Vikarabad | అండర్‌-19 జట్టుకు ఎంపికైనా.. అంతలోనే విషాదం!

• యువ క్రికెట‌ర్ నందిని ఆత్మ‌హ‌త్య‌.. వికారాబాద్‌లో విషాదం..
• ప్రేమ పేరుతో వేధించారంటూ కుటుంబ సభ్యుల ఆరోపణ

Vikarabad | క్రికెట్‌లో దేశానికి ప్రాతినిధ్యం వహించాలన్న కల.. ప్రతిభతో బీసీసీఐ అండర్‌-19 జట్టులో చోటు.. అంతలోనే ఊహించని విషాదం. ఆకతాయిల వేధింపుల కారణంగా వికారాబాద్‌ జిల్లాకు చెందిన 17 ఏళ్ల యువ క్రికెటర్‌ నందిని ప్రాణాలు కోల్పోయింది. శుక్రవారం ఇంట్లో ఎవరూ లేని సమయంలో ఆత్మహత్యకు పాల్పడడంతో కుటుంబంలో తీరని విషాదం నెలకొంది. యాలాల మండలం సంగయ్యపల్లికి చెందిన నందిని వికారాబాద్‌ పట్టణంలోని అమ్మమ్మ ఇంట్లో ఉంటూ క్రికెట్‌లో శిక్షణ పొందుతోంది. ఆటలో తన ప్రతిభతో గుర్తింపు తెచ్చుకున్న ఆమె ఇటీవలే బీసీసీఐ అండర్‌-19 జట్టుకు ఎంపికైంది. ఉన్నత లక్ష్యాలతో ముందుకు సాగుతున్న సమయంలో ఈ విషాద ఘటన చోటుచేసుకోవడం స్థానికంగా కలకలం రేపింది.

వేధింపులే కారణమంటూ కుటుంబం ఆరోపణ

ఇద్దరు విద్యార్థుల వేధింపులే నందిని మృతికి కారణమని ఆమె తల్లిదండ్రులు, బంధువులు ఆరోపిస్తున్నారు. ప్రేమ పేరుతో ఓ యువకుడు కొంతకాలంగా నందినిని మానసికంగా వేధిస్తున్నాడని, మరో విద్యార్థి కృష్ణ అతడికి సహకరిస్తూ ఇబ్బందులకు గురిచేశాడని కుటుంబ సభ్యులు ఆవేదన వ్యక్తం చేస్తున్నారు. ఈ వేధింపుల కారణంగానే తమ కుమార్తె తీవ్ర మనస్తాపానికి గురైందని కన్నీరుమున్నీరవుతున్నారు. క్రికెట్‌లో ఉన్నత శిఖరాలను అధిరోహించాల్సిన యువ క్రీడాకారిణి అర్ధంతరంగా తనువు చాలించడంతో కుటుంబ సభ్యులు, స్థానికులు విషాదంలో మునిగిపోయారు. వేధింపులపై కుటుంబ సభ్యులు చేసిన ఆరోపణల నేపథ్యంలో ఘటనకు గల పూర్తి కారణాలు దర్యాప్తులో తేలాల్సి ఉంది.