Harish Rao | కాళేశ్వరం, దేవాదుల ప్రాజెక్టుల నిర్వహణ తీరుపై హరీశ్ రావు ధ్వజం

Harish Rao | త్రినేత్ర‌.న్యూస్‌: కాళేశ్వ‌రం, దేవాదుల ప్రాజెక్టుల నిర్వ‌హ‌ణ‌లో కాంగ్రెస్ ప్రభుత్వం వ్య‌వ‌హ‌రిస్తున్న‌ తీరుపై బీఆర్ఎస్ డిప్యూటీ ఫ్లోర్ లీడర్ హరీశ్ రావు (Harish Rao) మండిప‌డ్డారు. భారీ మోటార్ల‌ను నిబంధ‌న‌ల‌కు విరుద్ధంగా ప‌దేప‌దే ఆన్‌, ఆఫ్ చేస్తూ అశాస్త్రీయంగా వ్య‌వ‌హ‌రిస్తున్నార‌ని మండిప‌డ్డారు. పంపులు, మోటార్లు పాడయ్యేలా కావాలనే ఈ కుట్ర జరుగుతున్న‌ద‌ని, ఆ నెపాన్ని గత బీఆర్ఎస్ ప్రభుత్వంపై నెట్టేందుకు ప్రయత్నిస్తున్నార‌ని ఆరోపించారు. ఈ మేర‌కు రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డికి బహిరంగ లేఖ రాశారు.

`భారీ నీటి పారుదల మోటార్లను ఇష్టానుసారం స్టార్ట్, స్టాప్ చేయడం ఇంజినీరింగ్ నిబంధనలకు విరుద్ధం. అలా చేస్తే వైబ్రేషన్స్ వచ్చి పంపులు, ఇంప్లర్స్, మోటార్లు పాడైపోయే ప్రమాదం ఉంది. గత బీఆర్ఎస్ ప్రభుత్వంపై నెపం నెట్టేందుకే ఉద్దేశపూర్వకంగా మోటార్లను పాడు చేస్తున్నారా?. ఇది ప్రభుత్వ పాలనాపరమైన నిర్లక్ష్యమా? లేక కావాలనే చేస్తున్న కుట్రనా?.
భారీ మోటార్లు నిరంతరాయంగా నడిచేలా డిజైన్ చేసినవి, పదే పదే ఆపితే తీవ్ర నష్టం తప్పదు. వేల కోట్ల ప్రజాధనంతో నిర్మించిన ప్రాజెక్టులను ఇలా నిర్లక్ష్యంగా వాడటం శోచనీయం.

చందలాపూర్ సహా ప్యాకేజీ 6, 8, 10, 11, 12లలో మోటార్ల ఆపరేషన్ తీరు తీవ్ర అభ్యంతరకరం. తక్షణమే మోటార్లను పదే పదే ఆన్, ఆఫ్ చేసే అశాస్త్రీయ విధానాన్ని ప్రభుత్వం మానుకోవాలి. ఇంజినీరింగ్ నిబంధనల ప్రకారం, డిజైన్‌కు అనుగుణంగా నిరంతరాయంగా పంపులు నడిపించాలి. మీ రాజకీయాల కోసం తెలంగాణ రైతుల జీవనాడి అయిన ప్రాజెక్టులతో చెలగాటం ఆడొద్దు` అని హరీశ్‌ రావు హెచ్చరించారు.