Congress Party | కేసీఆర్ ఎమ్మెల్యే ప‌ద‌వికి రాజీనామా చేయాల‌ని.. కాంగ్రెస్ పార్టీ మ‌హా ధ‌ర్నా

Congress Party | త్రినేత్ర‌.న్యూస్ : మాజీ ముఖ్యమంత్రి కేసీఆర్ ఎమ్మెల్యే పదవికి రాజీనామా చేయాలని డిమాండ్ చేస్తూ కాంగ్రెస్‌ పార్టీ మహా ధర్నా నిర్వ‌హించేందుకు సిద్ధ‌మైంది. ఈనెల 6వ తేదీ ఆదివారం హైదరాబాద్‌ ఇందిరాపార్క్ ధర్నా చౌక్ వద్ద తెలంగాణ కాంగ్రెస్‌ ఆధ్వర్యంలో మహా ధర్నా చేప‌ట్ట‌నున్నారు.

వెయ్యి రోజులుగా జీతం తీసుకుంటూ ప్రతిపక్ష పాత్ర పోషించకుండా, అసెంబ్లీకి హాజరుకాకుండా ఉన్న మాజీ సీఎం కేసీఆర్ తన ఎమ్మెల్యే పదవికి రాజీనామా చేయాలని కాంగ్రెస్‌ డిమాండ్ చేసింది. ఈ మ‌హా ధ‌ర్నాలో కాంగ్రెస్‌ ముఖ్య నేతలు, ఎమ్మెల్యేలు, ఎమ్మెల్సీలు, ప్రజాప్రతినిధులు పాల్గొన‌నున్నారు.

ధర్నా ఏర్పాట్లపై శ‌నివారం ఉదయం 9 గంటలకు సన్నాహక సమావేశం నిర్వ‌హించ‌నున్నారు. హైదరాబాద్‌, రంగారెడ్డి జిల్లాల ఇన్‌చార్జి మంత్రులు పొన్నం ప్రభాకర్, శ్రీధర్‌బాబు ఆధ్వర్యంలో సమావేశం జ‌ర‌గ‌నుంది. సమావేశానికి హైదరాబాద్‌, రంగారెడ్డి జిల్లాల డీసీసీ అధ్యక్షులు, ఎమ్మెల్యేలు, నియోజకవర్గ ఇన్‌చార్జులు, ఇతర ముఖ్య నేతలు హాజ‌రు కానున్నారు. ఆదివారం జరిగే మహా ధర్నాను విజయవంతం చేసేందుకు కార్యాచరణ, ఏర్పాట్లపై సమావేశంలో చర్చించ‌నున్నారు.