iPhone 18 Pro | ఐఫోన్ 18 ప్రొ కొనాలంటే ఈ దేశమే బెస్ట్.. భారత్‌తో పోలిస్తే భారీ తేడా..

iPhone 18 Pro | యాపిల్ ఐఫోన్ 18 ప్రొ, ఐఫోన్ 18 ప్రొ మ్యాక్స్‌ మోడళ్లు ప్రపంచవ్యాప్తంగా అధికారికంగా విడుదలయ్యాయి. గతంలో మాదిరిగానే ఈ ఐఫోన్ల ధరలు దేశాన్ని బట్టి భారీగా మారుతున్నాయి. భారత్‌తో పోలిస్తే పలు దేశాల్లో ఐఫోన్ 18 ప్రొ, ఐఫోన్ 18 ప్రొ మ్యాక్స్‌ తక్కువ ధరకే లభిస్తున్నాయి. ఈ ఏడాది యాపిల్ తన ఫ్లాగ్‌షిప్ ఐఫోన్ల డిజైన్, పనితీరు విషయంలో స్వల్ప మార్పులు చేసింది. ఐఫోన్ 18 ప్రొ, ఐఫోన్ 18 ప్రొ మ్యాక్స్‌ రెండింటిలోనూ కొత్త ఎ20 ప్రొ చిప్‌ను ఉపయోగించారు. ఇప్పటివరకు తమ అత్యంత సామర్థ్యవంతమైన ఐఫోన్ ప్రాసెసర్ ఇదేనని యాపిల్ చెబుతోంది. గత తరాల కంటే దీర్ఘకాలికంగా కొనసాగించే పనితీరులో ఇది 40 శాతం వరకు మెరుగైన పనితీరును అందిస్తుంది. డిస్‌ప్లే విషయానికి వస్తే ఐఫోన్ 18 ప్రొ లో 6.3 ఇంచుల సూపర్ రెటీనా ఎక్స్‌డీఆర్ స్క్రీన్‌ ఉంది. ప్రొ-మోషన్ టెక్నాలజీతో 120 హెడ్జ్‌ వరకు రిఫ్రెష్ రేట్‌ అందిస్తుంది. ఐఫోన్ 18 ప్రొ మ్యాక్స్‌లో 6.9 ఇంచుల డిస్‌ప్లే ఉంది. ఇందులోనూ అదే స్పెసిఫికేషన్లను అందించారు.

ఏ దేశంలో ఎంత‌..

అయితే ఈసారి కెమెరాలోనే అతిపెద్ద మార్పు కనిపిస్తోంది. ఐఫోన్ 18 ప్రొ, ఐఫోన్ 18 ప్రొ మ్యాక్స్‌ ప్రధాన కెమెరాల్లో వేరియబుల్ అపెర్చర్ టెక్నాలజీని తీసుకొచ్చారు. దీంతో ఫొటోలు, వీడియోలు తీసే సమయంలో వినియోగదారులకు మరింత నియంత్రణ లభిస్తుంది. ఐఫోన్ 18 ప్రొ, ప్రొ మ్యాక్స్‌ కొనాలని చూస్తున్న వారికి అమెరికా అత్యంత చ‌వ‌కైన మార్కెట్‌గా నిలుస్తోంది. ప్రస్తుత అంతర్జాతీయ ధరలను భారత రూపాయల్లోకి మార్చి చూస్తే ఐఫోన్ 18 ప్రొ అమెరికాలో సుమారు రూ.1,23,346కే లభిస్తోంది. భారత్‌లో ఇదే మోడల్ ప్రారంభ ధర రూ.1,64,900గా ఉంది. జపాన్‌లో ఐఫోన్ 18 ప్రొ ధర సుమారు రూ.1,24,090గా ఉంది. సౌదీ అరేబియాలో రూ.1,25,874, యూఏఈలో రూ.1,26,900, సింగపూర్‌లో రూ.1,31,295గా ఉంది. అంటే భారత్‌తో పోలిస్తే ఈ దేశాల్లో కొనుగోలు చేస్తే గణనీయమైన మొత్తాన్ని ఆదా చేయవచ్చు.

ఐఫోన్ 18 ప్రొ మ్యాక్స్ అయితే..

ఐఫోన్ 18 ప్రొ మ్యాక్స్‌ విషయంలోనూ అమెరికానే ముందుంది. అమెరికాలో దీని ధర భారత కరెన్సీలో సుమారు రూ.1,33,634గా ఉంది. సౌదీ అరేబియాలో రూ.1,34,708, యూఏఈలో రూ.1,36,855, సింగపూర్‌లో రూ.1,45,123, కెనడాలో రూ.1,48,044గా ఉంది. భారత్‌లో మాత్రం ఐఫోన్ 18 ప్రొ మ్యాక్స్‌ ప్రారంభ ధర రూ.1,79,900గా ఉంది. ప్రస్తుత ప్రపంచ ధరలను పరిశీలిస్తే ఐఫోన్ 18 ప్రొ కు అమెరికాలోనే అత్యధిక ధర వ్యత్యాసం కనిపిస్తోంది. ఆ తర్వాత జపాన్, సౌదీ అరేబియా, యూఏఈ ఉన్నాయి. పెద్ద డిస్‌ప్లే కలిగిన ఐఫోన్ 18 ప్రొ మ్యాక్స్‌ విషయంలోనూ అమెరికా ముందంజలో ఉంది. ఆ తర్వాత సౌదీ అరేబియా, యూఏఈ, సింగపూర్, కెనడా ఉన్నాయి.

కార‌ణాలేంటి..

భారత్, ఇతర దేశాల మధ్య ఐఫోన్ ధరల్లో కనిపించే వ్యత్యాసానికి ప్రధాన కారణం ఆయా దేశాల్లో అమలయ్యే పన్నులు, దిగుమతి సుంకాలు, ఎలక్ట్రానిక్స్‌పై ఉన్న ఇతర ఛార్జీలు, కరెన్సీ మార్పిడి రేట్లు. అమెరికా, జపాన్ వంటి దేశాల్లో స్మార్ట్‌ఫోన్లపై పన్నుల భారం తక్కువగా ఉండడం వల్ల వినియోగదారులకు తక్కువ రిటైల్ ధరకు ఫోన్లు అందుబాటులో ఉన్నాయి. ఇక డిజైన్ విషయంలోనూ యాపిల్ మార్పు చేసింది. రెండు ప్రొ మోడళ్లలో సింగిల్‌టోన్ కలర్ స్కీమ్‌కు తిరిగి వెళ్లింది. గతంలోని ట్రూటోన్ డిజైన్‌కు బదులుగా ఒకే రంగు థీమ్‌ను ఉపయోగించారు. వెనుక భాగంలో ఫుల్-విడ్త్ కెమెరా ప్లాటోను కొనసాగించారు. పనితీరును ఎక్కువసేపు కొనసాగించేందుకు కొత్త తరం వేపర్ ఛాంబర్ కూలింగ్ వ్యవస్థను కూడా అందించారు. యాపిల్ ఫ్లాగ్‌షిప్ లైనప్‌లో ఇదే అతిపెద్ద వేపర్ ఛాంబర్ కూలింగ్ సిస్టమ్ అని కంపెనీ పేర్కొంది. గేమింగ్, భారీ మల్టీటాస్కింగ్ వంటి అధిక పనిభారం ఉన్న సందర్భాల్లో ఫోన్ పనితీరును స్థిరంగా ఉంచేందుకు ఇది ఉపయోగపడుతుంది.

ప‌వ‌ర్‌ఫుల్ కెమెరాలు..

కెమెరాల విషయానికి వస్తే రెండు మోడళ్లలోనూ మూడు వెనుక కెమెరాలతో కూడిన సెటప్ ఉంది. ఇందులో 48 మెగాపిక్స‌ల్ ప్రధాన కెమెరా, 48 మెగాపిక్స‌ల్ అల్ట్రావైడ్ కెమెరా, 48 మెగాపిక్స‌ల్ టెలిఫొటో కెమెరా ఉన్నాయి. తొలిసారిగా ప్రధాన కెమెరాలో వేరియబుల్ అపెర్చర్ సదుపాయాన్ని తీసుకొచ్చారు. రెండు ఫోన్లలోనూ ఐఓఎస్ 27 ముందుగానే ఇన్‌స్టాల్ చేసి వస్తుంది. కొత్త లిక్విడ్ గ్లాస్ ఇంటర్‌ఫేస్‌తోపాటు పలు యాపిల్ ఇంటెలిజెన్స్ ఫీచర్లను అందించారు. భారత్‌లో ఐఫోన్ 18 ప్రొ 256 జీబీ బేస్ వేరియంట్ ధర రూ.1,64,900 నుంచి ప్రారంభమవుతుంది. ఐఫోన్ 18 ప్రొ మ్యాక్స్‌ 256 జీబీ వేరియంట్ ధర రూ.1,79,900 నుంచి మొదలవుతుంది. రెండు మోడళ్లూ బ్లాక్, సిల్వర్, గ్లేసియర్, బర్గండీ రంగుల్లో అందుబాటులో ఉన్నాయి.