Flex Fuel Vehicles India | పెట్రోల్ బదులు 100% ఇథనాల్: రోడ్లపైకి ఫ్లెక్స్-ఫ్యూయల్ కార్లు.. కేంద్రం కొత్త రూల్స్ ఇవే!

• పెట్రోల్ బంకుల్లో E100 ఇంధనం
• కేంద్రం కీలక నిర్ణయం

Flex Fuel Vehicles India | త్రినేత్ర న్యూస్ : భారత ఆటోమొబైల్ రంగంలో భారీ మార్పునకు కేంద్ర ప్రభుత్వం శ్రీకారం చుట్టింది. దాదాపు వంద శాతం ఇథనాల్‌తో నడిచే ఫ్లెక్స్-ఫ్యూయల్ (Flex-Fuel) వాహనాల రాకకు మార్గం సుగమం చేస్తూ సెంట్రల్ మోటార్ వెహికల్స్ రూల్స్‌లో కీలక సవరణలు చేపట్టింది. ఈ మేరకు కేంద్ర రోడ్డు రవాణా, రహదారుల మంత్రిత్వ శాఖ (MoRTH) అధికారిక నోటిఫికేషన్ విడుదల చేసింది. ముడి చమురు దిగుమతుల భారాన్ని తగ్గించి, కర్బన ఉద్గారాలను అదుపు చేయడమే లక్ష్యంగా ఈ నిర్ణయం తీసుకుంది.

సాధారణ కార్లలో E100 వాడొచ్చా?

ఈ మార్పుపై వాహనదారుల్లో రకరకాల సందేహాలు వ్యక్తమవుతున్నాయి. అయితే, E20 కంటే ఎక్కువ బ్లెండింగ్ ఉన్న ఇంధనం (E85 లేదా E100) సాధారణ వాహనాలకు ఏమాత్రం సరిపడదని మంత్రిత్వ శాఖ అధికారి ఒకరు స్పష్టం చేశారు. కేవలం ప్రత్యేక సాంకేతికతతో డిజైన్ చేసి, సర్టిఫికేషన్ పొందిన ఫ్లెక్స్-ఫ్యూయల్ వాహనాల్లో మాత్రమే ఈ హై-బ్లెండ్ ఇథనాల్‌ను ఉపయోగించాల్సి ఉంటుంది. సాధారణ పెట్రోల్ కార్లలో ఈ ఇంధనాన్ని వాడితే ఇంజిన్ పాడయ్యే ప్రమాదం ఉంది.

వెహికల్ బరువు పరిమితి పెంపు

ఈ తాజా నిబంధనలతో పాటు వాహనాల వర్గీకరణ, ఎమిషన్ టెస్టింగ్ నిబంధనల్లోనూ ప్రభుత్వం కొన్ని మార్పులు చేసింది. ముఖ్యంగా లైట్ పెట్రోల్, డీజిల్ వాహనాల కేటగిరీ కింద అనుమతించే గరిష్ట బరువు పరిమితిని గతంలో ఉన్న 3,000 కేజీల నుంచి 3,500 కేజీలకు పెంచింది. దీనివల్ల ప్రత్యామ్నాయ ఇంధన వ్యవస్థలను అమర్చేందుకు ఆటోమొబైల్ కంపెనీలకు మరింత సాంకేతిక వెసులుబాటు కలగనుంది.

మార్కెట్‌లోకి ఏయే కార్లు రానున్నాయి?

ఫ్లెక్స్-ఫ్యూయల్ టెక్నాలజీ అంటే కేవలం పెట్రోల్ మాత్రమే కాకుండా 85 శాతం ఇథనాల్ (E85) లేదా దాదాపు 100 శాతం ప్యూర్ ఇథనాల్ (E100)తో నడిచేలా ఇంజిన్లను ప్రత్యేకంగా రూపొందిస్తారు.

ఈ విభాగంలో మారుతి సుజుకి ఇప్పటికే తన పాపులర్ మోడల్ ‘వ్యాగన్-ఆర్’ (Wagon R) ఫ్లెక్స్-ఫ్యూయల్ వెర్షన్‌ను తీసుకొచ్చింది. ఇది E20 నుంచి E100 వరకు ఏ నిష్పత్తిలోనైనా సజావుగా పనిచేస్తుంది. మారుతితో పాటు ప్రముఖ ఆటోమొబైల్ దిగ్గజాలు టయోటా, టాటా మోటార్స్, హ్యుందాయ్ సైతం భారత మార్కెట్ కోసం ప్రత్యేకంగా ఫ్లెక్స్-ఫ్యూయల్ కార్లను అభివృద్ధి చేసే పనిలో నిమగ్నమయ్యాయి. రానున్న రోజుల్లో ఇవి పూర్తిస్థాయిలో మార్కెట్లోకి వస్తే పెట్రోల్ బిల్లుల భారం నుంచి సామాన్యులకు భారీ ఊరట లభించే అవకాశముంది.