Ayodhya | రామ మందిర కానుకల చోరీ కేసులో 36,039 పేజీలతో చార్జ్‌షీట్‌

Ayodhya | రామ మందిర కానుకల చోరీ కేసులో పోలీసులు బుధవారం పోలీసులు చార్జ్‌షీట్‌ దాఖలు చేశారు. మొత్తం 36,039 పేజీల పత్రాలను ప్రత్యేక న్యాయమూర్తి (అవినీతి నిరోధక కోర్టు)కి సమర్పించారు. నాలుగు పెట్టెల్లో తీసుకొచ్చిన ఈ పత్రాలను కోర్టు పరిశీలనకు తీసుకుంది. చార్జ్‌షీట్‌లో 133 మంది సాక్షులను పేర్కొన్నారు. 59 పేజీల మరో చార్జ్‌షీట్‌, 101 కేసు దర్యాప్తు పత్రాలను కూడా సమర్పించారు. రామ మందిర ట్రస్ట్‌ మాజీ ప్రధాన కార్యదర్శి చంపత్‌ రాయ్, ట్రస్టీ డాక్టర్‌ అనిల్‌ మిశ్రా, నిర్మాణ బాధ్యతలు చూసిన గోపాల్‌ రావులను నిందితులుగా చేర్చకుండా సాక్షులుగా పేర్కొన్నారు. చార్జ్‌షీట్‌ దాఖలుతో కోర్టు ప్రాంగణంలో ఉద్రిక్తత నెలకొంది. పోలీసుల దర్యాప్తు తీరుపై, కొందరిని నిందితులుగా చేర్చకపోవడంపై పలువురు న్యాయవాదులు అభ్యంతరం వ్యక్తం చేశారు. కోర్టు వెలుపల పోలీసులకు వ్యతిరేకంగా నినాదాలు చేశారు. దీంతో కోర్టు ప్రాంగణంలో భారీ భద్రత ఏర్పాటు చేశారు. రెండు పీఏసీ బలగాల వాహనాలను మోహరించారు.

ట్రస్ట్‌కు చెందిన కృష్ణమోహన్‌ లాకర్‌ నుంచి స్వాధీనం చేసుకున్న రూ.81.19 లక్షల నగదు వివరాలను చార్జ్‌షీట్‌లో పేర్కొనలేదని బార్‌ అసోసియేషన్‌ ఆరోపించింది. నగదు స్వాధీనం చేసుకున్న వ్యక్తులను నిందితులుగా చేర్చలేదని పేర్కొంది. చంపత్‌ రాయ్, డాక్టర్‌ అనిల్‌ మిశ్రా, గోపాల్‌ రావు, కృష్ణమోహన్‌లను విచారణకు పిలవాలని సీనియర్‌ న్యాయవాదులు డిమాండ్‌ చేశారు. ఈ కేసులో బార్‌ అసోసియేషన్‌ దాఖలు చేసిన పిటిషన్‌ను కోర్టు కొట్టివేసింది. దర్యాప్తులో భాగంగా సమర్పించిన అఫిడవిట్లపై ఆధారాలు లేవని పేర్కొంది. తదుపరి రిమాండ్‌ విచారణను అక్టోబర్‌ 7కు నిర్ణయించింది. రామ మందిర కానుకల నగదును లెక్కించే గదిలో డబ్బును దాచిన ఘటన జూన్‌ 4న వెలుగులోకి వచ్చింది. జూన్‌ 13న తొలి ప్రత్యేక దర్యాప్తు బృందాన్ని ఏర్పాటు చేశారు.

ట్రస్ట్‌ సిబ్బంది, బ్యాంకు అధికారులు, నోట్ల లెక్కింపు సంస్థ ప్రతినిధులను విచారించారు. జూన్‌ 23న ప్రత్యేక దర్యాప్తు బృందం ప్రాథమిక నివేదిక సమర్పించింది. జూన్‌ 25న ఎనిమిది మందిపై కేసు నమోదు చేశారు. రామశంకర్‌ యాదవ్‌ టిన్ను, అనుకల్ప్‌ మిశ్రా, లవ్‌కుష్‌ మిశ్రా, మనీష్‌ యాదవ్‌, కరుణేశ్‌ పాండే, రామశంకర్‌ మిశ్రా, అవినాశ్‌ శుక్లా, రిటైర్డ్‌ బ్యాంకు ఉద్యోగి సుభాష్‌ శ్రీవాస్తవ్‌లను నిందితులుగా పేర్కొన్నారు. జూన్‌ 26న వీరందరినీ పోలీసులు అరెస్టు చేశారు. కానుకల చోరీ కేసులో ప్రధాన నిందితులను కాపాడేందుకు చిన్న చేపలను ఇరికించారని ఎంపీ అవధేశ్‌ ప్రసాద్‌ ఆరోపించారు. రాముడి కానుకలను కూడా దోచుకోని వారు ప్రజలను ఎలా వదిలిపెడతారని ప్రశ్నించారు. బీజేపీ ప్రభుత్వం అయోధ్య నుంచే ఏర్పడిందని, ప్రజలకు జరుగుతున్న అన్యాయానికి అయోధ్య ప్రజలే సమాధానం చెబుతారని అన్నారు.