Helicopter Accident | హెలికాప్ట‌ర్ కూలిన ఘ‌ట‌న‌లో ఆరుగురి మృతి

Helicopter Accident | ఉత్త‌రాఖండ్‌లో హెలికాప్ట‌ర్ కూలిన ఘ‌ట‌న‌లో ఆరుగురు మృత్యువాత ప‌డ్డారు. బద్రీనాథ్‌ను దర్శించుకుని తిరిగి డెహ్రాడూన్‌ వెళ్తుండగా ట్రాన్స్ భారత్‌ ఏవియేషన్‌కు చెందిన ఓ హెలికాప్టర్ ప్రమాదానికి గురైంది. ఉత్తరాఖండ్‌లోని చమోలి జిల్లా జోషిమఠ్‌ - బద్రీనాథ్ మార్గంలో జోషిమఠ్ సమీపంలోని చాయీ గ్రామం వద్ద ఈ హెలికాప్టర్ రాడార్‌తో సంబంధాలు కోల్పోయింది. ప్రమాద సమయంలో హెలికాప్టర్‌లో పైలట్‌తో పాటు మ‌రో ఐదుగురు ప్రయాణికులు ఉన్నారు. ఒకవైపు దట్టమైన మంచు, మరోవైపు భారీ వర్షం కురుస్తుండటమే ఈ ప్రమాదానికి ప్రధాన కారణమైనట్లు ప్రాథమికంగా భావిస్తున్నారు. మధ్యాహ్నం 2.15 గంటల సమయంలో బద్రీనాథ్‌ నుంచి బయలుదేరిన కొద్దిసేపటికే ఈ ఘటన సంభ‌వించింది. ప్రమాదంపై సమాచారం అందుకున్న రాష్ట్ర సహాయక బృందాలు, ఆర్మీ ఘటనా స్థలానికి చేరుకుని గాలింపు చర్యలను చేప‌ట్టాయి. జిల్లా యంత్రాంగం, విపత్తు నిర్వహణ శాఖ, ఎస్డీఆర్ఎఫ్ సంయుక్తంగా నిర్వ‌హించిన చ‌ర్య‌ల్లో జేపీ ప‌వ‌ర్ హౌజ్ మార్గంలోని ప‌ర్వ‌త ప్రాంతంలో హెలికాప్ట‌ర్ శ‌క‌లాల‌ను గుర్తించారు. మృతి చెందిన అయిదుగురు ప‌ర్యాట‌కులు క‌ర్ణాట‌క‌కు చెందిన వారు.