CM Revanth Reddy Vikarabad Visit | సోమవారం వికారాబాద్‌కు సీఎం రేవంత్, రాహుల్ గాంధీ: టూర్ షెడ్యూల్ ఇదే..!

CM Revanth Reddy Vikarabad Visit | తెలంగాణ ముఖ్యమంత్రి ఎనుముల రేవంత్ రెడ్డి సోమవారం, మార్చి 2, 2026న వికారాబాద్ జిల్లాలో పర్యటించనున్నారు. ఈ పర్యటనలో ఆయనతో పాటు లోక్‌సభ ప్రతిపక్ష నేత, కాంగ్రెస్ అగ్రనేత రాహుల్ గాంధీ కూడా పాల్గొననున్నారు. వికారాబాద్‌ జిల్లా అనంతగిరి హిల్స్‌ వేదికగా జరుగుతున్న ఆంధ్రప్రదేశ్, తెలంగాణ రాష్ట్రాల జిల్లా కాంగ్రెస్ కమిటీ (DCC) అధ్యక్షుల శిక్షణా తరగతుల ముగింపు కార్యక్రమానికి వీరు ముఖ్య అతిథులుగా హాజరుకానున్నారు.

సీఎం రేవంత్ రెడ్డి, రాహుల్ గాంధీల పర్యటన షెడ్యూల్ ఇదే

ఉదయం 8.45 గంటలకు సీఎం రేవంత్ రెడ్డి తన నివాసం నుంచి రోడ్డు మార్గాన శంషాబాద్‌లోని రాజీవ్ గాంధీ అంతర్జాతీయ విమానాశ్రయానికి (RGIA) బయలుదేరుతారు. ఉదయం 9.15 నుంచి 9.30 గంటల మధ్య శంషాబాద్ విమానాశ్రయానికి చేరుకోనున్న రాహుల్ గాంధీకి ముఖ్యమంత్రి రేవంత్ రెడ్డి ఘన స్వాగతం పలుకుతారు. ఉదయం 9.40 గంటలకు ఇద్దరు నేతలు శంషాబాద్ నుంచి హెలికాప్టర్ ద్వారా వికారాబాద్‌కు పయనం అవుతారు. ఉదయం 10.00 గంటలకు వికారాబాద్‌లోని ఎస్ఏపీ (SAP) ఆర్ట్స్, సైన్స్ అండ్ కామర్స్ కళాశాలలో ఏర్పాటు చేసిన హెలీప్యాడ్‌కు చేరుకుంటారు.

అక్కడి నుంచి ఉదయం 10.15 గంటలకు రోడ్డు మార్గాన బయలుదేరి అనంతగిరి హిల్స్‌లోని హరిత వ్యాలీ రిసార్ట్స్‌కు చేరుకుంటారు. ఉదయం 10.30 గంటల నుంచి సాయంత్రం 4.20 గంటల వరకు ఏపీ, తెలంగాణ డీసీసీ అధ్యక్షుల శిక్షణా ముగింపు కార్యక్రమంలో రాహుల్ గాంధీ, సీఎం రేవంత్ పాల్గొని దిశానిర్దేశం చేస్తారు. సాయంత్రం 4.20 గంటలకు తిరిగి హరిత రిసార్ట్స్ నుంచి బయలుదేరి ఎస్ఏపీ కళాశాల హెలీప్యాడ్‌కు చేరుకుంటారు. సాయంత్రం 4.30 గంటలకు హెలికాప్టర్ ద్వారా తిరిగి శంషాబాద్ విమానాశ్రయానికి పయనమై, 4.50 గంటలకు చేరుకుంటారు. అక్కడి నుంచి సీఎం జూబ్లీహిల్స్‌లోని తన నివాసానికి చేరుకుంటారు. ముఖ్యమంత్రికి 'జెడ్ ప్లస్' (Z Plus) కేటగిరీ భద్రత ఉన్న నేపథ్యంలో, పోలీసు యంత్రాంగం, జిల్లా అధికారులు వికారాబాద్‌లో పటిష్ట బందోబస్తు, తగిన ఏర్పాట్లు చేస్తున్నారు.