Google Chrome | గూగుల్ క్రోమ్ యూజర్లకు హెచ్చరిక.. వెంట‌నే అప్‌డేట్ చేయ‌క‌పోతే హ్యాకింగ్ ముప్పు..

Google Chrome | భారత ప్రభుత్వ సైబర్ భద్రత సంస్థ ఇండియ‌న్ కంప్యూట‌ర్ ఎమ‌ర్జెన్సీ రెస్పాన్స్ టీం (CERT-In) గూగుల్ క్రోమ్ వినియోగదారులకు హై-సివియారిటీ వార్నింగ్ జారీ చేసింది. బ్రౌజర్‌లో గుర్తించిన పలు సెక్యూరిటీ లోపాల వల్ల హ్యాకర్లు యూజర్ల పాస్‌వర్డ్లు, బ్యాంకింగ్ వివరాలు, కుకీస్‌తో పాటు ఇతర వ్యక్తిగత సమాచారాన్ని దొంగిలించే అవకాశం ఉందని హెచ్చరించింది. ఈ లోపాలు గూగుల్ క్రోమ్‌కు చెందిన విండోస్, మ్యాక్‌ఓఎస్, లైనక్స్ వెర్షన్‌లను ప్రభావితం చేస్తున్నాయ‌ని తెలిపింది. ప్రత్యేకంగా రూపొందించిన వెబ్‌సైట్ల ద్వారా సైబర్ నేరగాళ్లు ఈ లోపాలను ఆస‌రా చేసుకుని ప్లాట్‌ఫామ్‌ల‌ను రిమోట్‌గా దుర్వినియోగం చేసే అవ‌కాశం ఉంటుంద‌ని పేర్కొంది. ఒకసారి ఈ బగ్‌లను ఎక్స్‌ప్లాయిట్ చేస్తే హ్యాకర్లు సిస్టమ్‌లకు అనధికార ప్రవేశం పొందడం, ఆర్బిట్రరీ కోడ్ ఎగ్జిక్యూట్ చేయడం, బ్రౌజర్ సెక్యూరిటీ పరిమితులను బైపాస్ చేయడం లేదా బ్రౌజర్‌ను క్రాష్ చేయడం వంటి చర్యలకు పాల్పడే ప్రమాదం ఉంటుందని తెలిపింది.

వెంట‌నే అప్‌డేట్ చేయండి..

ప్రస్తుతం బ్రౌజర్లు సైబర్ దాడులకు ప్రధాన లక్ష్యాలుగా మారాయని CERT-In హెచ్చరించింది. ముఖ్యంగా చాలామంది యూజర్లు బ్రౌజర్‌లలో లాగిన్ క్రెడెన్షియల్స్, పేమెంట్ వివరాలు, వ్యక్తిగత సమాచారాన్ని సేవ్ చేసుకోవడం వల్ల ప్రమాదం మరింత పెరిగిందని పేర్కొంది. ఆన్‌లైన్ బ్యాంకింగ్, డిజిటల్ పేమెంట్స్, ఆఫీస్ పనుల కోసం తరచూ క్రోమ్ ఉపయోగించే వారు పాత వెర్షన్ ను కొనసాగిస్తే అధిక రిస్క్ ఎదుర్కొనే అవకాశం ఉందని తెలిపింది. ఈ నేపథ్యంలో వెంటనే తాజా వెర్షన్‌కు గూగుల్ క్రోమ్‌ను అప్డేట్ చేయాలని సూచించింది. కొత్తగా బయటపడే సెక్యూరిటీ లోపాలను సరిచేసేందుకు గూగుల్ తరచూ సెక్యూరిటీ ప్యాచ్‌ల‌ను విడుదల చేస్తుందని, అప్డేట్‌లను ఆలస్యం చేసే యూజర్లు ముప్పుకు గురయ్యే అవకాశం ఉందని హెచ్చరించింది. క్రోమ్ ను అప్డేట్ చేయాలంటే బ్రౌజర్ ఓపెన్ చేసి కుడి పైభాగంలో ఉన్న మూడు డాట్స్ మెనూపై క్లిక్ చేయాలి. అక్కడ హెల్ప్ ను ఎంచుకుని అబౌట్ గూగుల్ క్రోమ్ సెక్షన్‌లోకి వెళ్లాలి. అక్కడ అందుబాటులో ఉన్న అప్డేట్‌ను బ్రౌజర్ ఆటోమేటిక్‌గా డౌన్‌లోడ్ చేసి ఇన్‌స్టాల్ చేస్తుంది. అప్డేట్ పూర్తయ్యాక బ్రౌజర్‌ను రీస్టార్ట్ చేయాలి.

అనుమానాస్ప‌ద లింక్‌ల‌ను క్లిక్ చేయొద్దు..

ఇక‌ అనుమానాస్పద లింక్‌లపై క్లిక్ చేయకూడదని, తెలియని సోర్స్‌ల నుంచి ఫైల్స్ డౌన్‌లోడ్ చేయకూడదని, నమ్మకంలేని వెబ్‌సైట్లను సందర్శించకుండా ఉండాలని CERT-In సూచించింది. ఆటోమేటిక్ అప్డేట్‌లను ఎనేబుల్ చేస్తే భవిష్యత్తులో విడుదలయ్యే సెక్యూరిటీ ప్యాచ్‌లు కూడా ఆటోమేటిక్‌గా అందుతాయని తెలిపింది. సైబర్ సెక్యూరిటీ నిపుణులు చాలా కాలంగా పాత బ్రౌజర్‌లు ఫిషింగ్ దాడులు, మాల్వేర్ ఇన్ఫెక్షన్‌లు, క్రెడెన్షియల్ దొంగతనం, ఫైనాన్షియల్ ఫ్రాడ్‌లకు ప్రధాన ద్వారంగా మారుతున్నాయని హెచ్చరిస్తున్నారు. బ్రౌజర్లు, ఆపరేటింగ్ సిస్టమ్‌లు, యాప్స్‌ను ఎప్పటికప్పుడు అప్డేట్ చేస్తూ ఉండటం ఆన్‌లైన్ భద్రతకు అత్యంత కీలకమని చెబుతున్నారు.