SD Pay App Scam | నెలకు 9% లాభమంటూ నమ్మించారు.. 6.5 లక్షల మందిని ముంచి 1200 కోట్లు కొల్లగొట్టారు!

• రూ.1,211 కోట్ల 'ఎస్డీ పే' యాప్ మహా మోసం బట్టబయలు

SD Pay App Scam | త్రినేత్ర న్యూస్ : డిజిటల్ వాలెట్‌లో డబ్బులు డిపాజిట్ చేస్తే చాలు.. నెలకు ఏకంగా 9 శాతం క్యాష్‌బ్యాక్ ఇస్తామంటూ అమాయక ప్రజలకు ఎరవేసి వేల కోట్లు కొల్లగొట్టిన అంతర్రాష్ట్ర సైబర్ మోసానికి గుజరాత్ పోలీసులు తెరదించారు. అమ్రేలి జిల్లా పోలీసులు రెండు నెలల పాటు అత్యంత పకడ్బందీగా జరిపిన ఆపరేషన్‌లో ‘ఎస్డీ పే’ (SD Pay) యాప్ కేంద్రంగా సాగిన రూ.1,211 కోట్ల భారీ ఇన్వెస్ట్‌మెంట్ ఫ్రాడ్‌ను ఛేదించారు. దేశవ్యాప్తంగా 36 రాష్ట్రాలు, కేంద్రపాలిత ప్రాంతాలకు చెందిన దాదాపు 6.52 లక్షల మంది ఈ మాయగాళ్ల వలలో పడి తీవ్రంగా నష్టపోయారు. ఈ కేసుకు సంబంధించి ఏర్పాటైన స్పెషల్ ఇన్వెస్టిగేషన్ టీమ్ (SIT) ఇప్పటివరకు 12 మంది నిందితులను అరెస్ట్ చేసింది.

పాస్‌వర్డ్ క్రాక్ చేయడంతో కళ్లుబైర్లు కమ్మే నిజాలు

పోలీసులు ప్రారంభంలో జరిపిన విచారణలో ఈ మోసం విలువ రూ.635 కోట్లుగా, బాధితుల సంఖ్య 3.15 లక్షలుగా ఉంటుందని అంచనా వేశారు. అయితే ప్రధాన నిందితులు ఉపయోగించిన కంప్యూటర్ సిస్టమ్‌ను స్వాధీనం చేసుకున్న సైబర్ నిపుణులు.. దాని పాస్‌వర్డ్‌ను క్రాక్ చేసి డేటాను వెలికితీయడంతో ఈ స్కామ్ తీవ్రత రెట్టింపుగా తేలింది. ఈ యాప్‌ను గూగుల్ ప్లేస్టోర్ తదితర ప్లాట్‌ఫామ్‌ల నుంచి దాదాపు 15 లక్షల మంది డౌన్‌లోడ్ చేసుకున్నట్లు రికార్డులు వెల్లడించాయి. 1930 నేషనల్ సైబర్ క్రైమ్ హెల్ప్‌లైన్ ద్వారా 800కి పైగా ఫిర్యాదులు రాగా, పోలీసులు దాదాపు 900 మంది బాధితుల వాంగ్మూలాలను నమోదు చేశారు.

పోంజీ స్కీమ్ మాయాజాలం: అసలు మోసం ఎలా సాగింది?

ఎస్డీ పే యాప్‌ను నిందితులు సాధారణ డిజిటల్ వాలెట్ లాగే ప్రమోట్ చేశారు. యూజర్లు తమ వాలెట్‌లో ఉంచిన డిపాజిట్‌పై నెలకు 9 శాతం గ్యారంటీడ్ క్యాష్‌బ్యాక్ ఇస్తామని నమ్మించారు. దీనికి తోడు 15 లెవల్స్ మల్టీ-లెవల్ మార్కెటింగ్ (MLM) రెఫరల్ నెట్‌వర్క్‌ను జోడించారు. అంటే కొత్తవారిని జాయిన్ చేయిస్తే భారీగా రెఫరల్ కమీషన్లు ఖాతాల్లో పడతాయని ఆశ చూపించారు.

కొత్తగా వచ్చే ఇన్వెస్టర్ల డబ్బుతో పాతవారికి కమీషన్లు ఇస్తూ క్లాసిక్ 'పోంజీ స్కీమ్' నడిపారు. అయితే 2026 మార్చి నాటికి కొత్త డిపాజిట్లు తగ్గిపోవడంతో ఒక్కసారిగా వాలెట్లలోని డబ్బుల విత్‌డ్రాను నిలిపివేశారు. ఆ నిధులన్నింటినీ అప్పటికే సృష్టించిన డమ్మీ (షెల్) కంపెనీల ఖాతాల్లోకి దారిమళ్లించారు. బాధితులు నిలదీయగా.. త్వరలోనే కంపెనీ షేర్ మార్కెట్లలో ఐపీవో (IPO)కి రాబోతోందని, మీ డబ్బుకు బదులుగా షేర్లు ఇస్తామని, లిస్టింగ్ తర్వాత కోట్లలో లాభాలు వస్తాయంటూ మరో బురిడీ కొట్టించారు.

ఫ్లాట్ అమ్మి రూ.9.5 లక్షలు పెట్టింది.. వాలెట్‌లో రూ.50 లక్షలున్నా చిల్లిగవ్వ రాలేదు

ఈ స్కామ్‌లో సర్వం కోల్పోయిన వారిలో గుజరాత్ వడోదరకు చెందిన ఓ ప్రైవేట్ స్కూల్ టీచర్ కథ కంటతడి పెట్టిస్తోంది. 2025లో తనకున్న వన్-బీహెచ్‌కే (1-BHK) ఫ్లాట్‌ను అమ్మేసి వచ్చిన రూ.9.5 లక్షలను ఈ యాప్‌లో పెట్టుబడిగా పెట్టింది. ప్రారంభంలో క్రమం తప్పకుండా లాభాలు రావడంతో, ఆ నమ్మకంతో సోషల్ మీడియాలో పోస్టులు పెట్టి తన తోటి ఉపాధ్యాయులను, బంధువులను కూడా చేర్పించింది. ఆమె ద్వారా 31 మంది నేరుగా చేరగా, అందులో 70 ఏళ్ల వృద్ధురాలైన ఆమె తల్లి, వితంతువు అయిన సోదరి కూడా ఉన్నారు.

ఈ బంధుమిత్రుల నెట్‌వర్క్ దాదాపు రూ.42 లక్షలు డిపాజిట్ చేసింది. ఆ టీచర్ ద్వారా మొత్తం 800 మంది వరకు నెట్‌వర్క్‌లో చేరారు. ఆమె డిజిటల్ వాలెట్‌లో ఒకానొక సమయంలో రూ.50 లక్షల బ్యాలెన్స్ చూపించింది. రోజుకు రూ.25,000 వరకు వడ్డీ, కమీషన్ వస్తున్నట్లు యాప్ స్క్రీన్‌పై కనిపించింది. కానీ అసలు అవసరం వచ్చి డబ్బులు డ్రా చేసుకుందామనే సమయానికి యాప్ నిలిచిపోయింది. ఏజెంట్లు భరోసాగా ఇచ్చిన బ్లాంక్ చెక్కులు చెల్లలేదు.

మహారాష్ట్రకు మకాం మార్చి 'అప్నా పే' పేరిట కొత్త వల

ఈ రాకెట్‌కు ప్రధాన సూత్రధారులైన ధవల్ పటేల్, నరేంద్ర సోలంకిలు ఎస్డీ పే బోర్డు తిప్పేయగానే మహారాష్ట్రకు మకాం మార్చారు. అక్కడ ‘అప్నా పే’ (Apna Pay) పేరిట మరో కొత్త మోసానికి తెరతీశారు. ఈ దందాను నరేంద్ర కాంగ్రే అనే వ్యక్తికి అప్పగించారు. ప్రస్తుతం కాంగ్రే పరారీలో ఉండటంతో అతనిపై లుకౌట్ సర్క్యులర్ (LOC) జారీ చేసి నో-ఫ్లై లిస్టులో చేర్చారు. యూపీఐ ఆధారిత పేమెంట్ కంపెనీలో పనిచేసిన అనుభవం ఉన్న నరేంద్ర సోలంకితో పాటు ధవల్ పటేల్, సంతోష్ పాఠక్‌లను పోలీసులు కటకటాల్లోకి నెట్టారు.

గుజరాత్, మహారాష్ట్ర, రాజస్థాన్‌లలో మొదలైన ఈ నెట్‌వర్క్ కర్ణాటక, బిహార్, ఉత్తరప్రదేశ్‌ల వరకు విస్తరించినట్లు ఎస్‌ఐటీ గుర్తించింది. భారీ మొత్తంలో నిధులు చేతులు మారిన షెల్ బ్యాంక్ ఖాతాలు, మనీ లాండరింగ్ మార్గాలపై దర్యాప్తు ముమ్మరం చేశారు. అపరిచిత యాప్‌లలో అసాధారణ రాబడులు ఇస్తామనే ప్రకటనలను నమ్మి డిపాజిట్లు చేయవద్దని, ఏదైనా అనుమానం వస్తే వెంటనే 1930 సైబర్ హెల్ప్‌లైన్‌కు ఫిర్యాదు చేయాలని పోలీసులు ప్రజలను హెచ్చరించారు.