GPT-6 Sol | ఏఐ యూజ‌ర్ల‌కు గుడ్ న్యూస్‌.. చాట్ జీపీటీ ధ‌ర‌లు త‌గ్గింపు..

GPT-6 Sol | ఓపెన్‌ఏఐ తన జీపీటీ-6 మోడల్‌ కుటుంబాన్ని మరింత విస్తరిస్తూ జీపీటీ-6 సోల్, జీపీటీ-6 లూనా అనే రెండు కొత్త మోడళ్లను ప్రవేశపెట్టింది. ఈ నెల ప్రారంభంలో జీపీటీ-6 ఆస్ట్రాను పరిచయం చేసిన సంస్థ, ఆ మోడల్‌లో ఉపయోగించిన శిక్షణ విధానాలను అనుసరించి తక్కువ ఖర్చుతో పనిచేసే మోడళ్లకు కూడా ఆ సామర్థ్యాలను అందించేందుకు సోల్, లూనాలను రూపొందించినట్లు తెలిపింది. క్యాషింగ్, ఇన్‌ఫరెన్స్‌ ప్రక్రియల్లో చేసిన మెరుగుదలల కారణంగా ఈ రెండు మోడళ్లను అందించే ఖర్చు కూడా తగ్గినట్లు ఓపెన్‌ఏఐ పేర్కొంది. జీపీటీ-6 సోల్, జీపీటీ-6 లూనా ఏపీఐ ధరలను జీపీటీ-5.6 సిరీస్‌ ప్రమోషనల్‌ ధరలతో పోలిస్తే 50 శాతం తగ్గించినట్లు సంస్థ వెల్లడించింది. జీపీటీ-5.6 సోల్‌కు ఇన్‌పుట్‌ టోకెన్ల ధర 10 లక్షలకు 4 డాలర్లు ఉండగా, జీపీటీ-6 సోల్‌కు అది 2 డాలర్లకు తగ్గింది. అవుట్‌పుట్‌ టోకెన్ల ధర 20 డాలర్ల నుంచి 10 డాలర్లకు వచ్చింది. ఇక జీపీటీ-5.6 లూనా ఇన్‌పుట్‌ ధర 20 సెంట్ల నుంచి 10 సెంట్లకు, అవుట్‌పుట్‌ ధర 1.20 డాలర్ల నుంచి 50 సెంట్లకు తగ్గింది. జీపీటీ-6 కుటుంబంలో అత్యధిక సామర్థ్యం కలిగిన మోడల్‌గా జీపీటీ-6 ఆస్ట్రాను ఓపెన్‌ఏఐ కొనసాగిస్తోంది.

ప్రొఫెష‌న‌ల్ ప‌నుల కోసం జీపీటీ-6..

ప్రొఫెషనల్‌ పనుల కోసం జీపీటీ-6 సోల్‌ను ప్రత్యేకంగా రూపొందించినట్లు సంస్థ తెలిపింది. అధిక వినియోగ పరిమితులతోపాటు అదనపు పునరావృత పనులకు తక్కువ ఖర్చు అవుతుందని పేర్కొంది. వివిధ అప్లికేషన్లలో వ్యాపార కార్యకలాపాలను పరీక్షించే ఆటోమేషన్ బెంచ్‌ పరీక్షలో అత్యధిక ప్రయత్న స్థాయిలో జీపీటీ-6 సోల్‌ 33.2 శాతం స్కోర్‌ సాధించింది. ఒక్కో పనికి సుమారు 0.27 డాలర్ల ఖర్చు వచ్చింది. తక్కువ స్థాయి ప్రయత్నంతో జీపీటీ-6 ఆస్ట్రా 30.3 శాతం స్కోర్‌ సాధించగా, క్లాడ్‌ ఓపస్‌ 5 గరిష్ఠ ప్రయత్న స్థాయిలో 26.9 శాతం, క్లాడ్‌ ఫేబుల్‌ 5.1 ఓపస్‌ 5 ఫాల్‌బ్యాక్‌తో 31.4 శాతం స్కోర్‌ సాధించాయి. వీటితో పోలిస్తే సోల్‌ పనికి అయ్యే ఖర్చు గణనీయంగా తక్కువగా ఉందని ఓపెన్‌ఏఐ తెలిపింది. ఏజెంట్స్‌ లాస్ట్‌ ఎగ్జామ్‌ అనే క్లిష్టమైన ప్రొఫెషనల్‌ వర్క్‌ఫ్లో పరీక్షలో జీపీటీ-6 సోల్‌ గరిష్ఠ ప్రయత్న స్థాయిలో 56.4 శాతం స్కోర్‌ సాధించింది. క్లాడ్‌ ఓపస్‌ 5 సాధించిన అత్యధిక స్కోర్‌ కంటే ఇది ఎక్కువగా ఉందని, అదే సమయంలో ఒక్కో పనికి 60 శాతం తక్కువ ఖర్చవుతుందని ఓపెన్‌ఏఐ పేర్కొంది.

ఎప్ప‌టి నుంచి అందుబాటులోకి..

జీపీటీ-6 సోల్‌, జీపీటీ-6 లూనా విడుదలను నేటి నుంచే ప్రారంభించినట్లు ఓపెన్‌ఏఐ తెలిపింది. ఇవి దశలవారీగా వివిధ సేవల్లో అందుబాటులోకి వస్తున్నాయి. చాట్‌జీపీటీ వర్క్‌, కోడెక్స్‌లో ప్లస్‌, ప్రొ, బిజినెస్‌, ఎంటర్‌ప్రైజ్‌, ఎడ్యూ వినియోగదారులకు సోల్‌, లూనా అందుబాటులోకి వచ్చాయి. డెస్క్‌టాప్‌ యాప్‌లో ఉచిత, గో వినియోగదారులు జీపీటీ-6 లూనాను ఉపయోగించవచ్చు. సాధారణ చాట్‌లో మాత్రం సోల్‌, లూనా ఇంకా అందుబాటులోకి రాలేదు. ఓపెన్‌ఏఐ ఏపీఐలో ఈ మోడళ్లు జీపీటీ-6-సోల్‌, జీపీటీ-6-లూనా పేర్లతో అందుబాటులో ఉన్నాయి. సేవల స్థిరత్వాన్ని కొనసాగించేందుకు చాట్‌జీపీటీలో వీటి విడుదలను రోజంతా దశలవారీగా కొనసాగిస్తున్నట్లు సంస్థ తెలిపింది.