Harish Rao Alwala Speech | కుప్పంలో కృష్ణా నీళ్లు పారుతుంటే.. వనపర్తిలో ఎందుకు పారవు?

• ఇది రేవంత్ తెచ్చిన కరువే
• హరీశ్ రావు నిప్పులు

Harish Rao Alwala Speech | త్రినేత్ర న్యూస్ : "రాష్ట్రంలో ప్రస్తుత పరిస్థితి కాలం తెచ్చిన కరువు కాదు.. ముమ్మాటికీ కాంగ్రెస్ అసమర్థత వల్ల సీఎం రేవంత్ రెడ్డి తీసుకొచ్చిన కరువే" అని మాజీ మంత్రి, బీఆర్‌ఎస్ సీనియర్ నేత తన్నీరు హరీశ్ రావు తీవ్రస్థాయిలో మండిపడ్డారు. వనపర్తి జిల్లా పెద్దమందడి మండలం అల్వాల గ్రామంలో సాగునీరు అందక ఎండిపోయిన వరి పొలాలను సోమవారం ఆయన మాజీ మంత్రులు నిరంజన్ రెడ్డి, శ్రీనివాస్ గౌడ్, లక్ష్మారెడ్డిలతో కలిసి పరిశీలించారు. చేతికొచ్చిన పైరు కళ్లముందే ఎండిపోవడంతో కన్నీటిపర్యంతమైన అన్నదాతలను ఓదార్చి, అనంతరం నిర్వహించిన రైతు బహిరంగ సభలో ప్రసంగించారు.

"శ్రీశైలంలో నీళ్లున్నా.. మోటార్లు ఆన్ చేయని దద్దమ్మ ప్రభుత్వం"

కృష్ణా జలాలు పారాల్సిన పాలమూరు గడ్డపై నేడు పంటలు ఎండిపోతుంటే గుండె తరుక్కుపోతోందని హరీశ్ రావు ఆవేదన వ్యక్తం చేశారు. "శ్రీశైలానికి 221 టీఎంసీలు, జూరాలకు 252 టీఎంసీల వరద నీరు వచ్చింది. కానీ, టైంకి మోటార్లు ఆన్ చేయకుండా, 24 గంటల పాటు నడపకుండా రేవంత్ సర్కార్ పంటలను నిలువునా ఎండబెట్టింది. కేసీఆర్ హయాంలో ప్రాజెక్టులు కట్టి సిద్ధంగా ఉంచితే, ఈ ప్రభుత్వానికి కనీసం స్విచ్ నొక్కి మోటార్లు తిప్పడం కూడా చేతకావడం లేదు" అని ఎద్దేవా చేశారు.

ఒక్క అల్వాల గ్రామంలోనే 250 ఎకరాలు, రాష్ట్రవ్యాప్తంగా దాదాపు 25 లక్షల ఎకరాల్లో పంటలు ఎండిపోయాయని ఆయన ఆరోపించారు.

700 కి.మీ కుప్పంలో నీళ్లు.. 70 కి.మీ వనపర్తిలో ఎండాలా?

రేవంత్ రెడ్డి తీరుపై విరుచుకుపడుతూ హరీశ్ రావు కీలక పోలిక తెచ్చారు. "ఇక్కడి నుంచి 700 కిలోమీటర్ల దూరంలో ఉన్న ఏపీ సీఎం చంద్రబాబు నాయుడి నియోజకవర్గం కుప్పంలో కృష్ణా నీళ్లు పారుతున్నాయి. మరి కేవలం 70 కిలోమీటర్ల దూరంలో ఉన్న వనపర్తికి ఎందుకు రావడం లేదు? కల్వకుర్తి లిఫ్ట్ కింద గత 5 నెలల్లో 50 టీఎంసీల నీళ్లు ఎత్తే అవకాశం ఉన్నా.. రేవంత్ రెడ్డి ఎత్తింది కేవలం 18 టీఎంసీలే. మిగతా నీళ్లన్నీ తన గురువు చంద్రబాబుకు పోతిరెడ్డిపాడు, రాయలసీమ లిఫ్ట్ ద్వారా తరలించుకుపోయేలా వదిలేశారు."

గతంలో కేసీఆర్ ఉన్నప్పుడు కృష్ణా జలాల్లో తెలంగాణ వాటా 41 శాతం వరకు వాడుకుంటే, రేవంత్ అసమర్థత వల్ల నేడు అది 25 శాతానికి పడిపోయిందని ఆయన గణాంకాలతో వివరించారు.

పాలమూరు ప్రాజెక్టులో చిన్న మట్టి తండు తీయలేరా?

పాలమూరు-రంగారెడ్డి ఎత్తిపోతల ప్రాజెక్టును కేసీఆర్ 80 శాతం పూర్తి చేశారని, ప్యాకేజీ-3 కాలువలో రెండుమూడు చోట్ల ఉన్న చిన్న మట్టి తండును (Silt/Mud Mound) తొలగిస్తే కరివేన దాకా నీళ్లు నింపవచ్చని చెప్పారు. వారం రోజుల్లో పూర్తయ్యే ఆ చిన్న పనిని కూడా చేయకుండా చేతులెత్తేశారని విమర్శించారు. రైతులను ఆదుకునే ఆలోచన లేకుండా, ఢిల్లీలో కూర్చుని మియాపూర్‌లో 500 ఎకరాల భూములు అమ్ముకుని కమిషన్లు కొట్టే ఆరాటంలో ముఖ్యమంత్రి ఉన్నారని ఆరోపించారు.

రైతుబంధు, రైతుబీమా, కేసీఆర్ కిట్ వంటి పథకాలన్నీ ఆపేశారని, చివరకు దావఖానాల్లో డాక్టర్లు, మందులు లేని దుస్థితి తీసుకొచ్చారని మండిపడ్డారు.

కాంగ్రెస్ సర్కార్‌కు 4 సూటి డిమాండ్లు

శ్రీశైలంలో ఇంకా నీళ్లు ఉన్నందున, కల్వకుర్తిలోని 5 మోటార్లను 24 గంటల పాటు నడిపి ఈ ప్రాంతంలోని చెరువులన్నీ నింపాలి.

పాలమూరు-రంగారెడ్డి ప్రాజెక్టులో తండును వెంటనే తొలగించి, నార్లాపూర్ నుంచి కరివేన, వట్టెం రిజర్వాయర్ల వరకు నీటిని తరలించాలి.

జూరాల నుంచి మరో 15 రోజుల పాటు సాగునీటిని విడుదల చేసి చేతికొచ్చిన వానకాలం పంటలను కాపాడాలి.

ఎండిపోయిన 25 లక్షల ఎకరాలకు మహారాష్ట్ర, ఏపీ తరహాలో తక్షణ నష్టపరిహారం చెల్లించాలి. యాసంగి రైతుబంధు వెంటనే వేయడంతో పాటు, ఉపాధి కోల్పోయిన వ్యవసాయ కూలీలకు ఇచ్చిన హామీ ప్రకారం రూ.12,000 విడుదల చేయాలి.

ఆంధ్రాలో వరదలు వస్తే కేంద్ర బృందాలు పరిగెత్తుకుంటూ వచ్చాయని, తెలంగాణలో ఇంతటి కరువు వస్తే కేంద్ర మంత్రులు కిషన్ రెడ్డి, బండి సంజయ్ ఎందుకు పట్టించుకోవడం లేదని ప్రశ్నించారు. అన్నదాతలు ఎవరూ అధైర్యపడి ప్రాణాల మీదకు తెచ్చుకోవద్దని, రాబోయే అసెంబ్లీ సమావేశాల్లో ప్రభుత్వం మెడలు వంచి రైతుల పక్షాన పోరాడుతామని హరీశ్ రావు భరోసా ఇచ్చారు.