CM Revanth Reddy | హై స్పీడ్ రైళ్ల‌కు ఎలాంటి భూసేక‌ర‌ణ చేయ‌లేదు.. కేంద్రానికి సీఎం వివ‌ర‌ణ‌

CM Revanth Reddy | త్రినేత్ర న్యూస్ : హైదరాబాద్ - పుణె, హైదరాబాద్ - బెంగళూరు, హైదరాబాద్ - చెన్నై కారిడార్లకు సంబంధించి, కేంద్ర ప్ర‌భుత్వం పంపిన ప్ర‌తిపాద‌న‌ల‌పై రాష్ట్ర ప్ర‌భుత్వం స‌మీక్షించి, కొన్ని మార్పుల‌ను సూచిస్తూ కేంద్ర ప్ర‌భుత్వానికి ప్ర‌తిపాద‌న‌లు పంపింద‌ని సీఎం రేవంత్ రెడ్డి తెలిపారు. ఈ మూడు కారిడార్ల‌కు సంబంధించి రాష్ట్ర ప్ర‌భుత్వం ఎటువంటి భూ సేక‌ర‌ణ ప్ర‌క్రియ‌ను ప్రారంభించ‌లేద‌ని కేంద్ర మంత్రికి వివరించారు. కేంద్ర ప్ర‌భుత్వం అలైన్‌మెంట్ ఆమోదించిన త‌ర్వాత భూ సేక‌ర‌ణ‌ను ప్రారంభిస్తామ‌ని స్ప‌ష్టం చేశారు. సాధ్య‌మైనంత త్వ‌ర‌గా అలైన్‌మెంట్ ప్ర‌క్రియ‌ను పూర్తి చేయాల‌ని విజ్ఞ‌ప్తి చేశారు.

ముఖ్యమంత్రి రేవంత్ రెడ్డి ఢిల్లీ రైలు భ‌వ‌న్‌లో అశ్వినీ వైష్ణ‌వ్‌తో భేటీ అయ్యారు. ఈ సంద‌ర్భంగా తెలంగాణ అభివృద్ధికి అవ‌స‌ర‌మైన కీల‌క రైలు ప్రాజెక్టుల‌పై చ‌ర్చించారు. వికారాబాద్ – కృష్ణా కొత్త రైలు మార్గాన్ని (130 కి.మీ) వెంట‌నే మంజూరు చేయాల‌ని కోరారు. వికారాబాద్ జిల్లా టేకల్‌కోడ్ పరిసరాల్లో భారీ సున్నపురాయి నిక్షేపాలు బయటపడ్డాయని, దీంతో ఈ ప్రాంతాన్ని సిమెంట్, టెక్స్‌టైల్ హబ్‌గా మార్చేందుకు ప్రభుత్వం ప్రణాళికలు సిద్ధం చేసిందని కేంద్ర మంత్రికి వివరించారు. హైద‌రాబాద్ చుట్టూ సుమారు 360 కి.మీ మేర నిర్మిస్తున్న రీజినల్ రింగ్ రోడ్డు ప‌క్క‌నే రీజినల్ రింగ్ రైలుకు కూడా అలైన్‌మెంట్ చేయాల‌ని ముఖ్యమంత్రి కోరారు. రీజిన‌ల్ రింగ్‌ రైలుతో పెద్ద ఎత్తున ఉపాధి అవకాశాలు లభిస్తాయన్నారు.

డోర్నకల్- గద్వాల్‌, కల్వకుర్తి – మాచర్ల, కాచిగూడ –జగ్గయ్యపేట (250 కి.మీ.), పటాన్‌చెరు – ఆదిలాబాద్ (320 కి.మీ.), బోధన్ – లాతూర్ (175 కి.మీ.), అక్కన్నపేట బైపాస్ లైన్ (8 కి.మీ.) మార్గాల‌ను వెంట‌నే మంజూరు చేయాల‌ని మరోసారి విజ్ఞ‌ప్తి చేశారు. దక్షిణ మధ్య రైల్వే ప్రతిష్టాత్మకంగా చేపట్టదలచిన మెగా కోచింగ్, ఫ్రైట్ మెయింటెనెన్స్ డిపోను మహబూబాబాద్ స‌మీప అనంతారం గ్రామంలో ఏర్పాటు చేయాల‌ని అశ్వినీ వైష్ణవ్‌ను కోరారు. ఈ డిపో ఏర్పాటుకు అవ‌స‌ర‌మైన‌ 409.1 ఎకరాల భూమిని రైల్వే శాఖ‌కు అప్పగించేందుకు ఇప్ప‌టికే అంగీక‌రించిన విష‌యాన్ని గుర్తుచేస్తూ, మెగా ఫ్రైట్ మెయింటెనెన్స్ డిపోకు త్వరగా అనుమతులు మంజూరు చేయాలని కోరారు.

ఈ స‌మావేశంలో మంత్రి వివేక్ వెంక‌ట‌స్వామి, ఎంపీలు అనిల్ కుమార్ యాద‌వ్, వేం న‌రేంద‌ర్ రెడ్డి, మ‌ల్లు ర‌వి, బ‌ల‌రాం నాయ‌క్, కిర‌ణ్ కుమార్ చామ‌ల‌, వంశీ గ‌డ్డం, ఢిల్లీలో రాష్ట్ర ప్ర‌భుత్వ ప్ర‌త్యేక ప్ర‌తినిధి ఏపీ జితేంద‌ర్ రెడ్డితో పాటు ఉన్నతాధికారులు పాల్గొన్నారు.