KTR | కాంగ్రెస్ స‌ర్కార్ వైఫ‌ల్యం వ‌ల్లే రిమ్స్‌లో అగ్నిప్ర‌మాదం

చిన్నారుల మృతి అత్యంత బాధాక‌ర‌మ‌న్న కేటీఆర్

KTR | త్రినేత్ర‌.న్యూస్ : ఆదిలాబాద్ జిల్లా రిమ్స్ ఆస్ప‌త్రిలో అగ్నిప్ర‌మాద ఘ‌ట‌న‌పై బీఆర్ఎస్ వ‌ర్కింగ్ ప్రెసిడెంట్ కేటీఆర్ స్పందించారు. కాంగ్రెస్ స‌ర్కార్ ఘోర వైఫ‌ల్యం వ‌ల్లే అగ్నిప్ర‌మాదం జ‌రిగింద‌న్నారు. విద్యుత్ షాక్‌తో ముగ్గురు చిన్నారులు మృతి చెంద‌డం అత్యంత బాధాక‌ర‌మ‌ని ఆయ‌న పేర్కొన్నారు.

గాయ‌ప‌డ్డ 23 మంది పిల్ల‌ల‌కు మెరుగైన చికిత్స అందించాల‌ని, వారి ప్రాణాల‌ను కాపాడాల‌ని కేటీఆర్ అన్నారు. రేవంత్ స‌ర్కార్ వైఫ‌ల్యం వ‌ల్లే ఇంత పెద్ద ప్ర‌మాదం జ‌రిగి, అభం శుభం తెలియ‌ని పిల్ల‌లు అన్యాయంగా బ‌లైపోయార‌ని ఆవేద‌న వ్య‌క్తం చేశారు.

ముఖ్యమంత్రిగా బాధ్యతలు చేపట్టిన నాటినుంచి ప్రభుత్వ వైద్య రంగాన్ని పూర్తిగా విధ్వంసం చేసిన సీఎం రేవంత్ రెడ్డే ఈ సంఘటనకు పూర్తి బాధ్యత వహించాలి. రిమ్స్ ఆసుపత్రిలో నెలకొన్న దుస్థితులపై అనేకసార్లు బీఆర్ఎస్ జిల్లా నేతలు ప్రభుత్వాన్ని హెచ్చరించినా మొద్దునిద్ర పోయిన రేవంత్ సర్కారులో కనీస చలనం కనిపించలేదు. అత్యంత పకడ్బందీ చర్యలు తీసుకోవాల్సిన పిల్లల వార్డులో ప్రభుత్వ పర్యవేక్షణ పూర్తిగా లోపించడం, కనీస నిర్వహణ లేకపోవడం వల్లే ఈ దురదృష్టకర సంఘటన చోటుచేసుకుంది అని కేటీఆర్ పేర్కొన్నారు.

ఆదిలాబాద్ రిమ్స్‌తో పాటు రాష్ట్రవ్యాప్తంగా ఉన్న అన్ని ప్రభుత్వ ఆసుపత్రుల్లోని పిల్లల వార్డులు, ఐసీయూలను నిపుణులతో తనిఖీ చేయించి ఇలాంటి సంఘటనలు జరగకుండా పటిష్టమైన చర్యలు తీసుకోవాలి. రేవంత్ సర్కారు చేతకానితనం వల్ల తమ పసిపిల్లలను కోల్పోయి పుట్టెడు దుఃఖంలో ఉన్న బాధిత కుటుంబాలకు రూ. 25 లక్షల చొప్పున ఎక్స్ గ్రేషియా చెల్లించి ఆదుకోవాలని బీఆర్ఎస్ పక్షాన డిమాండ్ చేస్తున్నాం అని కేటీఆర్ పేర్కొన్నారు.