Sheep | బీబీన‌గ‌ర్‌లో విషాదం.. రైలు ఢీకొని సుమారు 100 గొర్రెలు మృతి

Sheep | త్రినేత్ర న్యూస్‌: యాదాద్రి భువ‌న‌గిరి జిల్లా బీబీ న‌గ‌ర్ (Bibinagar) మండ‌లం కొండ‌మ‌డుగుమెట్టు వద్ద తీవ్ర విషాదం చోటుచేసుకుంది. రైలు ఢీకొని సుమారు 100 గొర్రెలు (Sheep) మృతిచెందాయి. జిల్లాలోని జూలూరు అలీన‌గ‌ర్‌కు చెందిన గొర్రెల కాప‌రులు త‌మ గొర్రెల‌ను మేపుతూ కొండ‌మ‌డుగుమెట్టు స‌పంలో సేద‌తీరుతున్నారు. ఈ క్ర‌మంలో మంగ‌ళ‌వారం తెల్ల‌వారుజామున గొర్రెలు రైల్వే పట్టాల‌పైకి వెళ్లాయి. ఈ క్ర‌మంలో అటుగా వ‌చ్చిన‌ రైలు (Train) వాటిని ఢీకొట్టింది. దీంతో సుమారు 80 నుంచి 100 గొర్రెలు మృతిచెందాయ‌ని కాప‌రులు క‌న్నీరు మున్నీర‌వుతున్నారు.

కాజీపేట నుంచి నాంప‌ల్లి వెళ్తున్న ద‌క్షిణ్ ఎక్స్‌ప్రెస్ (Dakshin Express) వాటిని ఢీకొట్టి ఉండ‌వ‌చ్చ‌ని అనుమానం వ్య‌క్తం చేస్తున్నారు. గొర్రెలపైనే ఆధారపడి జీవనం సాగిస్తున్న తమకు తీవ్ర నష్టం వాటిల్లిందని ఆవేదన చెందుతున్నారు. ప్రభుత్వం తమను ఆదుకోవాలని వేడుకుంటున్నారు. విష‌యం తెలుసుకున్న రైల్వే అధికారులు, పోలీసులు ఘ‌ట‌నా స్థ‌లానికి చేరుకుని ప‌రిశీలిస్తున్నారు. ఈ ఘ‌ట‌న‌పై కేసు న‌మోదుచేసి ద‌ర్యాప్తు చేస్తున్నారు. దీనికి సంబంధించి పూర్తి వివరాలు తెలియాల్సి ఉంది.