ChatGPT | చాట్‌జీపీటీలో కొత్త ఫీచర్‌.. ఇక రహస్య చాట్‌లకు లాక్‌..

ChatGPT | ఓపెన్‌ఏఐ సంస్థ చాట్‌జీపీటీలో వినియోగదారుల గోప్యతను పెంచేందుకు కొత్త ఫీచర్‌ను పరిచయం చేసింది. లాక్డ్‌ చాట్స్‌ (లాక్‌ చేసిన చాట్‌లు) పేరుతో అందుబాటులోకి వస్తున్న ఈ ఫీచర్‌ ద్వారా వ్యక్తిగత సంభాషణలకు నాలుగు అంకెల పిన్‌, ఫేస్‌ ఐడీ, టచ్‌ ఐడీ లేదా డివైస్ ధ్రువీకరణతో రక్షణ కల్పించవచ్చు. ఇతరులు తమ పరికరాలను ఉపయోగించినప్పుడు సున్నితమైన సంభాషణలను చూడకుండా నిరోధించేందుకు ఇది ఉపయోగపడుతుంది. ఈ ఫీచర్‌ను ఉచిత, గో, ప్లస్‌, ప్రొ, బిజినెస్‌, ఎంటర్‌ప్రైజ్‌, ఎడ్యూ ప్లాన్‌ల వినియోగదారులకు దశలవారీగా అందుబాటులోకి తెస్తున్నట్లు ఓపెన్‌ఏఐ తెలిపింది. అయితే, చాట్‌జీపీటీ ఫర్‌ హెల్త్‌కేర్‌ సేవలో ఈ సదుపాయం అందుబాటులో లేదు.

లాక్డ్ చాట్స్ విభాగంలో స్టోర్‌..

లాక్‌ చేసిన సంభాషణలు సాధారణ చాట్‌ హిస్టరీ, పిన్‌ చేసిన చాట్‌లు, సాధారణ సెర్చ్‌ ఫలితాల్లో కనిపించవు. వీటిని ప్రత్యేకంగా ఏర్పాటు చేసిన లాక్డ్‌ చాట్స్‌ విభాగంలో భద్రపరుస్తారు. వాటిని తిరిగి తెరవాలంటే నాలుగు అంకెల పిన్‌ లేదా మద్దతు ఉన్న బయోమెట్రిక్‌ ధ్రువీకరణ అవసరం. ఇప్పటికే ఉన్న సంభాషణను దాని ఆప్షన్స్‌ మెనూ ద్వారా లాక్‌ చేయవచ్చు. లేదా నేరుగా లాక్డ్‌ చాట్స్‌ విభాగంలోకి వెళ్లి కొత్త సంభాషణను ప్రారంభించవచ్చు. ఈ విభాగం ప్రాజెక్ట్స్‌ కింద అందుబాటులో ఉంటుంది. తాత్కాలిక చాట్‌ (టెంపరరీ చాట్‌) హిస్టరీలో ఎలాంటి ఆనవాళ్లు లేకుండా ఉండగా, లాక్‌ చేసిన చాట్‌ మాత్రం భద్రంగా సేవ్‌ అవుతుంది. వినియోగదారులు ఎప్పుడైనా తిరిగి దాన్ని తెరిచి చూడవచ్చు. అయితే, లాక్‌ చేసిన చాట్‌ను తెరిచిన తర్వాత దానికి సంబంధించిన యాక్సెస్‌ నిర్దిష్ట సమయం తర్వాత ముగుస్తుంది. వెబ్‌, డెస్క్‌టాప్‌ వెర్షన్లలో పేజీని రిఫ్రెష్‌ చేసినప్పుడు, ట్యాబ్‌ను మూసివేసినప్పుడు లేదా విండో నుంచి దూరమైనప్పుడు చాట్‌ మళ్లీ లాక్‌ అవుతుంది.

ఫైల్స్‌కు ర‌క్ష‌ణ‌..

ఐఓఎస్‌, ఆండ్రాయిడ్‌ పరికరాల్లో లాక్డ్‌ చాట్స్‌ విభాగం నుంచి బయటకు వెళ్లిన తర్వాత లేదా యాప్‌ బ్యాక్‌గ్రౌండ్‌లోకి వెళ్లినప్పుడు ఒక నిమిషం తర్వాత యాక్సెస్‌ ముగుస్తుంది. కావాలనుకుంటే లాక్‌ నౌ ఆప్షన్‌తో వెంటనే లాక్‌ చేయవచ్చు. లాక్‌ చేసిన సంభాషణల్లో అప్‌లోడ్‌ చేసిన లేదా సృష్టించిన ఫైళ్లకు కూడా రక్షణ ఉంటుంది. అవి వినియోగదారుల సాధారణ ఫైల్‌ విభాగంలోనూ, ఇతర చాట్‌లలోనూ కనిపించవు. చాట్‌జీపీటీలో మెమరీ ఫీచర్‌ ఆన్‌లో ఉన్నప్పుడు, లాక్‌ చేసిన చాట్‌లకు ప్రత్యేక మెమరీ ఉంటుంది. సాధారణ మెమరీలోని సమాచారాన్ని ఈ సంభాషణలు ఉపయోగించుకోవచ్చు. అయితే, లాక్‌ చేసిన చాట్‌లో కొత్తగా తెలుసుకున్న సమాచారం సాధారణ చాట్‌లకు చేరదు. కానీ, ఆ చాట్‌ను లాక్‌ చేయడానికి ముందే చాట్‌జీపీటీ గుర్తుంచుకున్న సమాచారాన్ని ఈ చర్య తొలగిస్తుంది.

వీటికి లాకింగ్ వీలుప‌డ‌దు..

కొన్ని రకాల సంభాషణలను లాక్‌ చేయడం సాధ్యం కాదు. వీటిలో టెంపరరీ చాట్‌లు, ఆర్కైవ్‌ చేసిన చాట్‌లు, గ్రూప్‌ చాట్‌లు, షేర్‌ చేసిన లింక్‌ ద్వారా సృష్టించిన చాట్‌లు, షెడ్యూల్డ్‌ టాస్క్‌లు ఉన్న సంభాషణలు, సమావేశాల రికార్డింగ్‌లతో కూడిన చాట్‌లు ఉన్నాయి. లాక్‌ చేసిన చాట్‌ను ఆర్కైవ్‌ చేయడం, పిన్‌ చేయడం, మరో విభాగానికి తరలించడం లేదా షేర్‌ చేయడం సాధ్యం కాదు. ముందుగా దాన్ని అన్‌లాక్‌ చేయాలి. ఇప్పటికే ఒక చాట్‌కు షేర్‌ చేసిన లింక్‌ ఉంటే, దాన్ని లాక్‌ చేయడం వల్ల ఆ లింక్‌ తొలగిపోదు. గతంలో షేర్‌ చేసిన సమాచారానికి ఇతరులు యాక్సెస్‌ చేయకుండా నిరోధించాలనుకునేవారు ఆ లింక్‌ను విడిగా తొలగించాలి. లాక్డ్‌ చాట్స్‌ ఫీచర్‌ పూర్తిస్థాయి భద్రతా మార్పు కాదని ఓపెన్‌ఏఐ స్పష్టం చేసింది. ఇది ఎండ్‌-టు-ఎండ్‌ ఎన్‌క్రిప్షన్‌ను అందించదు. అలాగే, ప్రత్యేకంగా ఎన్‌క్రిప్ట్‌ చేసిన డిజిటల్‌ భద్రపరిచే స్థలాన్ని కూడా సృష్టించదు. చాట్‌జీపీటీ సంభాషణలను ఎంతకాలం నిల్వ ఉంచుతుందనే విధానంలోనూ మార్పు ఉండదు. ఇంప్రూవ్‌ ద మోడల్‌ ఫర్‌ ఎవ్రీవన్‌ సెట్టింగ్‌పైనా ఈ ఫీచర్‌ ప్రభావం చూపదు.

స‌మాచారాన్ని కాపీ చేసే చాన్స్‌..

లాక్‌ చేసిన చాట్‌ను తెరవగలిగిన వ్యక్తి అందులోని సమాచారాన్ని కాపీ చేసుకునే అవకాశం ఉంటుంది. ఈ ఫీచర్‌ సంభాషణలను ఇతరులు చూడకుండా పరిమితం చేసినప్పటికీ, సున్నితమైన వ్యక్తిగత సమాచారాన్ని ఎలా నిల్వ చేస్తున్నారు, ఎలా నిర్వహిస్తున్నారు అనే విస్తృతమైన ఆందోళనలకు పరిష్కారం చూపదు. వ్యక్తిగత విషయాలపై చాట్‌జీపీటీ వినియోగం పెరుగుతున్న నేపథ్యంలో ఈ అంశం ప్రాధాన్యం సంతరించుకుంది. లాక్‌ చేసిన చాట్‌లకు సంబంధించిన పిన్‌ను మర్చిపోయి రీసెట్‌ చేస్తే కీలకమైన పరిణామం ఎదురవుతుంది. పాత పిన్‌తో రక్షించిన అన్ని లాక్డ్‌ చాట్‌లు, వాటిలో మాత్రమే గుర్తుంచుకున్న మెమరీ సమాచారం, రక్షిత ఫైళ్లు శాశ్వతంగా తొలగిపోతాయి. ఈ తొలగింపును తిరిగి వెనక్కి తీసుకోవడం సాధ్యం కాదని ఓపెన్‌ఏఐ తెలిపింది. సంస్థ సపోర్ట్‌ టీమ్‌ కూడా ఆ సమాచారాన్ని తిరిగి పొందలేదని స్పష్టం చేసింది. అయితే పాత పిన్‌ తెలిసి ఉన్నప్పుడు దాన్ని మార్చుకోవడం వేరు. పిన్‌ మార్చితే చాట్‌లు తొలగిపోవు. కానీ, పిన్‌ మార్చే ప్రక్రియలో ప్రస్తుత పిన్‌ను నమోదు చేయాల్సి ఉంటుంది. అందువల్ల, ఈ ఫీచర్‌ను ఉపయోగించే వినియోగదారులు తమ పిన్‌ను జాగ్రత్తగా భద్రపరచుకోవడం ముఖ్యం.