WhatsApp | వాట్సాప్‌లో భారీ గందరగోళం.. కారణం లేకుండానే వేల ఖాతాల స‌స్పెన్ష‌న్‌..

WhatsApp | ప్రపంచవ్యాప్తంగా ప్రముఖ ఇన్‌స్టంట్ మెసేజింగ్ యాప్ వాట్సాప్ పలువురు వినియోగదారుల ఖాతాలను అకస్మాత్తుగా 24 గంటల పాటు అకౌంట్ ఇన్ రివ్యూ కింద ఉంచి, యాప్‌లోని అన్ని ఫీచర్లను నిలిపివేయడం కలకలం రేపింది. భారత్‌తోపాటు పలు దేశాల్లో ఈ సమస్య తలెత్తగా, ప్రభావిత వినియోగదారులు సోషల్ మీడియా వేదికగా తమ ఆందోళన వ్యక్తం చేశారు. ఈ ఘటనపై స్పందించిన వాట్సాప్ అధికార ప్రతినిధి.. సేవలను దుర్వినియోగం చేసే వారిని గుర్తించి ఇతర వినియోగదారుల భద్రతను కాపాడేందుకు సంస్థ నిరంతరం చర్యలు తీసుకుంటోందని తెలిపారు. అయితే కొన్ని సందర్భాల్లో పొరపాట్లు జరిగే అవకాశం ఉంటుందని, అలాంటి పరిస్థితుల్లో వీలైనంత త్వరగా సమస్యను పరిష్కరించి వినియోగదారులు మళ్లీ చాటింగ్ కొనసాగించేలా చర్యలు తీసుకుంటామని పేర్కొన్నారు.

ముంద‌స్తు హెచ్చ‌రిక‌లు లేకుండానే..

భారత కాలమానం ప్రకారం సోమవారం రాత్రి సుమారు 8 గంటల సమయంలో ఈ అంతరాయం ప్రారంభమైంది. ఎలాంటి ముందస్తు హెచ్చరిక లేకుండానే అనేక మంది వినియోగదారుల ఖాతాలు రివ్యూకు వెళ్లడంతో వారు వాట్సాప్‌ను ఉపయోగించలేకపోయారు. ప్రభావిత ఖాతాల్లో వాట్సాప్ ఓ సందేశాన్ని ప్రదర్శించింది. అకౌంట్ ఇన్ రివ్యూ, రిక్వెస్టెడ్ డేట్‌, 3 ఆగస్టు 2026, మా సేవా నిబంధనలకు అనుగుణంగా మీ అకౌంట్ కార్యకలాపాలు, డివైస్ సమాచారాన్ని పరిశీలిస్తున్నాం. సాధారణంగా 24 గంటల్లో ఫలితాన్ని తెలియజేస్తాం.. అంటూ యూజ‌ర్ల‌కు మెసేజ్ ద‌ర్శ‌న‌మిచ్చింది. దీనికి దిగువన హౌ టు యూజ్ వాట్సాప్ రెస్పాన్సిబ్లీ అనే మార్గదర్శకాలు, అలాగే అబౌట్ స్టోలెన్ ఫోన్ అండ్ అకౌంట్స్ అనే సమాచారాన్ని చూసే అవకాశాన్ని కూడా యాప్ అందించింది.

వినియోగ‌దారుల అసంతృప్తి..

ఈ ఘటనతో పలువురు వినియోగదారులు సోషల్ మీడియాలో తమ అసంతృప్తిని వ్యక్తం చేశారు. ఎలాంటి వివరణ లేకుండానే తమ‌ వాట్సాప్ ఖాతాల‌ను నిలిపివేశారని, అప్పీల్ చేసినప్పటికీ సాధారణంగా 24 గంటల్లో సమీక్ష పూర్తవుతుంద‌నే సందేశం మాత్రమే కనిపిస్తోందని, అత్యవసరంగా సహాయం చేయాలని కోరారు. అలాగే తాము అధికారిక వాట్సాప్ యాప్‌నే ఉపయోగిస్తున్నప్పటికీ ఎలాంటి హెచ్చరిక లేకుండా అకౌంట్ నిలిపివేశారని, తమ‌ ఉద్యోగాల‌కు వాట్సాప్ అత్యంత కీలకమని, ఈ చర్య పూర్తిగా అనవసరమని ప‌లువురు ఆవేదన వ్యక్తం చేశారు. ప్రస్తుతం ఈ సమస్యకు అసలు కారణంపై వాట్సాప్ అధికారికంగా ఎలాంటి వివరాలు వెల్లడించలేదు. అయితే తప్పుగా ప్రభావితమైన ఖాతాలను సమీక్షించి త్వరగా పునరుద్ధరిస్తామని సంస్థ తెలిపింది.