Komatireddy vs Pawan Kalyan | పవన్ కళ్యాణ్‌పై కోమటిరెడ్డి ఫైర్: ‘ఆంధ్రా కాంట్రాక్టర్లకు ఇక నో ఛాన్స్.. తస్మాత్ జాగ్రత్త!’

• తెలంగాణపై పవన్ కళ్యాణ్ చేసిన వ్యాఖ్యలకు మంత్రి కోమటిరెడ్డి కౌంటర్
• తెలంగాణ అమరవీరులను అవమానిస్తే సహించేది లేదని తీవ్ర హెచ్చరిక
• ఏపీ డెవలప్‌మెంట్‌పై ఫోకస్ పెట్టాలని పవన్‌కు సీనియర్ నేతగా సలహా
• ఆంధ్రా కాంట్రాక్టర్లకు తెలంగాణలో ప్రాజెక్టులు ఇవ్వబోమని సంచలన ప్రకటన

Komatireddy vs Pawan Kalyan | త్రినేత్ర.న్యూస్ : తెలంగాణ అవతరణ దినోత్సవం (Telangana Formation Day) సందర్భంగా ఏపీ డిప్యూటీ సీఎం పవన్ కళ్యాణ్ చేసిన వ్యాఖ్యలు తెలంగాణ పాలిటిక్స్‌లో కాక రేపుతున్నాయి. పవన్ కామెంట్స్‌పై తెలంగాణ రోడ్లు, భవనాల శాఖ మంత్రి కోమటిరెడ్డి వెంకట్ రెడ్డి తీవ్ర స్థాయిలో మండిపడ్డారు. రాష్ట్రమంతా పండుగ చేసుకుంటుంటే.. పక్క రాష్ట్ర డిప్యూటీ సీఎం ఇక్కడ నిలబడి తన అక్కసు వెళ్లగక్కారని, తెలంగాణ ప్రజల మనోభావాలను దెబ్బతీస్తే ఊరుకునేది లేదని స్ట్రాంగ్ వార్నింగ్ ఇచ్చారు.

'ఆ మాటలు వింటుంటే రక్తం మరుగుతోంది'

"తెలంగాణ మీ అయ్య జాగీరా?" అంటూ పవన్ వాడిన భాషపై మంత్రి కోమటిరెడ్డి తీవ్ర ఆగ్రహం వ్యక్తం చేశారు. ఆ మాటలు వింటుంటే రక్తం మరుగుతోందని, తెలంగాణ కోసం ఆత్మబలిదానాలు చేసుకున్న అమరవీరులను అవమానించేలా పవన్ తీరు ఉందని ఫైర్ అయ్యారు. అణువణువునా అదే ద్వేషం, అదే వివక్ష ఆయన మాటల్లో స్పష్టంగా కనిపిస్తోందన్నారు. తెలంగాణ రాష్ట్ర ఏర్పాటు కోసం తన మంత్రి పదవిని సైతం త్యాగం చేసి, ఆమరణ నిరాహార దీక్షకు దిగిన చరిత్ర తమదని ఆయన గుర్తుచేశారు.

'పాలిటిక్స్ వద్దు.. డెవలప్‌మెంట్‌పై ఫోకస్ పెట్టండి'

ఏపీలో అధికారంలో ఉన్న టీడీపీ, బీజేపీ పార్టీలతో కలిసి తెలంగాణపై మళ్లీ కుట్రలు చేస్తున్నారనే అనుమానం కలుగుతోందని కోమటిరెడ్డి వ్యాఖ్యానించారు. హైదరాబాద్‌లో వ్యాపారాలు (Business) చేసుకోండి గానీ, తెలంగాణ అస్తిత్వాన్ని కించపరిస్తే మాత్రం సహించేది లేదని హెచ్చరించారు. ఆరు సార్లు చట్టసభలకు ఎన్నికైన ఒక సీనియర్ పొలిటీషియన్‌గా (Senior Politician) పవన్‌కు తాను ఓ సలహా ఇస్తున్నానని.. డిప్యూటీ సీఎం హోదాలో ఏపీ డెవలప్‌మెంట్ పైన దృష్టి సారించాలని సూచించారు. రెండు రాష్ట్రాలు అభివృద్ధిలో పోటీ పడాలి తప్ప, ప్రాంతీయ విద్వేషాలను రెచ్చగొట్టకూడదన్నారు.

ఆంధ్రా కాంట్రాక్టర్లపై సంచలన నిర్ణయం

తన సహనాన్ని పరీక్షించొద్దని, తర్వాత జరిగే పరిణామాలకు పవన్ కళ్యాణే బాధ్యత వహించాల్సి ఉంటుందని కోమటిరెడ్డి స్పష్టం చేశారు. ఇదే సమయంలో ఆయన సంచలన ప్రకటన చేశారు. "ఇకపై ఆంధ్రా కాంట్రాక్టర్లకు తెలంగాణలో ఒక్క ప్రాజెక్ట్ కూడా ఇవ్వబోం. అవసరమైతే దీని కోసం ఒక కఠినమైన చట్టం తీసుకురావడానికైనా వెనకాడం. తెలంగాణ కోసం ఎంతకైనా తెగిస్తాం.. బరిగీసి నిలబడతాం.. తస్మాత్ జాగ్రత్త" అని మంత్రి కోమటిరెడ్డి వెంకట్ రెడ్డి హెచ్చరించారు.