Singireddy Niranjan Reddy | ఆంధ్రజ్యోతిది ఆది నుంచీ ‘చావు భాషే’

• చిల్లర రాతలపై బీఆర్ఎస్ నేత నిరంజన్ రెడ్డి ఫైర్

Singireddy Niranjan Reddy | త్రినేత్ర.న్యూస్ : వరంగల్ జిల్లా నల్లబెల్లిలో దివంగత నేత, మాజీ ఎమ్మెల్యే పెద్ది సుదర్శన్ రెడ్డి కుటుంబాన్ని పరామర్శించేందుకు వెళ్లిన కేసీఆర్ పర్యటనపై 'ఆంధ్రజ్యోతి' దినపత్రిక ప్రచురించిన వార్త తీవ్ర దుమారం రేపుతోంది. ఒక విషాదకరమైన, ఉద్వేగభరితమైన సందర్భాన్ని కవర్ చేస్తూ ఆంధ్రజ్యోతి రాసిన వార్తపై మాజీ మంత్రి సింగిరెడ్డి నిరంజన్ రెడ్డి తీవ్ర స్థాయిలో విరుచుకుపడ్డారు. ఈ మేరకు ఆయన ఒక ప్రకటన విడుదల చేస్తూ, పత్రిక తీరును ఎండగట్టారు.

బాధ్యత మరిచి విషం చిమ్ముతున్నారా?

"ఆంధ్రజ్యోతిది ఆది నుంచీ చావు భాషే. ఇది కేవలం బాధ్యతారాహిత్యమే కాదు, కనీస సభ్యత కూడా కాదు" అని నిరంజన్ రెడ్డి ఘాటుగా విమర్శించారు. ఒక కుటుంబం పెద్దదిక్కును కోల్పోయి తీవ్ర భావోద్వేగాల మధ్య ఉన్నప్పుడు, బాధ్యతాయుతంగా వ్యవహరించాల్సిన పత్రిక.. ఇలా కక్షపూరితంగా విషం చిమ్మడం దారుణమన్నారు. జర్నలిజం (Journalism) ముసుగులో పనికిమాలిన రాతలు రాస్తున్నారని ఆయన మండిపడ్డారు.

కేసీఆర్ క్యారెక్టర్‌ను ఏం చేయలేరు

"పిల్లి శాపాలకు ఉట్లు తెగవు. మీరు మీ పత్రికలో ఎన్ని మరణ మృదంగాలు మోగించినా.. అవి కేవలం అరణ్య ఘోషగానే మిగిలిపోతాయి తప్ప ప్రజలు నమ్మరు" అని నిరంజన్ రెడ్డి గట్టి కౌంటర్ ఇచ్చారు. కేసీఆర్‌ను టార్గెట్ చేస్తూ.. తక్కువ చేసి చూపే ఇలాంటి చిల్లర రాతల వల్ల.. ఆ రాతలు రాసిన వారి దిగజారుడు వ్యక్తిత్వం (Personality) బయటపడుతుందే తప్ప, కేసీఆర్ గారి స్థాయిని ఏమాత్రం తగ్గించలేవని ఆయన స్పష్టం చేశారు.