Five Fake Doctors Arrested | ఐదుగురు నకిలీ డాక్టర్ల అరెస్ట్.. కంటి ఆసుపత్రుల ముసుగులో భారీ మోసం!

Five Fake Doctors Arrested | త్రినేత్ర.న్యూస్ : నల్గొండ జిల్లా మిర్యాలగూడ పట్టణంలో వైద్య రంగం ముసుగులో సాగుతున్న భారీ మోసం వెలుగులోకి వచ్చింది. ఎటువంటి వైద్య అర్హతలు లేకపోయినా డాక్టర్లమంటూ చెలామణి అవుతూ, ప్రజల కంటి చూపుతో చెలగాటమాడుతున్న ఐదుగురు నకిలీ డాక్టర్లను పోలీసులు అరెస్ట్ చేశారు. బుధవారం ఏర్పాటు చేసిన మీడియా సమావేశంలో మిర్యాలగూడ డీఎస్పీ రాజశేఖర్ రాజు ఈ వివరాలను వెల్లడించారు.

తెలంగాణ మెడికల్ కౌన్సిల్ తనిఖీల్లో బట్టబయలు

గత కొద్దిరోజులుగా పట్టణంలోని పలు కంటి ఆసుపత్రులపై తెలంగాణ మెడికల్ కౌన్సిల్ అధికారులు ఆకస్మిక తనిఖీలు నిర్వహించారు. ఈ తనిఖీల్లో ఐదు ఆసుపత్రులలో పనిచేస్తున్న వ్యక్తులకు కనీస వైద్య అర్హతలు (MBBS/MS/Ophthalmology) లేవని తేలింది. కేవలం అనుభవంతో లేదా నకిలీ సర్టిఫికెట్లతో వీరు డాక్టర్లుగా కొనసాగుతున్నట్లు అధికారులు గుర్తించారు.

బాధితుల ఫిర్యాదుతో రంగంలోకి పోలీసులు

నకిలీ డాక్టర్ల వైద్యం వల్ల నష్టపోయిన ఒక బాధిత మహిళతో పాటు, మెడికల్ కౌన్సిల్ సభ్యులు ఇచ్చిన అధికారిక ఫిర్యాదు మేరకు పోలీసులు కేసు నమోదు చేశారు. పక్కా సమాచారంతో దాడులు నిర్వహించి ఐదుగురు నిందితులను అదుపులోకి తీసుకున్నారు.

డీఎస్పీ హెచ్చరిక: "ప్రజల ప్రాణాలతో ఆడితే కఠిన చర్యలు"

ఈ సందర్భంగా డీఎస్పీ రాజశేఖర్ రాజు మాట్లాడుతూ.. "అర్హత లేకుండా వైద్యం చేయడం నేరం. ఎవరైనా ప్రజల ఆరోగ్యంతో ఆటలాడితే సహించేది లేదు. పట్టణంలోని ప్రతి ఆసుపత్రిలో పనిచేసే వైద్యుల అర్హతలను తనిఖీ చేస్తాం. ప్రజలు కూడా డాక్టర్ల వద్దకు వెళ్లే ముందు వారి అర్హతలను గమనించాలి" అని సూచించారు.

నిందితులపై వివిధ సెక్షన్ల కింద కేసులు నమోదు చేసి రిమాండ్‌కు తరలించినట్లు పోలీసులు తెలిపారు. ఈ అరెస్టులతో మిర్యాలగూడలోని ప్రైవేట్ ఆసుపత్రుల యాజమాన్యాల్లో వణుకు మొదలైంది.