Karimnagar Centralized Kitchen | కరీంనగర్‌లో అత్యాధునిక హంగులతో సెంట్రలైజ్డ్ కిచెన్ ప్రారంభం.. విద్యార్థులకు రుచికరమైన అల్పాహారం!

Karimnagar Centralized Kitchen | త్రినేత్ర.న్యూస్ : తెలంగాణ ప్రభుత్వం, హరే కృష్ణ మూవ్‌మెంట్ చారిటబుల్ ఫౌండేషన్ ఇండియా సంయుక్త ఆధ్వర్యంలో ప్రభుత్వ పాఠశాల విద్యార్థుల కోసం చేపట్టిన అల్పాహార కార్యక్రమంలో మరో కీలక అడుగు పడింది. ఇందులో భాగంగా కరీంనగర్ మార్కెట్ యార్డ్‌లో నూతనంగా నిర్మించిన భారీ సెంట్రలైజ్డ్ కమ్యూనిటీ కిచెన్‌ను రవాణా, బీసీ సంక్షేమ శాఖ మంత్రి పొన్నం ప్రభాకర్ ఘనంగా ప్రారంభించారు. ఆధునిక సాంకేతికతతో కూడిన ఈ భారీ కిచెన్ ఏర్పాట్లను ప్రముఖులు పరిశీలించారు.

అత్యాధునిక మిషనరీ ప్రత్యేకతలు

ఈ కేంద్రంలో ఇడ్లీ, దోశ, పూరీ, సాంబార్, బోండా వంటి అల్పాహారాలను భారీ ఎత్తున తయారు చేసేందుకు అధునాతన మిషన్లను ఏర్పాటు చేశారు. అంతేకాకుండా, పాత్రలు శుభ్రం చేసే మిషన్లు, ప్రత్యేక పాల కేంద్రం, ఆహార పదార్థాల నాణ్యతను పరీక్షించే టెస్టింగ్ ల్యాబ్స్‌ను ప్రారంభించారు. వెజిటేబుల్ కటింగ్, కడగడం అలాగే చట్నీ పౌడర్ తయారీకి సంబంధించిన వివిధ యంత్రాల పనితీరును అధికారులు ప్రత్యక్షంగా పరిశీలించి వివరాలు అడిగి తెలుసుకున్నారు.

ప్రముఖుల హాజరు

ఈ ప్రారంభోత్సవ కార్యక్రమంను రవాణా, బీసీ సంక్షేమ శాఖ మంత్రి పొన్నం ప్రభాకర్ ఎక్స్ వేదికగా వివరాలు పంచుకోగా, స్థానిక ఎమ్మెల్యే గంగుల కమలాకర్, జిల్లా కలెక్టర్ చిత్రా మిశ్రా, అడిషనల్ కలెక్టర్ చాహత్ బాజ్పేయి, మున్సిపల్ కమిషనర్ ప్రపుల్ దేశాయ్ పాల్గొన్నారు. అలాగే హరే కృష్ణ మూవ్‌మెంట్ చారిటబుల్ ఫౌండేషన్ ఎగ్జిక్యూటివ్ ఆఫీసర్ కౌంటియా దాస స్వామీజీ, ఆర్టీఏ మెంబర్ పడాల రాహుల్, మార్కెట్ కమిటీ చైర్మన్ ఆకుల నర్సన్న, కార్పొరేటర్లు, ఇతర ముఖ్య నేతలు, అధికారులు ఈ కార్యక్రమంలో పాలుపంచుకున్నారు.