Mahabubabad mega Freight Maintenance Depot | మహబూబాబాద్ ‘మెగా రైల్వే డిపో’ పనులు వెంటనే ప్రారంభించండి: కేంద్ర మంత్రికి బీఆర్ఎస్ ఎంపీల వినతి

Mahabubabad mega Freight Maintenance Depot | త్రినేత్ర.న్యూస్ : తెలంగాణలోని మహబూబాబాద్‌కు మంజూరైన ప్రతిష్టాత్మక 'మెగా ఫ్రైట్ మెయింటెనెన్స్ డిపో' (Mega Freight Maintenance Depot) నిర్మాణ పనులను తక్షణమే ప్రారంభించాలని బీఆర్ఎస్ ఎంపీల బృందం కేంద్ర ప్రభుత్వాన్ని కోరింది. బుధవారం సాయంత్రం పార్లమెంటులోని ఛాంబర్‌లో కేంద్ర రైల్వే శాఖ మంత్రి అశ్వినీ వైష్ణవ్‌ను బీఆర్ఎస్ పార్లమెంటరీ పార్టీ డిప్యూటీ లీడర్ (రాజ్యసభ) వద్దిరాజు రవిచంద్ర ఆధ్వర్యంలో ఎంపీలు కేఆర్ సురేష్ రెడ్డి, దీవకొండ దామోదర్ రావు, డాక్టర్ బండి పార్థసారథి రెడ్డి, అలాగే మాజీ ఎమ్మెల్యే శంకర్ నాయక్ తదితరులు కలిశారు. ఈ మేరకు ప్రాజెక్టును వేగవంతం చేయాలని కోరుతూ మంత్రికి ఒక వినతిపత్రం అందజేశారు.

రూ.908 కోట్లతో ప్రాజెక్టు.. 409 ఎకరాల భూమి సిద్ధం

దక్షిణ మధ్య రైల్వే (SCR) పరిధిలో వరంగల్ - మహబూబాబాద్ సెక్షన్‌లో ఈ ప్రాజెక్టు అత్యంత కీలకమైనదని ఎంపీలు మంత్రి దృష్టికి తీసుకెళ్లారు. రైల్వే అంబ్రెల్లా వర్క్ కింద సుమారు రూ.908.15 కోట్ల భారీ బడ్జెట్‌తో కేంద్రం ఈ ప్రాజెక్టును అధికారికంగా మంజూరు చేసింది. ఈ బృహత్తర ప్రాజెక్టు కోసం తెలంగాణ ప్రభుత్వం ఇప్పటికే మహబూబాబాద్ జిల్లా అనంతారంలో 409.01 ఎకరాల భూమిని ఉచితంగా కేటాయించేందుకు చర్యలు చేపట్టిందని ఎంపీ వద్దిరాజు రవిచంద్ర వివరించారు. కొండలు, మైదాన ప్రాంతాలతో కూడిన ఈ స్థలం భారీ మౌలిక సదుపాయాలకు అత్యంత అనుకూలంగా ఉంటుందని తెలిపారు.

ఆగని నిరీక్షణ.. క్షేత్రస్థాయిలో కదలని పనులు

భూమి కేటాయింపు ప్రక్రియను రాష్ట్ర ప్రభుత్వం డిసెంబర్ 2025 నాటికి అధికారికంగా పూర్తి చేయనున్నప్పటికీ, అనంతారం సైట్‌లో క్షేత్రస్థాయి పనులు మాత్రం ప్రణాళికా దశలోనే స్తంభించిపోయాయని ఎంపీలు ఆందోళన వ్యక్తం చేశారు. ఫ్రైట్ రోలింగ్ స్టాక్ పీరియాడిక్ ఓవర్‌హాలింగ్, సిక్ లైన్ రైలు తనిఖీ వంటి కీలక సేవలు అందించే ఈ డిపో.. భారతీయ రైల్వేకు వ్యూహాత్మకంగా ఎంతో అవసరమని గుర్తుచేశారు.

ఉపాధి అవకాశాలపై దెబ్బ

ప్రధానమంత్రి 'గతి శక్తి' జాతీయ మాస్టర్ ప్లాన్‌కు అనుగుణంగా ఉన్న ఈ ప్రాజెక్టును త్వరితగతిన పూర్తి చేస్తే.. రద్దీగా ఉండే ఈ కారిడార్‌లో సరుకు రవాణా వాహనాలకు నిరాటంకమైన నిర్వహణ అందుబాటులోకి వస్తుందని ఎంపీలు పేర్కొన్నారు. పనుల్లో జాప్యం కారణంగా మహబూబాబాద్ పరిసర ప్రాంతాల యువతకు దక్కాల్సిన ప్రత్యక్ష, పరోక్ష ఉపాధి అవకాశాలు దూరమవుతున్నాయని ఎంపీ రవిచంద్ర ఆవేదన వ్యక్తం చేశారు.

తెలంగాణ ప్రజలు, ముఖ్యంగా మహబూబాబాద్ వాసులు ఈ ప్రాజెక్టును అభివృద్ధికి చిహ్నంగా భావిస్తున్నారని, తక్షణమే పెండింగ్‌లో ఉన్న పరిపాలనా అనుమతులను మంజూరు చేయాలని రైల్వే మంత్రిని కోరారు. ఎటువంటి జాప్యం లేకుండా పునాది పనులు ప్రారంభించేలా రైల్వే బోర్డును, దక్షిణ మధ్య రైల్వే జనరల్ మేనేజర్‌ను ఆదేశించాలని బీఆర్ఎస్ నేతలు విజ్ఞప్తి చేశారు.