Jensen Huang Resigns Nvidia CEO | టెక్ ప్రపంచంలో పెను భూకంపం: ‘చైనా స్పై’ వివాదంతో ఎన్విడియా సీఈఓ జెన్సన్ హువాంగ్ రాజీనామా

Jensen Huang Resigns Nvidia CEO | త్రినేత్ర న్యూస్ : ఆర్టిఫిషియల్ ఇంటెలిజెన్స్ (AI) చిప్‌ల తయారీలో ప్రపంచ అగ్రగామిగా వెలుగొందుతున్న టెక్ దిగ్గజం ఎన్విడియా (Nvidia) లో పెను సంచలనం చోటుచేసుకుంది. కంపెనీ సహ వ్యవస్థాపకుడు, ప్రెసిడెంట్, సీఈఓ, బోర్డు సభ్యుడైన 63 ఏళ్ల జెన్సన్ హువాంగ్ (Jensen Huang) తన పదవులకు తక్షణమే రాజీనామా చేశారు. గురువారం ఎన్విడియా బోర్డు ఈ విషయాన్ని అధికారికంగా ప్రకటించింది.

రాజీనామాకు అసలు కారణం ఇదేనా?

'చైనా గూఢచారి' (China Spy) వివాదం జెన్సన్ హువాంగ్ మెడకు చుట్టుకున్నట్లు అంతర్జాతీయ మీడియా కథనాలు వెల్లడిస్తున్నాయి. తన కింద పనిచేసే (Subordinate) ఒక మహిళా ఉద్యోగితో హువాంగ్‌కు వివాహేతర సంబంధం ఉందని, ఆ మహిళకు చైనా నిఘా సంస్థలతో సంబంధాలు ఉన్నట్లు అమెరికా అధికారులు అనుమానిస్తున్నారని వార్తలు రావడంతో ఆయనపై తీవ్ర ఒత్తిడి పెరిగింది. ఈ నేపథ్యంలోనే ఆయన కంపెనీ సీఈఓ పదవితో పాటు బోర్డు సభ్యత్వానికి కూడా రాజీనామా చేయాల్సి వచ్చింది.

తాత్కాలిక సీఈఓగా కొలెట్ క్రెస్ (Colette Kress)

జెన్సన్ హువాంగ్ స్థానంలో ఎన్విడియా ఎగ్జిక్యూటివ్ వైస్ ప్రెసిడెంట్, చీఫ్ ఫైనాన్షియల్ ఆఫీసర్ (CFO) గా ఉన్న కొలెట్ క్రెస్ ను తాత్కాలిక సీఈఓగా బోర్డు నియమించింది. శాశ్వత సీఈఓ ఎంపిక పూర్తయ్యే వరకు ఆమె తన సీఎఫ్ఓ బాధ్యతలతో పాటు కంపెనీని నడిపించనున్నారు. కొత్త సీఈఓ కోసం సంస్థ లోపలి వారితో పాటు బయటి అభ్యర్థుల పేర్లను కూడా బోర్డు పరిశీలిస్తోంది.

2013 సెప్టెంబర్‌లో ఎన్విడియాలో చేరిన కొలెట్ క్రెస్, గత 13 ఏళ్లుగా కంపెనీ ఆర్థిక విభాగాన్ని సమర్థవంతంగా నడిపిస్తున్నారు. అంతకుముందు ఆమె సిస్కో (Cisco), మైక్రోసాఫ్ట్ (Microsoft) వంటి దిగ్గజ టెక్ కంపెనీల్లో దాదాపు 25 ఏళ్ల పాటు పనిచేశారు.

ఎన్విడియా బోర్డు తొలి ఛైర్మన్‌గా హార్వే సి. జోన్స్

ఈ నాయకత్వ మార్పులలో భాగంగా ఎన్విడియా బోర్డు మొట్టమొదటిసారిగా ఛైర్మన్ పదవిని ఏర్పాటు చేసి.. హార్వే సి. జోన్స్ (Harvey C. Jones) ను నియమించింది. 30 ఏళ్లకు పైగా టెక్, వెంచర్ ఇన్వెస్ట్‌మెంట్ అనుభవం ఉన్న ఆయన గతంలో సినాప్సిస్ (Synopsys) సీఈఓగా పనిచేశారు.

"కంపెనీ అసాధారణ వృద్ధిలో కొలెట్ కీలక పాత్ర పోషించారు. ఆమెకు మా వ్యాపారం, కస్టమర్లపై పూర్తి అవగాహన ఉంది. కంపెనీ కార్యకలాపాలు, ప్రొడక్ట్ రోడ్‌మ్యాప్‌లో ఎలాంటి ఆటంకం ఉండదు" అని హార్వే జోన్స్ భరోసా ఇచ్చారు.

నవంబర్ 17న ఫలితాల ప్రకటన యథాతథం

గత 33 ఏళ్లుగా జెన్సన్ హువాంగ్ నిర్మించిన బలమైన పునాదిపై కంపెనీని మరింత ముందుకు తీసుకెళ్తానని తాత్కాలిక సీఈఓ కొలెట్ క్రెస్ స్పష్టం చేశారు. జెన్సన్ హువాంగ్ టెక్ రంగానికి చేసిన సేవలకు బోర్డు కృతజ్ఞతలు తెలిపింది. కాగా, 2027 ఆర్థిక సంవత్సరం మూడో త్రైమాసిక (Q3) ఫలితాలను ముందుగా నిర్ణయించినట్లే నవంబర్ 17న ప్రకటిస్తామని ఎన్విడియా వెల్లడించింది.