KCR Medaram Jatara Greetings | మేడారం జాతర వేళ కేసీఆర్ భావోద్వేగ సందేశం: “వనదేవతలు తెలంగాణను చల్లగా చూడాలి”

KCR Medaram Jatara Greetings | తెలంగాణ గిరిజనుల ఆరాధ్య దైవాలు, వీరనారీమణులు సమ్మక్క-సారలమ్మల మహా జాతర ప్రారంభమైన తరుణంలో భారత రాష్ట్ర సమితి (BRS) అధినేత కల్వకుంట్ల చంద్రశేఖర్ రావు రాష్ట్ర ప్రజలకు హృదయపూర్వక శుభాకాంక్షలు తెలియజేశారు.

త్యాగానికి, ధిక్కారానికి ప్రతీకలు

ఈ సందర్భంగా కేసీఆర్ మాట్లాడుతూ.. "తెలంగాణ గడ్డపై అన్యాయానికి వ్యతిరేకంగా సాగిన ధిక్కారానికి, గిరిజన సంస్కృతి గౌరవార్థం చేసిన త్యాగానికి సమ్మక్క-సారలమ్మలు అసలైన ప్రతీకలు" అని కొనియాడారు. కోట్లాది మంది భక్తులు తరలివచ్చే ఈ మేడారం జాతర, దక్షిణ భారత కుంభమేళాను తలపిస్తూ ఆధ్యాత్మిక వెలుగులు చిమ్ముతోందని ఆయన పేర్కొన్నారు.

బీఆర్ఎస్ పాలనలో గిరిజన సంస్కృతికి గౌరవం

గడిచిన పదేళ్ల బీఆర్ఎస్ ప్రభుత్వ పాలనలో గిరిజన సంస్కృతికి, ఆచారాలకు అత్యంత ప్రాధాన్యత ఇచ్చామని కేసీఆర్ గుర్తుచేశారు. గిరిజన తండాలను గ్రామ పంచాయతీలుగా మార్చడంతో పాటు, మేడారం జాతరను అత్యంత వైభవంగా నిర్వహించేందుకు నిధులు కేటాయించి ఆధ్యాత్మిక అభివృద్ధిని, గోదావరి లోయ పరీవాహక ప్రాంత ప్రగతిని సమాంతరంగా ముందుకు తీసుకెళ్లామని ఆయన స్మరించుకున్నారు.

ప్రజలు సుభిక్షంగా ఉండాలని ప్రార్థన

"కోరిన కోరికలు తీర్చే కొంగు బంగారమై, భక్తుల ఇలవేల్పులుగా వెలుగొందుతున్న అమ్మవార్లు తెలంగాణను చల్లగా చూడాలి. అన్ని రంగాల్లో రాష్ట్రం మళ్లీ పుంజుకొని, ప్రజలందరూ సుఖసంతోషాలతో, సుభిక్షంగా జీవించేలా దీవించాలి" అని కేసీఆర్ వనదేవతలను ప్రార్థించారు.

మేడారం వెళ్లే భక్తులకు ఎటువంటి ఇబ్బందులు కలగకూడదని, అమ్మవార్ల కృపాకటాక్షాలు అందరిపై ఉండాలని ఆయన ఆకాంక్షించారు.