YouTube Premium | యూట్యూబ్ ప్రీమియంలో కొత్త ఫీచర్లు.. పోడ్‌కాస్ట్‌లకు బిగ్ అప్‌గ్రేడ్..

YouTube Premium | యూట్యూబ్ తన ప్రీమియం వినియోగదారుల కోసం పోడ్‌కాస్ట్ అనుభవాన్ని మరింత మెరుగుపరచే కొత్త ఫీచర్లను విడుదల చేస్తోంది. ఈ అప్‌డేట్ ద్వారా ప్లేబ్యాక్ నియంత్రణ, వినికిడి సామర్థ్యం, పోడ్‌కాస్ట్ డిస్కవరీ మరింత సులభంగా మారనున్నాయి. యూట్యూబ్ పోడ్‌కాస్ట్స్ ప్రొడక్ట్ లీడ్ స్టీవ్ మెక్‌లెండన్ తెలిపిన ప్రకారం పోడ్‌కాస్ట్‌లు ప్రస్తుతం ప్లాట్‌ఫామ్‌పై ప్రపంచవ్యాప్తంగా భారీ ఆదరణ పొందుతున్నాయి. ప్రస్తుతం యూట్యూబ్‌లో ప్రపంచవ్యాప్తంగా నెలకు 1 బిలియన్‌కు పైగా యాక్టివ్ వ్యూయర్లు పోడ్‌కాస్ట్‌లను వీక్షిస్తున్నారు. ప్రీమియం వినియోగదారులు పోడ్‌కాస్ట్‌లకు ప్రధాన ప్రేక్షకులుగా ఉన్నారని యూట్యూబ్ వెల్లడించింది. సంస్థ అంతర్గత డేటా ప్రకారం 2026 ఏప్రిల్ నెలలో యూట్యూబ్ ప్రీమియం వినియోగదారులు (ట్రయల్ యూజర్లతో సహా) ప్రపంచవ్యాప్తంగా 800 మిలియన్ గంటలకు పైగా పోడ్‌కాస్ట్‌లను వీక్షించారు. ఇప్పటికే యూట్యూబ్ ప్రీమియంలో బ్యాక్‌గ్రౌండ్ ప్లే, జంప్ అహెడ్, వేగవంతమైన ప్లేబ్యాక్ స్పీడ్స్ వంటి ఫీచర్లు అందుబాటులో ఉన్నాయి. తాజాగా ప్రకటించిన అప్‌డేట్లు ఈ ఫీచర్లను మరింత విస్తరించేలా అందుబాటులోకి వ‌స్తున్నాయి.

ఆన్-ది-గో మోడ్..

ఆన్-ది-గో మోడ్ ను ప్రయాణాలు లేదా ఇతర పనులు చేస్తూనే పోడ్‌కాస్ట్‌లను వినే వినియోగదారులను దృష్టిలో ఉంచుకుని రూపొందించారు. ఈ ఫీచర్ కమ్యూటింగ్, రన్నింగ్ వంటి వాస్తవ పరిస్థితుల్లో బ్యాక్‌గ్రౌండ్ లిసనింగ్‌కు మద్దతు ఇస్తుంది. ప్రయాణంలో ఉన్నప్పుడు సులభంగా ఉపయోగించుకునేలా సరళీకృత ప్లేబ్యాక్ కంట్రోల్స్‌ను అందిస్తుంది. అలాగే స్కిప్ ఫార్వర్డ్, స్కిప్ బ్యాక్ వంటి త్వరిత చర్యలను ఉపయోగించుకునే అవకాశం కల్పిస్తుంది. పోడ్‌కాస్ట్‌లు, లాంగ్-ఫార్మ్ కంటెంట్‌లో నిరంతర ప్లేబ్యాక్‌కు అనుకూలంగా దీనిని ఆప్టిమైజ్ చేశారు. అలాగే ఆటో స్పీడ్ ఫీచర్ కంటెంట్ స్పష్టతను కోల్పోకుండా వినికిడి సామర్థ్యాన్ని పెంచడంపై దృష్టి సారిస్తుంది. కంటెంట్ ప్లే అవుతున్న సమయంలో ఇది ఆటోమేటిక్‌గా ప్లేబ్యాక్ స్పీడ్‌ను సర్దుబాటు చేస్తుంది. నెమ్మదిగా మాట్లాడే భాగాలు, ఎక్కువ సమాచారంతో కూడిన సెగ్మెంట్లను గుర్తిస్తుంది. దీంతో వినియోగదారులు తరచూ మాన్యువల్‌గా స్పీడ్ మార్చాల్సిన అవసరం తగ్గుతుంది. కంటెంట్‌ను సులభంగా అర్థం చేసుకునే సామర్థ్యాన్ని కొనసాగిస్తూ వినియోగ వేగాన్ని మెరుగుపరుస్తుంది.

పోడ్‌కాస్ట్‌ల కోసం ఆస్క్ మ్యూజిక్..

ఆస్క్ మ్యూజిక్ ఫీచర్‌ను ఇప్పుడు పోడ్‌కాస్ట్ డిస్కవరీకి కూడా విస్తరించారు. ఇప్పటికే యూట్యూబ్ మ్యూజిక్‌లో వ్యక్తిగతీకరించిన రేడియో స్టేషన్లు, ప్లేలిస్టుల కోసం ఈ ఫీచర్ అందుబాటులో ఉంది. ఇప్పుడు ఇది పోడ్‌కాస్ట్ సిఫార్సులను కూడా అందిస్తుంది. వినియోగదారులు తమ మూడ్, జానర్ లేదా ఇష్టమైన షోల ఆధారంగా పోడ్‌కాస్ట్‌లను సూచించాలని కోరవచ్చు. దీంతో కొత్త పోడ్‌కాస్ట్ కంటెంట్‌ను కనుగొనడం మరింత సులభమవుతుంది. ఆన్-ది-గో మోడ్ ప్రస్తుతం ఆండ్రాయిడ్‌లో విడుదల అవుతోంది. ఐఓఎస్ కు తరువాత అందుబాటులోకి రానుంది. ఆటో స్పీడ్ ఫీచర్ కూడా ప్రస్తుతం ఆండ్రాయిడ్ వినియోగదారులకు అందుబాటులోకి వస్తోంది. ఐఓఎస్ వెర్షన్‌ను తరువాత విడుదల చేయనున్నారు. పోడ్‌కాస్ట్ సిఫార్సులతో కూడిన ఆస్క్ మ్యూజిక్ ఫీచర్ యూట్యూబ్ మ్యూజిక్ ప్రీమియం, యూట్యూబ్ ప్రీమియం సబ్‌స్క్రైబర్లకు ఎంపిక చేసిన కొన్ని దేశాల్లో అందుబాటులో ఉంది.