Yahoo Scout | గూగుల్ జెమిని, చాట్ జీపీటీల‌కు పోటీగా యాహూ కొత్త ఏఐ టూల్‌..!

Yahoo Scout | ఇంటర్నెట్ దిగ్గజ సంస్థ యాహూ (Yahoo) కృత్రిమ మేధ‌స్సు ఆధారిత సెర్చ్ మార్కెట్‌లో అధికారికంగా అడుగుపెట్టింది. యాహూ స్కౌట్ (Yahoo Scout) పేరిట‌ కొత్త ఏఐ ఆధారిత సెర్చ్ ఫీచర్‌ను సంస్థ ప్రకటించింది. ఇప్పటికే గూగుల్, పెర్ ప్లెక్సిటీ, ఓపెన్ ఏఐ (చాట్ జీపీటీ) వంటి సంస్థలు ఆధిపత్యం చెలాయిస్తున్న ఈ రంగంలో యాహూ తన కొత్త ప్లాట్‌ఫామ్‌తో పోటీకి దిగుతోంది. యాహూ స్కౌట్‌ను సంప్రదాయ సెర్చ్ ఇంజిన్‌గా కాకుండా ఆన్సర్ ఇంజిన్ గా రూపొందించారు. సాధారణంగా లింకుల జాబితా చూపించే విధానానికి బదులుగా, యూజర్లు సహజ భాషలో ప్రశ్న అడిగితే నేరుగా సంక్షిప్తమైన సమాధానాలను అందించే విధంగా ఈ వ్యవస్థ పనిచేస్తుంది. ఓపెన్ వెబ్‌లో లభ్యమయ్యే సమాచారం, యాహూ సొంత కంటెంట్ ఎకోసిస్టమ్, అలాగే వినియోగదారుల డేటాను ఆధారంగా చేసుకొని సమాధానాలను రూపొందిస్తుందని సంస్థ వెల్లడించింది.

క్లాడ్ మోడ‌ల్ ఆధారంగా..

యాహూ ప్రకారం ఈ స్కౌట్ టూల్ వెనుక వందల మిలియన్ల యూజర్ ప్రొఫైల్స్‌తో పాటు భారీ స్థాయి నాలెడ్జ్ గ్రాఫ్ పనిచేస్తోంది. దీని ద్వారా వాతావరణ పరిస్థితులను ట్రాక్ చేయడం, క్రీడా ఈవెంట్ల ఫలితాలను తెలుసుకోవడం, స్టాక్ మార్కెట్ కదలికలను గమనించడం, ఉత్పత్తుల పోలికలు చూడడం, వార్తల వాస్తవాలు నిర్ధారించుకోవడం వంటి అనేక అవసరాలకు ఇది సహాయపడుతుంది. ఈ ప్రాజెక్ట్ కోసం యాహూ, ప్రముఖ ఏఐ స్టార్టప్ అయిన ఆంత్రోపిక్ (Anthropic)తో భాగస్వామ్యం కుదుర్చుకుంది. స్కౌట్‌కు ప్రధాన ఫౌండేషన్ మోడల్‌గా ఆంత్రోపిక్ రూపొందించిన క్లాడ్ (Claude) మోడల్‌ను ఉపయోగిస్తున్నారు. అదేవిధంగా సమాధానాలు విశ్వసనీయ వనరుల ఆధారంగా ఉండేలా మైక్రోసాఫ్ట్ బింగ్ గ్రౌండింగ్ ఏపీఐని కూడా వినియోగిస్తున్నారు.

ప్ర‌త్యేక ఫీచ‌ర్లు..

షాపింగ్, ఫైనాన్స్ రంగాల్లో కూడా యాహూ స్కౌట్ ప్రత్యేక ఫీచర్లను అందిస్తోంది. ఉత్పత్తుల విషయంలో నిపుణుల సమీక్షలను సమగ్రంగా సంక్షిప్తంగా చూపించి వినియోగదారులకు సరైన ఎంపిక చేయడంలో సహాయపడుతుంది. యాహూ ఫైనాన్స్‌తో అనుసంధానం ద్వారా కంపెనీ వార్తలు, అనలిస్ట్ రేటింగ్స్, ఆర్థిక గణాంకాలు, త్రైమాసిక ఫలితాలు వంటి తాజా సమాచారాన్ని కూడా తక్షణమే పొందే అవకాశం కల్పిస్తోంది. ప్రస్తుతం యాహూ స్కౌట్ అమెరికాలో మాత్రమే అందుబాటులో ఉంది. Scout.Yahoo.com వెబ్‌సైట్ ద్వారా లేదా యాహూ సెర్చ్ యాప్ (iOS, Android) ద్వారా దీనిని ఉపయోగించుకోవచ్చు. అమెరికాలోనే సుమారు 25 కోట్ల మంది వినియోగదారులను చేరుకునే సామర్థ్యం ఈ ఫీచర్‌కు ఉందని యాహూ తెలిపింది. భవిష్యత్తులో మరిన్ని ఫీచర్లు, వ్యక్తిగత అవసరాలకు అనుగుణమైన సేవల‌ను కూడా ఇందులో అందించ‌నున్న‌ట్లు సంస్థ వెల్లడించింది. ఏఐ ఆధారిత సెర్చ్ మార్కెట్ వేగంగా విస్తరిస్తున్న నేపథ్యంలో, యాహూ తీసుకొచ్చిన స్కౌట్ ఎంతవరకు వినియోగదారుల విశ్వాసాన్ని గెలుచుకుంటుందో, గూగుల్, చాట్‌జీపీటీ వంటి దిగ్గజాలకు ఏ స్థాయిలో పోటీ ఇవ్వగలుగుతుందో చూడాలి.