OpenAI | రూ.2 కోట్ల జీతం.. ఓపెన్‌ఏఐలో భారీ ఉద్యోగ అవకాశం..

OpenAI | అమెరికాకు చెందిన ఆర్టిఫిషియల్ ఇంటెలిజెన్స్ సంస్థ ఓపెన్‌ఏఐ ఆర్థిక రంగంలో తన కార్యకలాపాలను మరింత విస్తరిస్తోంది. ఇందులో భాగంగా అమెరికాలోని శాన్‌ ఫ్రాన్సిస్కోలో ఉన్న తన అప్లైడ్ ఏఐ టీమ్‌లో చేరేందుకు ఇన్వెస్ట్‌మెంట్ బ్యాంకింగ్ నిపుణుడిని నియమించేందుకు సంస్థ ముందుకొచ్చింది. ఈ ఉద్యోగానికి సంవత్సరానికి 1.85 లక్షల డాలర్ల నుంచి 2.05 లక్షల డాలర్ల వరకు ప్రాథమిక వేతనం ప్రకటించింది. ఇది భారత కరెన్సీలో రూ.2 కోట్లకు పైగానే ఉంటుంది. దీనితోపాటు ఈక్విటీ ప్రయోజనాలు కూడా అందించనుంది. ఓపెన్ ఏఐ తెలిపిన ప్రకారం, ఈ పోస్టుకు దరఖాస్తు చేసే అభ్యర్థికి కనీసం రెండేళ్ల ఇన్వెస్ట్‌మెంట్ బ్యాంకింగ్ అనుభవం ఉండాలి. అలాగే కంపెనీ, పరిశ్రమలపై పరిశోధన, ఫైనాన్షియల్ విశ్లేషణ, ఫైనాన్షియల్ మోడలింగ్, వాల్యుయేషన్, డ్యూ డిలిజెన్స్, ట్రాన్సాక్షన్ అమలు, క్లయింట్ మెటీరియల్ తయారీ, సమీక్ష వంటి ఇన్వెస్ట్‌మెంట్ బ్యాంకింగ్ కార్యకలాపాలపై లోతైన అవగాహన ఉండాలని సంస్థ పేర్కొంది.

ఏఐ టూల్స్ అభివృద్ధికి..

ఈ ఉద్యోగంలో ఎంపికైన వ్యక్తి ఇన్వెస్ట్‌మెంట్ బ్యాంకింగ్ రంగానికి అనుగుణంగా ఏఐ టూల్స్‌ను అభివృద్ధి చేయడం, వాటిని మరింత మెరుగుపరచడంలో కీలక పాత్ర పోషిస్తారు. అలాగే ఏఐ టూల్స్ బ్యాంకింగ్‌కు సంబంధించిన పనులను క‌చ్చితంగా నిర్వహిస్తున్నాయా లేదా, అవి నాణ్యత ప్రమాణాలను అందుకుంటున్నాయా అనే విషయాలను కూడా పరీక్షించాల్సి ఉంటుంది. ఉత్పత్తి అభివృద్ధి బృందాలతో కలిసి ఇన్వెస్ట్‌మెంట్ బ్యాంకింగ్‌లో ఏఐ ద్వారా అత్యధిక విలువ సృష్టించే అవకాశాలను గుర్తించడం, ఓపెన్‌ఏఐ టూల్స్‌తో కొత్త వర్క్‌ఫ్లోలను రూపొందించడం, ప్రారంభ దశలోని ఏఐ అనుభవాలు నిజమైన వినియోగదారుల అవసరాలను తీర్చగలుగుతున్నాయా అనే అంశాలను అంచనా వేయడం కూడా బాధ్యతల్లో భాగంగా ఉంటుంది.

స్కిల్‌కే ప్రాధాన్య‌త‌..

ఇన్వెస్ట్‌మెంట్ బ్యాంకింగ్‌లో ప్రత్యక్ష ట్రాన్సాక్షన్ అమలు అనుభవం, అధిక నాణ్యత క‌లిగిన విశ్లేషణలు, ఫైనాన్షియల్ మోడల్స్, క్లయింట్ మెటీరియల్స్ తయారీలో నైపుణ్యం కలిగిన వ్యక్తిని సంస్థ కోరుతోంది. హోదా లేదా అనుభవ సంవత్సరాల కంటే పనితీరు, నిర్ణయ సామర్థ్యానికే ఎక్కువ ప్రాధాన్యం ఇస్తామని ఓపెన్‌ఏఐ స్పష్టం చేసింది. జూనియర్ అనలిస్ట్‌ల నుంచి సీనియర్ డైరెక్టర్‌ల వరకు ఇన్వెస్ట్‌మెంట్ బ్యాంకింగ్‌లోని వివిధ బాధ్యతలపై పూర్తి అవగాహన ఉన్న అభ్యర్థిని సంస్థ ఎంపిక చేయాలనుకుంటోంది. దీంతో ఏ పనులను ఏఐ నిర్వహిస్తుందో, ఎక్కడ ఏఐ నిపుణులకు నిర్ణయాల్లో సహాయపడుతుందో, ఇంకా ఏ కీలక బాధ్యతలు తప్పనిసరిగా మానవుల పర్యవేక్షణలోనే కొనసాగాలో గుర్తించే అవకాశం ఉంటుందని సంస్థ భావిస్తోంది.

ఏఐపై భారీగా పెట్టుబ‌డులు..

ప్రస్తుతం ప్రపంచవ్యాప్తంగా ఇన్వెస్ట్‌మెంట్ బ్యాంకులు కొత్త సాంకేతికతలపై, ముఖ్యంగా ఆర్టిఫిషియల్ ఇంటెలిజెన్స్‌పై భారీగా పెట్టుబడులు పెడుతున్నాయి. తమ కార్యకలాపాలను మరింత సమర్థవంతంగా మార్చేందుకు ప్రపంచంలోని ప్రముఖ బ్యాంకులు ఏఐ వినియోగాన్ని వేగంగా పెంచుతున్నాయి. గతంలో వెలువడిన నివేదికల ప్రకారం, జేపీ మోర్గాన్ చేస్ ప్రతి ఏడాది సుమారు 18 బిలియన్ డాలర్లను సాంకేతిక రంగంపై ఖర్చు చేయాలని ప్రణాళిక రూపొందించింది. ఇందులో ఏఐకి అత్యంత ప్రాధాన్యం ఇస్తోంది. అలాగే గోల్డ్‌మన్ సాక్స్ కూడా ఈ ఏడాది టెక్నాలజీ పెట్టుబడుల కోసం సుమారు 6 బిలియన్ డాలర్లను కేటాయించినట్లు సమాచారం.