KTR ERC Hearing | రేపు ఈఆర్సీ ముందుకు కేటీఆర్.. ‘రైతు డిస్కం’ వెనుక ఉన్న ఆ కుట్ర బట్టబయలు

• మే 29 న ఉదయం 10 గంటలకు ఎలక్ట్రిసిటీ రెగ్యులేటరీ కమిషన్ (ERC) పబ్లిక్ హియరింగ్‌కు కేటీఆర్
• కాంగ్రెస్ ప్రభుత్వం ప్రతిపాదించిన 'రైతు డిస్కం' వల్ల వ్యవసాయానికి, విద్యుత్ రంగానికి జరిగే నష్టాలను వివరించేందుకు
• కేటీఆర్‌తో పాటు ఈఆర్సీ ముందుకు మాజీ మంత్రులు జగదీష్ రెడ్డి, సింగిరెడ్డి నిరంజన్ రెడ్డి, ఇతర సీనియర్ నేతలు

KTR ERC Hearing | త్రినేత్ర.న్యూస్ : తెలంగాణలో కాంగ్రెస్ ప్రభుత్వం కొత్తగా తెరపైకి తెచ్చిన 'రైతు డిస్కం' (Rythu Discom) నిర్ణయంపై భారత రాష్ట్ర సమితి (బీఆర్ఎస్) పోరుబాట పట్టింది. ఈ ప్రతిపాదనల వెనుక ఉన్న అసలు కుట్రలను, రైతాంగానికి జరగబోయే నష్టాలను ఎండగట్టేందుకు బీఆర్ఎస్ వర్కింగ్ ప్రెసిడెంట్ కేటీఆర్ (KTR) సిద్ధమయ్యారు. రేపు (మే 29) జరగనున్న ఎలక్ట్రిసిటీ రెగ్యులేటరీ కమిషన్ (ERC) ప్రజాభిప్రాయ సేకరణకు ఆయన స్వయంగా హాజరుకానున్నారు.

రైతుల పక్షాన బలమైన వాదనలు

మే 29 ఉదయం 10 గంటలకు ఈఆర్సీ ముందు పబ్లిక్ హియరింగ్ (Public Hearing) జరగనుంది. ఈ సమావేశంలో తెలంగాణ రైతులు, సామాన్య ప్రజల పక్షాన కేటీఆర్ తన గళాన్ని బలంగా వినిపించనున్నారు. కేవలం రాజకీయ విమర్శలకే పరిమితం కాకుండా, గణాంకాలతో సహా 'రైతు డిస్కం' వెనుక ఉన్న లోపాలను కమిషన్ ముందు ఎత్తిచూపేలా బీఆర్ఎస్ పక్కా ప్లాన్ చేసుకుంది.

కేటీఆర్ వెంట సీనియర్ల బృందం

ఈ కీలకమైన ప్రజాభిప్రాయ సేకరణకు కేటీఆర్ ఆధ్వర్యంలో ఒక బలమైన బీఆర్ఎస్ ప్రతినిధి బృందం హాజరుకాబోతోంది. విద్యుత్ శాఖ మాజీ మంత్రి జగదీష్ రెడ్డి, వ్యవసాయ శాఖ మాజీ మంత్రి సింగిరెడ్డి నిరంజన్ రెడ్డిలతో పాటు పలువురు సీనియర్ నాయకులు, ఇతర ప్రజాప్రతినిధులు ఇందులో పాల్గొంటారు.

రాష్ట్ర పవర్ సెక్టార్ (Power sector) భవిష్యత్తును ఈ నిర్ణయం ఎలా దెబ్బతీస్తుందో, ప్రభుత్వ ఏకపక్ష వైఖరి వల్ల వచ్చే చిక్కులేమిటో ఈ ప్యానెల్ కమిషన్ దృష్టికి తీసుకెళ్లనుంది. 'రైతు డిస్కం' పేరుతో రైతుల మెడకు ఉరితాడు బిగించే ప్రయత్నం జరుగుతోందని బీఆర్ఎస్ వర్గాలు తీవ్ర ఆరోపణలు చేస్తున్న నేపథ్యంలో, రేపటి ఈఆర్సీ హియరింగ్ రాష్ట్ర రాజకీయాల్లో ఆసక్తికరంగా మారింది.