Train Seats Selection | IRCTC రైల్లో మీ సీటు మీరు సెలెక్ట్ చేసుకోలేరు.. ఎందుకంటే..

Train Seats Selection | బస్ ప్రయాణం అయినా ఇబ్బంది పడేవారుంటారు కానీ ట్రెయిన్ జర్నీ అంటే ఎగిరి గంతేయని వారుండరు.. చిన్నప్పుడైతే ట్రెయిన్ లో విండో సీట్ వస్తే బాగుండును అని అనుకుంటాం.. ఇప్పటికీ కూడా విండో సీట్ కావాలనుకునే వారుంటారు. నిద్రప్రియులైతే అప్పర్ బెర్త్ వస్తే హ్యాపీగా పడుకోవచ్చు అనుకుంటారు. కానీ ఈ సీట్ల కేటాయింపు వెనుక సైన్స్ ఉందని తెలుసా. బస్ అంటే మనకు కావాలసిన సీట్ బుక్ చేసుకుంటాం. సినిమా హాల్ లో లేదా విమానాల్లో అయినా మనకు నచ్చిన సీట్ తీసుకుంటాం. కానీ ట్రెయిన్లో అలా కుదరదు. వాళ్లు ఏ సీట్ కేటాయిస్తే అదే తీసుకోవాలసి ఉంటుంది. అయితే అసలు ట్రెయిన్ లో సీట్ ఎలా కేటాయిస్తారు..? దానికోసం వారు ఎలాంటి క్రమపద్దతి అనుసరిస్తారు..? క్రమపద్దతి పాటించకపోతే ఏమ‌వుతుంది..? అన్న‌ వివ‌రాల‌న్నీ చాలా మందికి తెలియ‌వు. ఈ క్ర‌మంలోనే ప‌లువురు నిపుణులు ఈ వివ‌రాల‌ను వెల్ల‌డిస్తున్నారు.

బుకింగ్‌ విధానం ఇలా ఉంటుంది..

ప్రయాణికుల బరువును అన్ని కోచ్‌ల్లో, అన్నివైపులా సమానంగా పంచేలా IRCTC సాఫ్ట్‌వేర్‌ టికెట్‌లను బుక్‌చేస్తుంది. ఒక రైలులో 10 స్లీపర్‌ క్లాస్‌ కోచ్‌లు (ఎస్‌ 1- ఎస్‌10) ఉన్నాయనుకుందాం. ఒక్కో కోచ్‌లో 72 సీట్లతో మొత్తం 720 సీట్లు ఉంటాయి. మొదటగా బుక్‌చేసుకునే వ్యక్తికి మధ్యభాగంలో అంటే ఎస్‌-5 బోగీలో సాఫ్ట్‌వేర్‌ సీటును కేటాయిస్తుంది. కోచ్‌లోనూ మిడిల్‌ సీటు నుంచి టిక్కెట్లను బుక్‌చేస్తుంది. అంటే 72 సీట్లుంటే 36వ సీటును కేటాయిస్తుంది. ఇక చివరగా బుక్‌చేసుకునే వ్యక్తికి ఎస్‌1 లేదా ఎస్‌ 10 బోగీలో సీటును బుక్‌చేస్తుంది.

బెర్త్‌ విషయంలోనూ మొదటగా లోయర్‌ బెర్త్‌, ఆ తర్వాత మిడిల్‌ బెర్త్‌, చివరకు అప్పర్‌బెర్త్‌ను కేటాయిస్తుంది. అలాకాకుండా ఒక క్రమపద్ధతి లేకుండా టికెట్‌లను కేటాయిస్తే.. కొన్ని బోగీలు పూర్తిగా నిండిపోయి, మరికొన్ని ఖాళీగా ఉండే అవకాశముంది. ఇలాంటి సమయాల్లో ములుపుల దగ్గర ట్రైన్‌ పడిపోయే ప్రమాదముంటుంది. కొన్ని బోగీలపై ఎక్కువ అపకేంద్రబలముంటే, మరికొన్నింటిపై తక్కువగా ఉంటుంది. ఫలితంగా రైలు పట్టాలు తప్పే ప్ర‌మాదం ఏర్ప‌డుతుంది. క‌నుక రైలు ప్రమాదం బారిన పడకుండా ఉండేందుకు, రైలులో సీట్ల‌ను క్ర‌మ ప‌ద్ధ‌తిలో కేటాయించేందుకు ఇలా చేస్తారు. అందుక‌నే రైళ్ల‌లో మ‌న‌కు కావ‌ల్సిన సీట్ల‌ను ఎంచుకోలేము. భద్రతా చర్యల్లో భాగంగానే సీట్ల కేటాయింపును ఒక క్రమపద్దతిలో అలా చేస్తారు.