలో చేరారు. ఇస్నాపూర్ 10వ వార్డు కౌన్సిలర్ ఎల్లకొండ రాహుల్ రెడ్డి, ఇంద్రేశం 2వ వార్డు కౌన్సిలర్ సార లావణ్య గులాబీ కండువా కప్పుకున్నారు. వీరికి ఎమ్మెల్యే జీఎంఆర్ గులాబీ కండువా కప్పి పార్టీలోకి సాదరంగా ఆహ్వానించారు. ఈ సందర్భంగా కౌన్సిలర్లు మాట్లాడుతూ.. కేసీఆర్ మార్గదర్శకత్వం, ఎమ్మెల్యే జీఎంఆర్ చేస్తున్న అభివృద్ధి పనులకు ఆకర్షితులై పార్టీలో చేరుతున్నట్లు ప్రకటించారు. ప్రజల ఆశీర్వాదం, కార్యకర్తల కృషితో నియోజకవర్గంలోని ఐదు మున్సిపాలిటీలలో బీఆర్ఎస్ అధికార పీఠం దక్కించుకుంటుందని ఎమ్మెల్యే ధీమా వ్యక్తం చేశారు.

మారిన రాజకీయ లెక్కలు - ఎవరి బలం ఎంత?

స్వతంత్రుల చేరికతో మున్సిపల్ మ్యాజిక్ ఫిగర్స్ ఒక్కసారిగా మారిపోయాయి. ఆ వివరాలు ఇలా ఉన్నాయి:

1. ఇంద్రేశం మున్సిపాలిటీ (మొత్తం సీట్లు: 18)

స్వతంత్ర అభ్యర్థి చేరికతో ఇక్కడ బీఆర్ఎస్ స్పష్టమైన ఆధిక్యాన్ని సాధించింది.

పార్టీ               గెలిచిన సీట్లు         తాజా బలం                    ఫలితం
బీఆర్ఎస్                  9                            10                  అధికారం వశం
కాంగ్రెస్                     6                             6                                  -
బీజేపీ                         2                             2                                  -
స్వతంత్రులు              1                              0                    (బీఆర్ఎస్‌లో చేరిక)

2. ఇస్నాపూర్ మున్సిపాలిటీ (మొత్తం సీట్లు: 26)

ఇక్కడ కూడా ఇండిపెండెంట్ అభ్యర్థి మద్దతుతో బీఆర్ఎస్ బలం పెరిగింది.

పార్టీ                 గెలిచిన సీట్లు               తాజా బలం                ఫలితం
బీఆర్ఎస్                12                                     13                   అధికారం వశం
కాంగ్రెస్                   10                                     10                               -
ఇతరులు                4                                       3                                 -
బీజేపీ                      0                                        0                                   -

ఈ తాజా చేరికలతో పటాన్‌చెరు నియోజకవర్గంలో బీఆర్ఎస్ శ్రేణుల్లో నూతనోత్సాహం నెలకొంది. రెండు మున్సిపాలిటీలలో చైర్మన్ గిరి దక్కించుకునేందుకు కావాల్సిన సంఖ్యాబలం బీఆర్ఎస్ సొంతం కావడంతో, అధికారిక ప్రకటనపై సర్వత్రా ఆసక్తి నెలకొంది.