Janasena Telangana | తెలంగాణలో జనసేన భారీ ప్రక్షాళన: పాత కమిటీలన్నీ రద్దు.. స్థానిక సంస్థలు, 2029 ఎన్నికలే లక్ష్యంగా కొత్త వ్యూహం!

Janasena Telangana | త్రినేత్ర న్యూస్ : తెలంగాణ రాజకీయాల్లో బలమైన శక్తిగా ఎదిగేందుకు జనసేన పార్టీ కీలక అడుగు వేసింది. రాబోయే స్థానిక సంస్థల ఎన్నికలు, 2029 సాధారణ ఎన్నికల్లో పూర్తిస్థాయిలో పోటీ చేసేందుకు వీలుగా రాష్ట్రంలో సంస్థాగత పునర్వ్యవస్థీకరణకు (Organizational Restructuring) శ్రీకారం చుట్టింది. ఇందులో భాగంగా జూన్ 2, 2026కు ముందు తెలంగాణలో నియమించిన అన్ని పాత కమిటీలు, ఇన్‌ఛార్జ్ పదవులను రద్దు చేస్తున్నట్లు జనసేన పార్టీ రాష్ట్ర కార్యాలయం అధికారికంగా ప్రకటించింది.

ఏయే పదవులు రద్దయ్యాయి? వేటికి మినహాయింపు?

తెలంగాణ రాష్ట్ర ముఖ్య నాయకులు మినహా.. జూన్ 2, 2026కు ముందు నియమితులైన కింది విభాగాల పదవులన్నింటినీ పార్టీ రద్దు చేసింది.

పార్లమెంట్, జిల్లా, అసెంబ్లీ నియోజకవర్గాల ఇన్‌ఛార్జ్ పదవులు.

జీహెచ్‌ఎంసీ (GHMC), ఇతర మున్సిపాలిటీలు, కార్పొరేషన్ల ఇన్‌ఛార్జ్ పదవులు, కమిటీలు.

పీవోసీ (Point of Contact), విద్యార్థి, యువజన, వీరమహిళ విభాగాల పదవులు.

పార్లమెంట్ కోఆర్డినేటర్లు, పట్టభద్రుల ఎమ్మెల్సీ ఓటరు నమోదు కోసం నియమించిన కోఆర్డినేటర్లు, పాత, కొత్త అడ్‌హక్ (Ad-hoc) కమిటీలు.

అయితే, జూన్ 2, 2026 తర్వాత ఏర్పాటైన తెలంగాణ రాష్ట్ర జాయినింగ్ కమిటీ, అధికార ప్రతినిధులు మాత్రం యథావిధిగా తమ బాధ్యతల్లో కొనసాగుతారని పార్టీ స్పష్టం చేసింది.

స్థానిక సంస్థలు, 2029 ఎన్నికలే టార్గెట్

పార్టీని కేవలం నామమాత్రపు పదవులు, హోదాలకే పరిమితం చేయకుండా.. ప్రజాక్షేత్రంలో నిరంతరం పోరాడే రాజకీయ శక్తిగా తీర్చిదిద్దడమే ఈ నిర్ణయం వెనుక ఉన్న ప్రధాన ఉద్దేశమని జనసేన తెలిపింది.

2029 సాధారణ ఎన్నికలతో పాటు, అంతకుముందే జరగనున్న GHMC, MMC, CMC, మున్సిపల్, కార్పొరేషన్, ZPTC, MPTC స్థానిక సంస్థల ఎన్నికలు, పట్టభద్రుల ఎమ్మెల్సీ ఎన్నికల్లో పార్టీ పూర్తిస్థాయిలో బరిలోకి దిగేందుకు సన్నద్ధమవుతోంది.

పనితీరు ఆధారంగానే కొత్త బాధ్యతలు

పాత పదవుల రద్దు అనేది పార్టీ కోసం కష్టపడిన వారి సేవలకు ముగింపు కాదని.. మరింత క్రమబద్ధమైన, జవాబుదారీతనంతో కూడిన కొత్త వ్యవస్థకు మార్గం సుగమం చేసే నిర్ణయమని పార్టీ పేర్కొంది.

జనసేన అధ్యక్షులు, ఏపీ ఉప ముఖ్యమంత్రి పవన్ కళ్యాణ్ ఆలోచనలు, భవిష్యత్ కార్యాచరణకు అనుగుణంగా అంచెలంచెలుగా కొత్త కమిటీలను ప్రకటించనున్నారు. అన్ని సామాజిక వర్గాలకు ప్రాతినిధ్యం కల్పిస్తూ.. యువత, విద్యార్థులు, మహిళలు, మేధావులకు ప్రత్యేక ప్రాధాన్యత ఇవ్వనున్నారు. క్షేత్రస్థాయిలో అంకితభావంతో పనిచేస్తున్న నాయకులు, జనసైనికులు, వీరమహిళల పనితీరు ఆధారంగా త్వరలోనే కొత్త బాధ్యతలు అప్పగించనున్నట్లు తెలంగాణ జనసేన కార్యాలయం వెల్లడించింది.