Telangana TIMS Hospitals | జూన్ 2 నాటికి అన్ని ‘టిమ్స్’ ఆసుపత్రులు రెడీ

• టిమ్స్ ఆసుపత్రులకు డెడ్‌లైన్
• నిమ్స్ - టిమ్స్ సమన్వయం
• ఒకే రిక్రూట్‌మెంట్
• తెలంగాణ వైద్య రంగంలో భారీ మార్పులు
• సీఎం రేవంత్ రెడ్డి కీలక ఆదేశాలు

Telangana TIMS Hospitals | త్రినేత్ర న్యూస్ : రాష్ట్రంలో ప్రభుత్వ వైద్య సేవలను మరింత బలోపేతం చేసే దిశగా ముఖ్యమంత్రి రేవంత్ రెడ్డి కీలక నిర్ణయాలు తీసుకున్నారు. వైద్య ఆరోగ్య శాఖ అధికారులతో నిర్వహించిన ఉన్నత స్థాయి సమీక్షా సమావేశంలో.. ఆసుపత్రుల నిర్వహణ, నియామకాలు, నిర్మాణ పనుల గడువుపై సీఎం స్పష్టమైన ఆదేశాలు జారీ చేశారు. ముఖ్యంగా జూన్ 2 నాటికి రాష్ట్రంలోని అన్ని టిమ్స్ (TIMS) ఆసుపత్రులు పూర్తిస్థాయిలో ప్రజలకు అందుబాటులోకి రావాల్సిందేనని అధికారులకు డెడ్‌లైన్ విధించారు.

మూడు టిమ్స్ ఆసుపత్రులకు ఒకే రిక్రూట్‌మెంట్

టిమ్స్ ఆసుపత్రుల నిర్వహణ అత్యంత కీలకమని పేర్కొన్న సీఎం రేవంత్ రెడ్డి.. సిబ్బంది నియామకంపై కీలక సూచనలు చేశారు.

మూడు టిమ్స్ ఆసుపత్రులకు కలిపి ఒకే రిక్రూట్‌మెంట్ ప్రక్రియ చేపట్టాలి.

ఉద్యోగుల బదిలీలు (Transfers) కూడా ఈ మూడు టిమ్స్ ఆసుపత్రుల మధ్యే జరిగేలా విధానం రూపొందించాలి.

సనత్ నగర్ టిమ్స్‌లో శాశ్వత డాక్టర్ల నియామకం పూర్తయ్యే వరకు, వైద్య సేవలకు ఆటంకం కలగకుండా బయట నుంచి డాక్టర్లను నియమించుకోవాలి.

నిమ్స్‌లో బెడ్స్ లేకపోతే సనత్ నగర్ టిమ్స్‌కు తరలింపు

రోగులకు మెరుగైన చికిత్స అందించేందుకు నిమ్స్ (NIMS), టిమ్స్ ఆసుపత్రుల మధ్య సమన్వయం అత్యవసరమని సీఎం అన్నారు. నిమ్స్‌లో బెడ్స్ ఖాళీ లేని పరిస్థితుల్లో, రోగులు ఇబ్బంది పడకుండా వెంటనే వారిని సనత్ నగర్ టిమ్స్ ఆసుపత్రికి తరలించేలా ఏర్పాట్లు చేయాలని ఆదేశించారు.

డాక్టర్లు వైద్యంపైనే దృష్టి పెట్టాలి.. హౌస్ కీపింగ్ అవుట్‌సోర్సింగ్‌కు

ఆసుపత్రుల నిర్వహణ, పరిశుభ్రత విషయంలో సీఎం కీలక మార్పులకు శ్రీకారం చుట్టారు.

ఆసుపత్రుల్లో హౌస్ కీపింగ్ (Housekeeping) బాధ్యతలను పూర్తిగా అవుట్‌సోర్సింగ్ ఏజెన్సీలకు అప్పగించాలి.

పరిపాలనా పరమైన ఒత్తిడి లేకుండా, డాక్టర్లు పూర్తిగా రోగులకు వైద్యం అందించడంపైనే దృష్టి సారించేలా చూడాలి.

వైద్యులు, సిబ్బంది సమయపాలన, హాజరు (Attendance) విషయంలో ఆధునిక సాంకేతికతను వినియోగించాలి.

ఉస్మానియా నిర్మాణానికి డిసెంబర్ డెడ్‌లైన్.. నిధులకు కొరత లేదు

రాష్ట్రంలోని టిమ్స్ ఆసుపత్రులు, ప్రభుత్వ వైద్య కళాశాలల అభివృద్ధికి అదనంగా అవసరమైన నిధులను మంజూరు చేయడానికి ప్రభుత్వం సిద్ధంగా ఉందని సీఎం రేవంత్ రెడ్డి భరోసా ఇచ్చారు. అదేవిధంగా, డిసెంబర్ నాటికి కొత్త ఉస్మానియా ఆసుపత్రి నిర్మాణ పనులను పూర్తి చేయాలని అధికారులను ఆదేశించారు.