AI Business Agent | ఏఐ బిజినెస్ ఏజెంట్‌ను ప్ర‌వేశపెట్టిన మెటా.. వ్యాపారాల‌కు ఇది గేమ్ చేంజ‌ర్ టూల్‌..

AI Business Agent | మెటా తన కొత్త ఏఐ ఆధారిత సహాయక వ్యవస్థ మెటా బిజినెస్ ఏజెంట్ ని ప్రకటించింది. లండన్‌లో నిర్వ‌హించిన క‌న్వ‌ర్జేష‌న్స్ 2026 కార్యక్రమంలో ఈ ప్రకటనను వెలువరించారు. వాట్సాప్, మెసెంజర్, ఇన్‌స్టాగ్రామ్ త‌దిత‌ర మెటా మెసేజింగ్ ప్లాట్‌ఫామ్‌లలో కస్టమర్లతో వ్యాపారాలు మరింత సమర్థవంతంగా కమ్యూనికేట్ చేయడానికి ఈ ఏఐ అసిస్టెంట్ సహాయపడుతుంది. వ్యాపార సంస్థలు కేవలం కొన్ని నిమిషాల్లోనే ఈ ఏజెంట్‌ను సెటప్ చేసుకోవచ్చు లేదా తమ ప్రస్తుత ఎంటర్‌ప్రైజ్ వ్యవస్థల్లో అనుసంధానం చేసుకోవచ్చు. ఇప్పటికే 10 లక్షలకు పైగా వ్యాపారాలు వాట్సాప్, మెసెంజర్‌లో మెటా బిజినెస్ ఏజెంట్‌ను ఉపయోగిస్తున్నాయి. కస్టమర్ల ప్రశ్నలకు 24 గంటలూ స్పందించడానికి ఈ వ్యవస్థ సహకరిస్తుంది. అలాగే వాట్సాప్, మెసెంజర్, ఇన్‌స్టాగ్రామ్‌లలో వ్యాపారాలు, కస్టమర్ల మధ్య ప్రతిరోజూ 100 కోట్లకు పైగా యాక్టివ్ సంభాషణలు జరుగుతున్నాయని కంపెనీ తెలిపింది.

క‌స్ట‌మ‌ర్ల భాష‌, శైలి, టోన్‌కు అనుగుణంగా స‌మాధానాలు..

ఈ భారీ స్థాయి ఇంటరాక్షన్‌ల ఆధారంగా బిజినెస్ ఏజెంట్ కస్టమర్ల అవసరాలను మెరుగ్గా అర్థం చేసుకుని, మొదటి సంభాషణ నుంచే మరింత వ్యక్తిగతీకరించిన అనుభవాన్ని అందిస్తుంద‌ని మెటా పేర్కొంది. మెటా బిజినెస్ ఏజెంట్ అనేక కస్టమర్-ఫేసింగ్ కార్యకలాపాలను నిర్వహించే సామ‌ర్థ్యాన్ని క‌లిగి ఉంటుంది. వ్యాపారానికి సంబంధించిన ప్రశ్నలకు సమాధానాలు ఇవ్వడం, వ్యాపార క్యాటలాగ్‌లోని ఉత్పత్తులను సిఫార్సు చేయడం, అపాయింట్‌మెంట్‌లను బుక్ చేయడం, కొత్త లీడ్స్‌ను అర్హత నిర్ధారణ చేయడం, విక్రయాలను పూర్తి చేయడం, అవసరమైతే మానవ సిబ్బందికి సంభాషణలను బదిలీ చేయడం త‌దిత‌ర ఫీచ‌ర్ల‌ను ఇందులో అందిస్తున్నారు. కస్టమర్లు ఏ భాషలో మాట్లాడినా వారి స్థానిక భాషలో స్పందించే సామర్థ్యం దీనికి ఉంది. అలాగే వినియోగ‌దారులు కోరుకునే కమ్యూనికేషన్ శైలి, టోన్‌కు అనుగుణంగా సమాధానాలు ఇస్తుంది.

వ్యాపార అవ‌స‌రాల‌కు కూడా..

కేవలం కస్టమర్ సపోర్ట్‌కే కాకుండా, వ్యాపార యజమానులు, వారి బృందాలకు కూడా ఈ ఏఐ అసిస్టెంట్ ఉపయోగపడుతుంది. రాత్రిపూట జరిగిన సంభాషణల సారాంశాన్ని ఉదయం బ్రీఫింగ్ రూపంలో అందిస్తుంది. అలాగే కొనసాగుతున్న కస్టమర్ ఇంటరాక్షన్‌లపై విలువైన ఇన్‌సైట్స్‌ను అందిస్తుంది. భవిష్యత్ అప్‌డేట్‌లలో మార్కెట్ రీసెర్చ్ నిర్వహించడం, ఉత్పత్తులపై విశ్లేషణలు అందించడం, క్యాలెండర్ మేనేజ్‌మెంట్ టూల్స్‌తో అనుసంధానం కావడం, పోటీదారులపై ఇంటెలిజెన్స్ అందించడం వంటి సామర్థ్యాలు కూడా చేర్చనున్నట్లు మెటా వెల్లడించింది. బిజినెస్ ఏజెంట్‌తో పాటు మెటా కొత్తగా మెటా బిజినెస్ ఏజెంట్ ప్లాట్‌ఫామ్ ను కూడా ప్రవేశపెట్టింది. పెద్ద స్థాయిలో బిజినెస్ ఏజెంట్లను రూపొందించేందుకు, అనుకూలీకరించేందుకు, అమలు చేసేందుకు అవసరమైన మౌలిక వసతులను ఈ ప్లాట్‌ఫామ్ అందిస్తుంది. ఈ ప్లాట్‌ఫామ్ ప్రస్తుతం వందలాది సిస్టమ్‌లతో అనుసంధానం అయ్యే సామర్థ్యాన్ని కలిగి ఉంది. అందులో షాపిఫై, జెన్ డెస్క్‌, షాపీ వంటి ప్రముఖ సేవలు ఉన్నాయి. వీటి ద్వారా వ్యాపారాల తరఫున ఏజెంట్‌లు నేరుగా చర్యలు తీసుకునే అవకాశం ఉంటుంది.

సులభంగా సెర్చ్ ఆప్ష‌న్‌..

సంస్థలు తమ అవసరాలకు అనుగుణంగా నియమాలు, భద్రతా పరిమితులు, పనితీరు కొలమానాలను నిర్వచించుకునే ఎంటర్‌ప్రైజ్-గ్రేడ్ కంట్రోల్స్‌ను కూడా ఈ ప్లాట్‌ఫామ్ అందిస్తుంది. కస్టమర్లు ఇప్పటికే ఉపయోగిస్తున్న వాట్సాప్, మెసెంజర్, ఇన్‌స్టాగ్రామ్ వంటి యాప్‌లలోనే ఇది పనిచేస్తుంది. వాట్సాప్ ద్వారా వ్యాపారాలను కనుగొనడాన్ని మరింత సులభతరం చేయడానికి మెటా కొత్త ఫీచర్లను తీసుకొస్తోంది. త్వరలో వాట్సాప్ సెర్చ్ బార్‌లో వ్యాపార పేరును టైప్ చేసి నేరుగా వాటిని కనుగొనవచ్చు. అలాగే ఫోన్ నంబర్లు, కాంటాక్ట్ కార్డుల ద్వారా స్నేహితులు, కుటుంబ సభ్యులతో వ్యాపారాలను షేర్ చేసే అవకాశం కూడా లభించనుంది. దీంతో వినియోగదారులు వాట్సాప్‌లోనే వ్యాపారాలను సులభంగా కనుగొని సంప్రదించ‌వ‌చ్చు. మెటా బిజినెస్ ఏజెంట్‌ను దశలవారీగా ప్రపంచవ్యాప్తంగా విడుదల చేయనుంది. చిన్న, మధ్య, పెద్ద స్థాయి వ్యాపారాలన్నింటికీ ఈ సేవ అందుబాటులోకి రానుంది. అలాగే ఇన్‌స్టాగ్రామ్‌కూ బిజినెస్ ఏజెంట్ మద్దతును విస్త‌రించ‌నుంది.

ఎవ‌రికి అందుబాటులో ఉంది..

ప్రారంభ దశలో ఈ సేవను ఉచితంగా యాక్టివేట్ చేసుకోవచ్చు. రాబోయే నెలల్లో వ్యాపారాల పరిమాణాన్ని బట్టి వివిధ చెల్లింపు సబ్‌స్క్రిప్షన్ ప్లాన్‌లను ప్రవేశపెట్టనున్నట్లు మెటా తెలిపింది. ప్రస్తుతం మార్నింగ్ బ్రీఫింగ్స్, బిజినెస్ ఇన్‌సైట్స్ వంటి ఫీచర్లు ఎంపిక చేసిన వాట్సాప్ బిజినెస్ యాప్, ఇన్‌స్టాగ్రామ్ ప్రో, మెసెంజర్, మెటా బిజినెస్ సూట్ వినియోగదారులకు మాత్రమే అందుబాటులో ఉన్నాయి. మార్కెట్ రీసెర్చ్, ప్రొడక్ట్ ఇన్‌సైట్స్, క్యాలెండర్ ఇంటిగ్రేషన్, కాంపిటేటివ్ ఇంటెలిజెన్స్ వంటి భవిష్యత్ ఫీచర్ల కోసం ఆసక్తి ఉన్న వ్యాపారులు మెటా వెయిట్‌లిస్ట్‌లో నమోదు చేసుకోవచ్చు.