Godavarikhani Pylon Demolition | గోదావరిఖనిలో హైటెన్షన్: బీఆర్ఎస్ అభివృద్ధి పైలాన్ కూల్చివేత.. కోరుకంటి చందర్ అరెస్ట్ : కొప్పుల ఈశ్వర్ ఫైర్

Godavarikhani Pylon Demolition | త్రినేత్ర న్యూస్ : పెద్దపల్లి జిల్లా రామగుండం నియోజకవర్గంలో రాజకీయ వైరం ఒక్కసారిగా భగ్గుమంది. గోదావరిఖని గాంధీనగర్‌లో గత బీఆర్ఎస్ ప్రభుత్వ హయాంలో నిర్మించిన ‘అభివృద్ధి పైలాన్’ను మున్సిపల్ అధికారులు దొంగచాటుగా కూల్చివేయడం తీవ్ర ఉద్రిక్తతకు దారితీసింది. స్థానిక కాంగ్రెస్ ఎమ్మెల్యే నియంతృత్వ పోకడలకు అధికారులు తొత్తులుగా మారి ఈ అక్రమ చర్యకు పాల్పడ్డారని తెలంగాణ మాజీ మంత్రి కొప్పుల ఈశ్వర్ తీవ్రస్థాయిలో ధ్వజమెత్తారు. మరోవైపు ఈ కూల్చివేతను నిరసిస్తూ ఆందోళనకు దిగిన రామగుండం మాజీ ఎమ్మెల్యే కోరుకంటి చందర్‌తో పాటు పలువురు బీఆర్ఎస్ ముఖ్య నేతలను పోలీసులు అరెస్ట్ చేయడం స్థానికంగా కలకలం సృష్టించింది.

కేటీఆర్ తెచ్చిన అభివృద్ధిని చూసి ఓర్వలేకే ఈ కుట్ర

ఈ ఘటనపై హైదరాబాద్‌లో మాజీ మంత్రి కొప్పుల ఈశ్వర్ తీవ్రంగా స్పందిస్తూ ఒక ప్రకటన విడుదల చేశారు. గత బీఆర్ఎస్ ప్రభుత్వ హయాంలో అప్పటి ఐటీ, పురపాలక శాఖ మంత్రి కేటీఆర్ నేతృత్వంలో రామగుండంలో ఐటీ పార్క్, మెరుగైన మౌలిక వసతులు, తాగునీటి ప్రాజెక్టులతో పాటు కోట్లాది రూపాయలతో చేపట్టిన అభివృద్ధి పనులకు గుర్తుగా గాంధీనగర్‌లో ఈ పైలాన్‌ను ఏర్పాటు చేశామని గుర్తుచేశారు. బీఆర్ఎస్ చేసిన అభివృద్ధి ఆనవాళ్లు ప్రజల కళ్లముందు ఉండటాన్ని చూసి తట్టుకోలేకనే కాంగ్రెస్ ఎమ్మెల్యే ఆదేశాలతో అధికారులు దాన్ని కూల్చేశారని ఆరోపించారు.

ఎమ్మెల్యే ఏది చెబితే అది చేయడమే అధికారుల పనా?

మున్సిపల్ కమిషనర్, ఇతర అధికారుల తీరుపై కొప్పుల తీవ్ర ఆగ్రహం వ్యక్తం చేశారు. ప్రజాస్వామ్యబద్ధంగా పనిచేయాల్సిన అధికారులు అధికార పార్టీ ఎమ్మెల్యేకు తొత్తులుగా మారడం సిగ్గుచేటన్నారు. "ఎమ్మెల్యే ఆదేశిస్తే కళ్లు మూసుకుని అక్రమాలకు పాల్పడతారా?" అని నిలదీశారు. గత కొన్ని నెలలుగా రామగుండంలో చివరకు దేవాలయాలను కూడా వదలకుండా కూల్చివేస్తున్నారని మండిపడ్డారు. గోడలు, కట్టడాలు కూల్చినంత మాత్రాన ప్రజల గుండెల్లో నిలిచిపోయిన కేసీఆర్ జ్ఞాపకాలను, బీఆర్ఎస్ చేసిన అభివృద్ధిని ఎవరూ చెరిపివేయలేరని స్పష్టం చేశారు.

మాజీ ఎమ్మెల్యే కోరుకంటి చందర్ అరెస్ట్.. ఉద్రిక్తత

పైలాన్ కూల్చివేత విషయం తెలియగానే బీఆర్ఎస్ శ్రేణులు పెద్ద ఎత్తున ఘటనా స్థలానికి చేరుకుని నిరసనకు దిగాయి. అభివృద్ధి ఆనవాళ్లను ధ్వంసం చేయడాన్ని ప్రశ్నించిన రామగుండం మాజీ ఎమ్మెల్యే కోరుకంటి చందర్, పార్టీ నాయకులు మూల విజయ రెడ్డి, కౌశిక్ హరి, వ్యాళ్ళ హరీష్ రెడ్డి, మురళీధర్ రావులను పోలీసులు బలవంతంగా అదుపులోకి తీసుకుని పోలీస్ స్టేషన్‌కు తరలించారు.

ఈ అరెస్టులను కొప్పుల ఈశ్వర్ తీవ్రంగా ఖండించారు. ప్రజా సమస్యలపై, ప్రభుత్వ అక్రమాలపై ప్రశ్నిస్తే అరెస్టులు చేయడం కాంగ్రెస్ మార్క్ పాలనకు నిదర్శనమని ధ్వజమెత్తారు. అక్రమంగా అదుపులోకి తీసుకున్న కోరుకంటి చందర్‌తో పాటు పార్టీ నాయకులు, కార్యకర్తలందరినీ బేషరతుగా, తక్షణమే విడుదల చేయాలని ఆయన డిమాండ్ చేశారు. రామగుండం ప్రజల హక్కుల కోసం, అభివృద్ధి ఆనవాళ్ల పరిరక్షణ కోసం బీఆర్ఎస్ ప్రజాక్షేత్రంలో రాజీలేని పోరాటం చేస్తుందని హెచ్చరించారు.