Tungabhadra Water Share | తుంగభద్ర జలాల్లో మన వాటా ఏదీ? ఆర్డీఎస్ పనులపై కేంద్రానికి సీఎం రేవంత్ విజ్ఞప్తి

• తుంగభద్ర నుంచి తెలంగాణకు దక్కాల్సిన 15.9 టీఎంసీల వాటాపై సీఎం రేవంత్ అధికారులతో రివ్యూ మీటింగ్
• ఆర్డీఎస్ కాలువ ఆధునికీకరణ, కర్ణాటక పరిధిలోని పూడికతీత పనులపై కేంద్రం (CWC) జోక్యం చేసుకోవాలని విజ్ఞప్తి
• కేంద్ర జలశక్తి మంత్రి, మూడు రాష్ట్రాల సీఎంల భేటీలో ఈ సమస్యను లేవనెత్తాలని నిర్ణయం
• తుమ్మిళ్ల ఎత్తిపోతల, మల్లమ్మకుంట బ్యాలెన్సింగ్ రిజర్వాయర్ సామర్థ్యం పెంపుపై అధికారులకు కీలక ఆదేశాలు

Tungabhadra Water Share | త్రినేత్ర.న్యూస్ : తెలంగాణకు రావాల్సిన తుంగభద్ర నీటి వాటా, ఆర్డీఎస్ (RDS) కాలువ సమస్యల పరిష్కారానికి ముఖ్యమంత్రి ఎ.రేవంత్ రెడ్డి (CM Revanth Reddy) యాక్షన్ ప్లాన్ సిద్ధం చేశారు. బుధవారం సాయంత్రం జలసౌధలో నీటిపారుదల శాఖ ఉన్నతాధికారులు, మంత్రులతో ఆయన కీలక రివ్యూ మీటింగ్ (Review meeting) నిర్వహించారు. మూడు రాష్ట్రాల మధ్య అంతర్రాష్ట్ర నదీ జలాల పంపిణీ సమస్యల పరిష్కారానికి కేంద్ర జల సంఘం (CWC) రంగంలోకి దిగాలని సీఎం కోరారు.

దక్కని నీటి వాటా.. రైతుల‌కు అన్యాయం

తుంగభద్ర డ్యామ్ నుంచి తెలంగాణకు హక్కుగా 15.9 టీఎంసీల నీరు రావాల్సి ఉంది. కానీ, ప్రస్తుతం ఐదొంతుల నీరు (కేవలం 5-6 టీఎంసీలు) కూడా రావడం లేదని సీఎం ఆందోళన వ్యక్తం చేశారు. దీనివల్ల జోగులాంబ గద్వాల జిల్లాలోని 75 గ్రామాలకు చెందిన దాదాపు 84 వేల ఎకరాల ఆయకట్టుకు తీవ్ర అన్యాయం జరుగుతోందన్నారు. తెలంగాణ, ఏపీ, కర్ణాటక రాష్ట్రాల భాగస్వామ్యం ఉన్నందున కేంద్ర ప్రభుత్వం జోక్యం చేసుకుని తుంగభద్ర బోర్డును (Tungabhadra Board) మరింత పటిష్టం చేయాలని ఆయన డిమాండ్ చేశారు.

ఆర్డీఎస్ కాలువ ఆధునికీకరణ ఏదీ?

రాజోలిబండ డైవర్షన్ స్కీమ్ (RDS) ఆనకట్ట ప్రస్తుతం ప్రమాదకర స్థితిలో ఉందని, భద్రతా పనులను తక్షణమే గుర్తించి చేపట్టాలని అధికారులను సీఎం ఆదేశించారు. కెనాల్ మోడర్నైజేషన్ (Modernization) కోసం రాష్ట్ర ప్రభుత్వం రూ. 59 కోట్లు డిపాజిట్ చేసినా, ఇంకా ప్యాకేజీ 1, 2 పనులు మొదలుకాలేదని.. కేవలం 3, 4 పనులు మాత్రమే పూర్తయ్యాయని అధికారులు సీఎం దృష్టికి తెచ్చారు. రేపు కేంద్ర జలశక్తి మంత్రి ఆధ్వర్యంలో మూడు రాష్ట్రాల సీఎంలతో జరిగే మీటింగ్‌లో ఈ పెండింగ్ పనుల అంశాన్ని ప్రధానంగా ప్రస్తావించాలని నిర్ణయించారు.

పూడికతీతకు కర్ణాటక సహకారం తప్పనిసరి

ఆర్డీఎస్ వద్ద తెలంగాణ భూభాగం వైపు భారీగా పూడిక పేరుకుపోవడంతో ఆశించిన స్థాయిలో నీటి మళ్లింపు జరగడం లేదని ఇంజనీర్లు వివరించారు. 2004 నాటి ఎక్స్‌పర్ట్ కమిటీ రిపోర్ట్ ప్రకారం కర్ణాటక భూభాగంలో ఉన్న పూడికను తొలగించేందుకు ఆ రాష్ట్ర ప్రభుత్వ సహకారం కోరాలని నిర్ణయించారు. నాటి కమిటీ సిఫార్సులు, ప్రస్తుత వాస్తవ పరిస్థితులతో కేంద్రానికి వెంటనే ఒక సమగ్ర నివేదికను (Detailed Report) సిద్ధం చేయాలని ఇరిగేషన్ అధికారులను సీఎం రేవంత్ ఆదేశించారు.

మల్లమ్మకుంట రిజర్వాయర్ కెపాసిటీ పెంపు

భవిష్యత్తు అవసరాలను దృష్టిలో ఉంచుకుని తుంగభద్ర లిఫ్ట్ ఇరిగేషన్ (Lift irrigation) పథకంలో గరిష్ట నీటి వినియోగానికి ఉన్న ప్రత్యామ్నాయ మార్గాలను వెతకాలని ముఖ్యమంత్రి సూచించారు. ముఖ్యంగా తుమ్మిళ్ల నుంచి నీటిని వాడుకునేందుకు వీలుగా మల్లమ్మకుంట బ్యాలెన్సింగ్ రిజర్వాయర్ కెపాసిటీ (Capacity) పెంచే పనులను వీలైనంత వేగంగా పూర్తి చేయాలని అధికారులకు స్పష్టమైన ఆదేశాలు ఇచ్చారు.

ఈ ఉన్నతస్థాయి సమావేశంలో ఇరిగేషన్ మంత్రి ఉత్తమ్ కుమార్ రెడ్డి, ఎంపీ మల్లు రవి, ప్రభుత్వ సలహాదారులు జితేందర్ రెడ్డి, ఆదిత్యనాథ్ దాస్, సీఎండీ కార్యదర్శి మాణిక్ రాజ్, ఇరిగేషన్ సెక్రటరీ శ్రీధర్ తదితరులు పాల్గొన్నారు.