Papikondalu Tour | అర్నాబ్ ఎఫెక్ట్.. పాపికొండ‌ల టూర్‌కు బ్రేక్‌..!

Papikondalu Tour | త్రినేత్ర న్యూస్ : అర్నాబ్ తుపాను( Cyclone Arnab ) ఆంధ్ర‌ప్ర‌దేశ్‌ను అత‌లాకుత‌లం చేస్తుంది. తీర ప్రాంత జిల్లాల్లో భారీ వ‌ర్షం కురుస్తోంది. అర్నాబ్ తుపాను తీరం వైపు దూసుకువ‌స్తున్న నేప‌థ్యంలో పాపికొండ‌ల టూర్‌( Papikondalu Tour ) ను తాత్కాలికంగా నిలిపివేస్తున్న‌ట్లు రంప‌చోడ‌వ‌రం స‌బ్ క‌లెక్ట‌ర్ ఉత్త‌ర్వులు జారీ చేశారు. గోదావ‌రి న‌దిలో సాగే ఈ యాత్ర‌ను తాత్కాలికంగా నిలిపివేస్తున్నామ‌ని, ప‌ర్యాట‌క బోట్ల‌ను కూడా ఒడ్డుకు త‌ర‌లిస్తున్న‌ట్లు పేర్కొన్నారు.

రాజ‌మండ్రి, భ‌ద్రాచ‌లంతో పాటు ఇత‌ర ప్రాంతాల నుంచి 16 టూరిజం బోట్ల‌ను నిలిపివేశారు. రాక‌పోక‌ల‌ను పూర్తిగా నిషేధించారు. గతంలో గోదావరికి వచ్చిన భారీ వరదల కారణంగా సుమారు 70 రోజులపాటు నిలిచిపోయిన పాపికొండల యాత్ర, కేవలం రెండు వారాల క్రితమే తిరిగి ప్రారంభమైంది. ఇప్పుడిప్పుడే ప‌ర్యాట‌కులు పాపికొండల టూర్‌కు సిద్ధ‌మ‌వుతున్నారు. సెల‌వు దిన‌మైన నిన్న దాదాపు 199 మంది ప‌ర్యాట‌కులు పాపికొండ‌ల అందాల‌ను వీక్షించి పుల‌కించిపోయారు.