Figure AI | మనుషుల కంటే రోబోలే ఎక్కువ.. ఆ ఏఐ కంపెనీలో సంచలనం! భయపెడుతున్న సీఈవో కామెంట్స్

Figure AI | త్రినేత్ర.న్యూస్ : ఆర్టిఫిషియల్ ఇంటెలిజెన్స్ (AI), రోబోల రాకతో మనుషుల ఉద్యోగాలకు ఎప్పటికైనా ముప్పు వాటిల్లుతుందనే చర్చ చాలా కాలంగా సాగుతోంది. అయితే ఆ భయాలు ఇప్పుడు నిజమవుతున్నాయి. ప్రముఖ రోబోటిక్స్ స్టార్టప్ కంపెనీ 'ఫిగర్ ఏఐ' (Figure AI) లో ఇప్పుడు పనిచేస్తున్న మనుషుల కంటే రోబోల సంఖ్యే ఎక్కువగా ఉంది. ఈ విషయాన్ని స్వయంగా ఆ కంపెనీ సీఈవో బ్రెట్ అడ్‌కాక్ (Brett Adcock) ప్రకటించడం టెక్ వర్గాల్లో తీవ్ర చర్చనీయాంశంగా మారింది.

రోబోల స్పీడ్ మామూలుగా లేదుగా

ఎక్స్ (X) వేదికగా సీఈవో బ్రెట్ అడ్‌కాక్ "హెడ్‌కౌంట్ వర్సెస్ రోబోట్స్" (Headcount vs Robots) పేరుతో ఒక గ్రాఫ్‌ను పంచుకున్నారు. "ఫిగర్ ఏఐ చరిత్రలో తొలిసారిగా మనుషుల కన్నా రోబోల సంఖ్య పెరిగింది" అని ఆయన పేర్కొన్నారు.

ఆ గ్రాఫ్ ప్రకారం.. 2022 నుంచి 2025 మొదటి త్రైమాసికం వరకు రోబోల సంఖ్య దాదాపు శూన్యం. కానీ ఒకసారి రోబోల తయారీ మొదలుపెట్టాక వాటి సంఖ్య అనూహ్యంగా పెరిగింది. 2026 రెండో త్రైమాసికం నాటికి రోబోల సంఖ్య 740కి చేరుకోగా.. మనుషుల సంఖ్య కేవలం 650-660 మధ్యే ఆగిపోయింది. అంటే మనుషుల కంటే అత్యంత వేగంగా రోబోలు కంపెనీలో వర్కర్లుగా జాయిన్ అవుతున్నాయి. భవిష్యత్తులో ఈ స్పీడ్ తగ్గే సూచనలు కూడా కనిపించడం లేదు.

భయపెడుతున్న 'పవర్ ఆన్' ట్వీట్

ఇటీవలే బ్రెట్ అడ్‌కాక్ బాక్సుల్లో ప్యాక్ చేసి ఉన్న డజన్ల కొద్దీ హ్యూమనాయిడ్ రోబోల (Humanoid robots) ఫోటోను షేర్ చేస్తూ "పవర్ ఆన్" అని క్యాప్షన్ ఇచ్చారు. ఇది ఆటోమేషన్ (Automation) యుగానికి నాంది అని నిపుణులు భావిస్తున్నారు.

అమెజాన్, మెటా లాంటి దిగ్గజ కంపెనీలు ఏఐ వైపు మొగ్గుచూపుతూ వేలాది మంది ఉద్యోగులను తొలగిస్తున్న తరుణంలో ఈ పరిణామం చోటుచేసుకోవడం గమనార్హం. layoffs.fyi రిపోర్ట్ ప్రకారం, ఈ ఏడాది ప్రపంచవ్యాప్తంగా టెక్ కంపెనీల్లో సుమారు 1,19,462 మంది ఉద్యోగాలు కోల్పోయారు. మరోవైపు, టెక్ దిగ్గజం ఎలన్ మస్క్ మాత్రం రోబోల రాకతో మానవాళికి అద్భుతమైన భవిష్యత్తు ఉంటుందని పాజిటివ్‌గా అభిప్రాయపడుతున్నారు.

మ్యాన్ వర్సెస్ మెషీన్.. సీఈవో వార్నింగ్

కొన్ని వారాల క్రితం ఫిగర్ ఏఐ (Figure AI) నెట్టింట తెగ వైరల్ అయింది. ప్యాకేజీలను సార్టింగ్ చేసే పనిలో ఒక ఇంటర్న్‌కు, కంపెనీకి చెందిన 'ఫిగర్ 03' (Figure 03) రోబోకు మధ్య 8 గంటల పాటు "మ్యాన్ వర్సెస్ మెషీన్" పోటీ జరిగింది. ఈ పోటీలో ఇంటర్న్ గెలిచినప్పటికీ.. సీఈవో బ్రెట్ అడ్‌కాక్ చేసిన కామెంట్స్ ఆలోచింపజేశాయి. "రోబోపై మనిషి గెలవడం బహుశా ఇదే చివరిసారి అవుతుంది" అని ఆయన హెచ్చరించారు.

ఎలన్ మస్క్‌కు చెందిన టెస్లా 'ఆప్టిమస్' (Optimus) రోబోను కమర్షియల్ చేసే పనిలో ఉండగా, చైనాకు చెందిన యూనిట్రీ (Unitree), అజిబోట్ (Agibot) లాంటి కంపెనీలు కూడా రోబోటిక్స్ రంగంలో దూసుకుపోతున్నాయి. ఈ పరిణామాలన్నీ చూస్తుంటే, రాబోయే రోజుల్లో రోబోలు మన ఆఫీసుల్లో కో-వర్కర్స్‌గా (సహోద్యోగులుగా) మారడం ఖాయంగా కనిపిస్తోంది.