Gajwel MLA Camp Office | గ‌జ్వేల్ ఎమ్మెల్యే క్యాంపు ఆఫీసుపై కాంగ్రెస్ నేత‌ల దాడి..

Gajwel MLA Camp Office | త్రినేత్ర‌.న్యూస్ : గజ్వేల్ ఎమ్మెల్యే క్యాంపు ఆఫీసుపై కాంగ్రెస్ నేతలు, కార్య‌క‌ర్త‌లు దాడికి పాల్ప‌డ్డారు. రాళ్ల‌తో దాడి చేసి ఫ‌ర్నీచ‌ర్‌ను ధ్వంసం చేశారు. కిటీకిల‌ను ప‌గుల‌గొట్టారు. క్యాంపు కార్యాల‌యంలో ఉన్న మాజీ సీఎం కేసీఆర్ ఫొటోను తొల‌గించి సీఎం రేవంత్ రెడ్డి ఫొటోను ఉంచారు. గ‌జ్వేల్ నియోజ‌క‌వ‌ర్గం నుంచి కేసీఆర్ అసెంబ్లీకి ప్రాతినిధ్యం వ‌హిస్తున్న సంగ‌తి తెలిసిందే.

కాంగ్రెస్ నేత‌ల దాడిని ప‌లువురు నేత‌లు ఖండించారు. ఇలాంటి దాడులు స‌రికాద‌ని మండిప‌డ్డారు. డీసీసీ ప్రెసిడెంట్ తూంకుంట ఆంక్ష రెడ్డి ఆధ్వ‌ర్యంలో కాంగ్రెస్ నేత‌లు దాడికి పాల్ప‌డ్డారు.

గ‌జ్వేల్ క్యాంపు ఆఫీసుపై దాడిని బీఆర్ఎస్ఎల్పీ డిప్యూటీ ఫ్లోర్ లీడ‌ర్ హ‌రీశ్‌రావు తీవ్రంగా ఖండించారు. సీఎం రేవంత్ రెడ్డి సూచ‌న‌ల మేర‌కే ఈ దాడి జ‌రిగింద‌న్నారు. తెలంగాణ కాంగ్రెస్ నేత‌లు క్రిమిన‌ల్స్ మాదిరి ప్ర‌వ‌ర్తిస్తున్నార‌ని మండిప‌డ్డారు. ఇది ప్ర‌జాస్వామ్యంపై దాడిగా హ‌రీశ్‌రావు పేర్కొన్నారు.

ప్ర‌జాపాల‌న‌లో ప్ర‌తిప‌క్షాలు, సామాజిక నేత‌లు, మీడియాపై దాడులు స‌ర్వ‌సాధార‌ణ‌మైపోయాయ‌ని ఆగ్ర‌హం వ్య‌క్తం చేశారు. ఇలాంటి దాడుల‌కు బీఆర్ఎస్ పార్టీ భ‌య‌ప‌డ‌ద‌ని తేల్చిచెప్పారు. ప్ర‌జా స‌మ‌స్య‌ల‌పై నిరంత‌రం పోరాడుతూనే ఉంటామ‌ని ఆయ‌న స్ప‌ష్టం చేశారు.