Cold Wave | పెరిగిన చ‌లి తీవ్ర‌త‌.. ఈ ప‌ది జిల్లాల్లో క‌నిష్ఠ ఉష్ణోగ్ర‌త‌లు న‌మోదు..!

Cold Wave | హైద‌రాబాద్ : రాజ‌ధాని హైద‌రాబాద్ న‌గ‌రంతో పాటు తెలంగాణ వ్యాప్తంగా చ‌లి గాలుల తీవ్ర‌త పెరిగింది. రాబోయే రెండు రోజుల్లో రాష్ట్రంలోని ప‌లు జిల్లాల్లో 3 నుంచి 4 డిగ్రీల సెల్సియ‌స్ వ‌ర‌కు క‌నిష్ఠ ఉష్ణోగ్ర‌త‌లు న‌మోద‌య్యే అవ‌కాశం ఉంది. ఈ మేర‌కు హైద‌రాబాద్ వాతావ‌ర‌ణ కేంద్రం ప్ర‌క‌ట‌న చేసింది.

హైద‌రాబాద్ న‌గ‌రంతో పాటు ఆదిలాబాద్, కుమ్రం భీం ఆసిఫాబాద్, సంగారెడ్డి, మెద‌క్, మంచిర్యాల‌, వ‌రంగ‌ల్, హ‌నుమ‌కొండ‌, వికారాబాద్, కామారెడ్డి జిల్లాల్లో చ‌లి గాలుల తీవ్ర‌త మ‌రింత పెరిగి, క‌నిష్ఠ ఉష్ణోగ్ర‌త‌లు న‌మోదు అయ్యే అవ‌కాశం ఉంద‌న్నారు. ఈ జిల్లాల్ల్లో 5 నుంచి 10 డిగ్రీల సెల్సియ‌స్ మ‌ధ్య ఉష్ణోగ్ర‌త‌లు న‌మోదు కానున్నాయి. మిగ‌తా జిల్లాల్లో 10 నుంచి 15 డిగ్రీల మ‌ధ్య ఉష్ణోగ్ర‌త‌లు న‌మోదు కానున్నాయి.

గురువారం ఉద‌యం కూడా చ‌ల్ల‌ని గాలులు వీచాయి. దీంతో ప్ర‌జ‌లు తీవ్ర ఇబ్బందులు ఎదుర్కొన్నారు. తెలంగాణ స్టేట్ డెవ‌ల‌ప్‌మెంట్ ప్లానింగ్ సొసైటీ నివేదిక‌ల ప్ర‌కారం.. రంగారెడ్డి జిల్లాలోని మొయినాబాద్, ఇబ్ర‌హీంప‌ట్నం ఏరియాల్లో 6.5 నుంచి 7.5 డిగ్రీల సెల్సియ‌స్ ఉష్ణోగ్ర‌త‌లు న‌మోద‌య్యాయి. హైద‌రాబాద్ సెంట్ర‌ల్ యూనివ‌ర్సిటీ వ‌ద్ద 8.1, మౌలాలిలో 9.4, రాజేంద్ర‌న‌గ‌ర్‌లో 9.5, గ‌చ్చిబౌలిలో 11, గాజుల‌రామారంలో 11.4, జీడిమెట్ల‌లో 11.6, అల్వాల్‌లో 12 డిగ్రీల సెల్సియ‌స్ ఉష్ణోగ్ర‌త‌లు న‌మోదైన‌ట్లు అధికారులు వెల్ల‌డించారు.

జిల్లాల విష‌యానికి వ‌స్తే ఆసిఫాబాద్ జిల్లాలో 5.7, సంగారెడ్డిలో 6.4, రంగారెడ్డిలో 6.5, ఆదిలాబాద్‌లో 7.7, వికారాబాద్‌లో 8.1, మెద‌క్ జిల్లాలో 8.5 డిగ్రీల సెల్సియ‌స్ ఉష్ణోగ్ర‌త‌లు న‌మోద‌య్యాయి.