Bandi Sanjay Karimnagar | కవులు, కళాకారుల పుట్టిల్లు కరీంనగర్

• కేంద్ర మంత్రి బండి సంజయ్ కుమార్ ప్రశంసలు

Bandi Sanjay Karimnagar | త్రినేత్ర.న్యూస్ : కరీంనగర్ గడ్డ కవులు, కళాకారులకు పుట్టినిల్లు అని కేంద్ర హోంశాఖ సహాయ మంత్రి బండి సంజయ్ కుమార్ అన్నారు. తాను దేశమంతా పర్యటిస్తూ అనేక కార్యక్రమాల్లో పాల్గొంటున్నానని, అయితే దేశంలో ఏ ప్రాంతంలోనూ లేనంత మంది అద్భుతమైన కళాకారులు కరీంనగర్‌లో ఉన్నారని ఆయన ప్రశంసించారు. కరీంనగర్‌లోని మంకమ్మ తోట సాయి మానేరు స్కూల్‌లో ఎస్సారార్ కళాశాల రిటైర్డ్ ప్రిన్సిపాల్, కవి డాక్టర్ బుర్ర మధుసూదన్ రెడ్డి రచించిన ‘మధుపాలిస్ క్యాలెండర్ ఆఫ్ ఈవెంట్స్’ పుస్తకాన్ని బండి సంజయ్ ఘనంగా ఆవిష్కరించారు.

ఈ కార్యక్రమంలో కరీంనగర్ మేయర్ కొలగాని శ్రీనివాస్, డిప్యూటీ మేయర్ సునీల్ రావు, కార్పొరేటర్, బీజేపీ పార్లమెంట్ కన్వీనర్ బోయినిపల్లి ప్రవీణ్ రావు, మానేరు స్కూల్స్ అధినేత అనంత రెడ్డి, టీబీఎస్ఎస్ అధ్యక్షులు దాస్యం సేనాధిపతి తదితరులు పాల్గొన్నారు.

యువతకు ఎంతో ఉపయోగపడే పుస్తకం

ఈ సందర్భంగా మాట్లాడిన కేంద్ర మంత్రి.. ఎస్సారార్ కాలేజీ రిటైర్డ్ ప్రిన్సిపాల్ డాక్టర్ మధుసూదన్ రెడ్డి రాష్ట్ర, జాతీయ, అంతర్జాతీయ సమకాలీన అంశాలపై రాసిన ఆర్టికల్స్‌ను పుస్తక రూపంలో తాను స్వయంగా ఆవిష్కరించడం ఎంతో సంతోషంగా ఉందన్నారు. సుమారు 400 పేజీలతో కూడిన ఈ పుస్తకం విద్యా సంస్థలకు, వివిధ పోటీ పరీక్షలకు సన్నద్ధమవుతున్న యువతకు అత్యంత ఉపయోగకరంగా ఉంటుందని కొనియాడారు. పదవీ విరమణ తర్వాత కూడా విశ్రాంతి తీసుకోకుండా అవిశ్రాంతంగా సమాజానికి ఉపయుక్తమైన రచనలు చేయడం అభినందనీయమన్నారు.

మోదీ చరిత్రను తెలుగులో అందించాలి

ప్రధాన మంత్రి నరేంద్ర మోదీ పుట్టినరోజు సందర్భంగా దేశమంతా ఆశీర్వాద దీపం వెలిగించి ఆశీర్వదించేందుకు సిద్ధమైందని బండి సంజయ్ గుర్తుచేశారు. ఒకప్పుడు వీసా నిరాకరించిన దేశాలు సైతం నేడు మోదీ సేవలను గుర్తించి స్వాగతం పలుకుతున్నాయని తెలిపారు. సగటు భారతీయుడు గర్వంగా తల ఎత్తుకునేలా మోదీ సేవలు ఉన్నాయని, అంతటి మహనీయుని చరిత్రను పుస్తక రూపంలో తెలుగు ప్రజలకు అందించాలని డాక్టర్ మధుసూదన్ రెడ్డిని ఈ సందర్భంగా ప్రత్యేకంగా కోరారు.