Karthika Brahmotsavam | అరుణాచ‌ల క్షేత్రానికి కార్తీక శోభ‌.. నేటి నుంచి బ్ర‌హ్మోత్స‌వాలు

Karthika Brahmotsavam | అగ్నిలింగ స్వరూపుడైన పరమశివుని దివ్యక్షేత్రం అరుణాచలం కార్తీక మాస బ్రహ్మోత్సవాలకు ముస్తాబైంది. తమిళనాడులోని తిరువణ్ణామలైలో కొలువైన అరుణాచలేశ్వర స్వామివారి ఆలయంలో నేటి (నవంబర్‌ 15) నుంచి బ్రహ్మోత్సవాలు ప్రారంభం కానున్నాయి. పది రోజుల పాటు అత్యంత వైభవంగా జరిగే ఈ ఉత్సవాలు 24న నిర్వహించే మహాదీపోత్సవంతో పరాకాష్ఠకు చేరుకోనున్నాయి. ఈ సందర్భంగా ఆలయంలో ప్రత్యేక పూజలు, వాహన సేవలు, స్వామివారి ఊరేగింపులు నిర్వహించనున్నారు. దేశవ్యాప్తంగా పెద్ద సంఖ్యలో భక్తులు తరలివచ్చి అరుణాచలేశ్వరుడిని దర్శించుకోనున్నారు.

అగ్నిలింగంగా అరుణాచలేశ్వరుడు

పంచభూత క్షేత్రాల్లో అరుణాచలం అగ్ని తత్త్వానికి ప్రతీకగా ప్రసిద్ధి చెందింది. ఇక్కడ పరమశివుడు అరుణాచలేశ్వరుడిగా, అమ్మవారు అపీతకుచాంబిక (ఉన్నాములై అమ్మన్‌)గా భక్తులకు దర్శనమిస్తారు. 'అరుణం' అంటే ఎర్రని కాంతి, 'అచలం' అంటే కదలని పర్వతం. అగ్నిజ్యోతి స్వరూపుడైన పరమశివుడు పర్వత రూపంలో వెలసిన క్షేత్రం కావడంతో అరుణాచలానికి విశేష ప్రాధాన్యత ఉంది. ఇక్కడి పర్వతాన్నే సాక్షాత్తూ శివస్వరూపంగా భావించి భక్తులు పూజిస్తారు.

అంతులేని జ్యోతిస్తంభంగా శివుడు

పురాణాల ప్రకారం.. ఒకానొక సమయంలో బ్రహ్మదేవుడు, శ్రీమహావిష్ణువు తమలో ఎవరు గొప్పవారనే విషయంపై వాదించుకున్నారు. వారిలోని అహంకారాన్ని తొలగించేందుకు పరమశివుడు అంతులేని అగ్నిస్తంభంగా ఆవిర్భవించాడు. ఆ జ్యోతిస్తంభం ఆది, అంతాలను కనుగొనాలని బ్రహ్మ హంస రూపంలో పైభాగానికి, విష్ణువు వరాహ రూపంలో అడుగుభాగానికి అన్వేషణ సాగించారు. ఎంత ప్రయత్నించినా ఇద్దరికీ ఆ జ్యోతిస్థంభం చివరలు కనిపించలేదు. విష్ణువు తన వైఫల్యాన్ని అంగీకరించగా, బ్రహ్మ అసత్యం పలికినట్లు పురాణ గాథ చెబుతుంది. అనంతరం శివుడు తన అనంతమైన తత్త్వాన్ని ప్రకటించి, భక్తుల కోరిక మేరకు జ్యోతిస్తంభం పర్వత రూపంలో వెలిశాడని అరుణాచల క్షేత్ర మహాత్మ్యం వివరిస్తుంది.

అర్ధనారీశ్వరుడిగా దివ్యదర్శనం

అరుణాచల క్షేత్ర పురాణంలో పార్వతీ పరమేశ్వరుల దివ్య కల్యాణ గాథకు కూడా ప్రత్యేక స్థానం ఉంది. కైలాసంలో పార్వతీదేవి సరదాగా శివుని నేత్రాలను మూయడంతో లోకమంతా అంధకారంలో మునిగిపోయిందని పురాణ కథనం. ఈ సంఘటనకు ప్రాయశ్చిత్తంగా అమ్మవారు భూలోకానికి వచ్చి తిరువణ్ణామలైలో తపస్సు ఆచరించారు. ఆమె తపస్సుకు మెచ్చిన పరమశివుడు కార్తీక పౌర్ణమి నాడు జ్యోతిస్వరూపంలో దర్శనమిచ్చి తన శరీరంలో ఎడమ భాగాన్ని పార్వతీదేవికి ప్రసాదించాడు. అలా అర్ధనారీశ్వర స్వరూపం ఆవిర్భవించిందని క్షేత్ర పురాణం చెబుతుంది. శివశక్తులు విడదీయరానివనే పరమార్థాన్ని ఈ స్వరూపం చాటుతుంది.

వైభవంగా పది రోజుల ఉత్సవాలు

బ్రహ్మోత్సవాల్లో భాగంగా నవంబర్‌ 15న ధ్వజారోహణంతో ఉత్సవాలకు శ్రీకారం చుట్టనున్నారు. ధ్వజస్తంభంపై పవిత్ర పతాకాన్ని ఎగురవేయడం ద్వారా స‌క‌ల‌ దేవతలు, ఋషులు, భక్తులను ఉత్సవాలకు ఆహ్వానించినట్లుగా భావిస్తారు. అనంతరం పది రోజుల పాటు ఉదయం, రాత్రి వేళల్లో వివిధ వాహన సేవలు నిర్వహిస్తారు. గణపతి, సింహం, కామధేనువు, రిషభం, కైలాసం తదితర వాహనాలపై ఉత్సవమూర్తులను ఊరేగిస్తారు. ప్రతి వాహన సేవకు ప్రత్యేక ఆధ్యాత్మిక ప్రాధాన్యత ఉంది. ఈ సేవల ద్వారా స్వామివారి వివిధ దివ్య రూపాలను భక్తులు దర్శించుకునే అవకాశం కలుగుతుంది. ఉత్సవాల వారంలో రథోత్సవం కూడా నిర్వహించనున్నారు.

 

24న భరణి దీపం.. మహాదీపం

బ్రహ్మోత్సవాల్లో అత్యంత కీలకమైన ఘట్టం నవంబర్‌ 24న జరగనుంది. ఆరోజు తెల్లవారుజామున ఆలయ గర్భగుడిలో భరణి దీపాన్ని వెలిగిస్తారు. సాయంత్రం సుమారు 6 గంటల సమయంలో అర్ధనారీశ్వర స్వామివారి దివ్యదర్శనం అనంతరం అరుణాచల పర్వత శిఖరంపై కార్తీక పౌర్ణ‌మి సంద‌ర్భంగా మహాదీపాన్ని వెలిగిస్తారు. పర్వత శిఖరంపై జ్యోతిరూపంలో వెలిగే మహాదీపాన్ని దర్శించుకోవడానికి లక్షలాది మంది భక్తులు తరలివస్తారు. అరుణాచలేశ్వరుడే అనంత జ్యోతిస్వరూపుడనే విశ్వాసంతో భక్తులు మహాదీపానికి నమస్కరిస్తారు. అనంతరం కూడా మహాదీపం కొన్ని రోజుల పాటు వెలుగుతూ ఉంటుంది. తదుపరి రోజుల్లో తెప్పోత్సవం నిర్వహించనున్నారు.

గిరిప్రదక్షిణకు విశేష ప్రాధాన్యం

అరుణాచలంలో బ్రహ్మోత్సవాలు, కార్తీక దీపోత్సవం సందర్భంగా గిరిప్రదక్షిణకు ఎంతో ప్రాధాన్యం ఉంది. సుమారు 14 కిలోమీటర్ల మేర విస్తరించిన పవిత్ర అరుణాచల పర్వతం చుట్టూ భక్తులు ప్రదక్షిణ చేస్తారు. పర్వతమే పరమశివుని స్వరూపమనే నమ్మకంతో శివనామస్మరణ చేస్తూ గిరివలం నిర్వహిస్తారు. కార్తీక పౌర్ణమి, మహాదీపోత్సవం వేళ ఈ ప్రాంతం భక్తజన సంద్రంగా మార‌నుంది.

Arunachalam Temple