Google AI | విద్యార్థుల‌కు గూగుల్ బంప‌ర్ ఆఫ‌ర్‌.. ఏడాదిపాటు జెమిని ఏఐ ప్లాన్ ఫ్రీ..

Google AI | టెక్ దిగ్గ‌జ సంస్థ గూగుల్ భార‌త్‌లోని విద్యార్థుల‌కు బంప‌ర్ ఆఫ‌ర్‌ను ప్ర‌క‌టించింది. అర్హ‌త క‌లిగిన క‌ళాశాల‌ల‌కు చెందిన విద్యార్థుల‌కు ఏడాది పాటు త‌న జెమిని ఏఐ ప్రొ ప్లాన్‌ను ఉచితంగా అందిస్తున్న‌ట్లు తెలియ‌జేసింది. ఈ మేర‌కు గూగుల్ ఒక ప్ర‌క‌ట‌న విడుద‌ల చేసింది. ఏడాదిపాటు అర్హ‌త ఉన్న క‌ళాశాల‌ల విద్యార్థుల‌కు జెమిని ఏఐ ప్రొ ప్లాన్‌ను ఉచితంగా అందిస్తున్నామ‌ని, దీంతోపాటు జెమిని, గూగుల్ సెర్చ్‌లో విద్యార్థుల చ‌దువుల‌కు ఉప‌యోగ‌ప‌డే ప‌లు నూత‌న టూల్స్‌ను సైతం అందిస్తున్న‌ట్లు తెలిపింది. గురువారం నుంచి విద్యార్థులు 12 నెల‌ల వ‌ర‌కు ఎలాంటి చార్జీలు చెల్లించ‌కుండానే గూగుల్ ఏఐ ప్రొ ప్లాన్‌ను ఉచితంగా వాడుకోవ‌చ్చు.

ప్లాన్‌లో ఏమేం ఉంటాయి..

అమెరికాలో అర్హత ఉన్న విద్యార్థులకు గూగుల్ ఏఐ ప్రొ ప్లాన్‌లో జెమిని వినియోగ పరిమితులు నాలుగు రెట్లు ఎక్కువగా ఉంటాయి. జెమిని స్పార్క్‌కు యాక్సెస్, జీమెయిల్, గూగుల్ డాక్స్ వంటి గూగుల్ యాప్స్‌లో జెమిని వినియోగం, 5 టీబీ స్టోరేజ్, గూగుల్ హెల్త్ ప్రీమియం కూడా లభిస్తాయి. భారత్ సహా గూగుల్ ఏఐ ప్లస్ అందుబాటులో ఉన్న 140కి పైగా మార్కెట్లలో అర్హత ఉన్న విద్యార్థులకు గూగుల్ ఏఐ ప్లస్ ప్లాన్ లభిస్తుంది. ఇందులో జెమిని ఓమ్నికి యాక్సెస్, జెమినిలో రెండు రెట్లు అధిక వినియోగ పరిమితులు, 400 జీబీ స్టోరేజ్ ఉంటాయి. విద్యార్థుల కోసం గూగుల్ ఏఐ ప్రొతో పాటు యూట్యూబ్ ప్రీమియం బండిల్‌ను కూడా గూగుల్ అందిస్తోంది. విద్యార్థులకు ఈ బండిల్‌పై గరిష్ఠంగా 70 శాతం వరకు డిస్కౌంట్ లభిస్తోంది. జెమిని యాప్‌లో కొత్త స్టూడెంట్ హబ్‌ను కూడా గూగుల్ తీసుకొచ్చింది. ఇందులో స్టడీ నోట్‌బుక్స్, ఫ్లాష్‌కార్డ్స్, ప్రాక్టీస్ క్విజ్‌లు ఒకే చోట ఉంటాయి. విద్యార్థులు జెమిని డాట్ గూగుల్ డాట్ కామ్ స్లాష్ స్టూడెంట్స్ ద్వారా వీటిని యాక్సెస్ చేయవచ్చు.

స్ట‌డీ నోట్‌బుక్స్‌..

స్టడీ నోట్‌బుక్స్‌ను గూగుల్ జూన్‌లో ప్రారంభించింది. విద్యార్థులు లెక్చర్ నోట్స్ వంటి క్లాస్ మెటీరియల్‌ను ఇందులో అప్‌లోడ్ చేయవచ్చు. అనంతరం జెమిని చదవాల్సిన అంశాలను విడగొట్టి ఒక గేమ్ ప్లాన్‌ను రూపొందిస్తుంది. డయాగ్నస్టిక్ క్విజ్‌ల ద్వారా విద్యార్థులకు ఏ అంశాల్లో అవగాహన తక్కువగా ఉందో గుర్తించి, చిన్న చిన్న పాఠాలు, క్విజ్‌లను రూపొందిస్తుంది. రియల్‌టైమ్ ప్రోగ్రెస్ డ్యాష్‌బోర్డ్ ద్వారా చదువులో పురోగతిని కూడా తెలుసుకోవచ్చు. రాబోయే వారాల్లో పాఠాల్లో గ్రాఫ్‌లు, చిత్రాలను కూడా గూగుల్ జోడించనుంది. విద్యార్థుల అనుమతితో సిలబస్‌లోని పరీక్షలు, అసైన్‌మెంట్ డెడ్‌లైన్ల వంటి ముఖ్యమైన తేదీలను గూగుల్ క్యాలెండర్‌లోకి జెమిని యాడ్ చేస్తుంది. గూగుల్ ఏఐ ప్లస్ లేదా గూగుల్ ఏఐ ప్రొ యాక్సెస్ ఉన్న విద్యార్థులు ఎక్కువ నోట్‌బుక్స్‌ను, ఎక్కువ సోర్సెస్‌ను ఉపయోగించుకోవచ్చు. ఇంటరాక్టివ్ విజువలైజేషన్స్ ద్వారా విద్యార్థులు అడిగిన ప్రశ్నలకు జెమిని పనిచేసే 3డీ సిమ్యులేషన్లు, టేబుల్స్, గ్రిడ్స్ వంటి విజువల్ ఎలిమెంట్లను రూపొందిస్తుంది. ఉదాహరణకు 3డీ డీఎన్ఏ నిర్మాణాన్ని తిప్పి చూడటం, జూమ్ చేయడం, పెండ్యులమ్‌లో ఎనర్జీ ట్రాన్స్‌ఫర్‌ను చూపించే సిమ్యులేషన్, నగదు వినియోగ రేట్ల కోసం ఇంటరాక్టివ్ టేబుల్ వంటి వాటిని రూపొందించవచ్చు.

ఫ్రీ ఆఫ‌ర్ గ‌డువు ముగిస్తే..?

గూగుల్ ఏఐ ప్రొ ఆఫర్‌ను అమెరికాలో అర్హత ఉన్న విద్యార్థులు డిసెంబర్ 31 వరకు పొందవచ్చు. సైన్‌అప్ సమయంలో చెల్లుబాటు అయ్యే పేమెంట్ మెథడ్ తప్పనిసరి. ఏడాది ఉచిత ఆఫర్ ముగిసిన తర్వాత గూగుల్ ఏఐ ప్రొ నెలకు 19.99 డాలర్లకు ఆటోమేటిక్‌గా రెన్యూ అవుతుంది. అయితే అంతకుముందే క్యాన్సిల్ చేసుకునే అవకాశం ఉంటుంది. గూగుల్ ఏఐ ప్లస్ అందుబాటులో ఉన్న 140కి పైగా మార్కెట్లలో అర్హత ఉన్న విద్యార్థులు డిసెంబర్ 31 వరకు ఈ ఆఫర్‌ను పొందవచ్చు. అయితే అమెరికా, బొలీవియా, అల్బేనియా, కెనడా, మకావ్, హాంకాంగ్, ట్యునీషియా ఈ ఆఫర్‌కు మినహాయింపుగా ఉన్నాయి. సైన్‌అప్ సమయంలో చెల్లుబాటు అయ్యే పేమెంట్ మెథడ్ అవసరం. ఏడాది ఉచిత కాలం ముగిసిన తర్వాత గూగుల్ ఏఐ ప్లస్ నెలకు 4.99 డాలర్లు లేదా ఆయా దేశాల్లోని సమాన స్థానిక కరెన్సీ ధరకు ఆటోమేటిక్‌గా రెన్యూ అవుతుంది. దీనిని కూడా ఎప్పుడైనా క్యాన్సిల్ చేసుకోవచ్చు. స్టూడెంట్ హబ్, స్టడీ నోట్‌బుక్స్, ఇంటరాక్టివ్ విజువలైజేషన్స్, జెమిని లైవ్‌లో డీప్ రీసెర్చ్ వంటి స్టడీ టూల్స్‌ను గురువారం నుంచే అంద‌రు జెమిని యాప్ యూజర్లకు దశలవారీగా అందుబాటులోకి తీసుకొస్తున్నట్లు గూగుల్ తెలిపింది.