IND Vs NZ | వ‌న్డే సిరీస్ భార‌త్‌దే.. ఐదో వన్డేలో 22 పరుగుల తేడాతో గెలుపు

• 3-1తో సిరీస్‌ కైవసం
• బ్యాటింగ్‌, బౌలింగ్‌లో సమష్టిగా రాణించిన టీమిండియా

IND Vs NZ | న్యూజిలాండ్‌తో వన్డే సిరీస్‌ను టీమిండియా ఘనంగా ముగించింది. ఐదో వన్డేలో 22 పరుగుల తేడాతో విజయం సాధించి సిరీస్‌ను 3-1తో కైవసం చేసుకుంది. బ్యాటింగ్‌లో మిడిలార్డర్‌ రాణించగా.. బౌలర్లు సమష్టిగా చెలరేగడంతో ఆతిథ్య జట్టును కట్టడి చేసింది. టాస్‌ ఓడి తొలుత బ్యాటింగ్‌కు దిగిన భారత్‌కు ఆరంభంలోనే ఎదురుదెబ్బలు తగిలాయి. రోహిత్‌ శర్మ (7), రుతురాజ్‌ గైక్వాడ్‌ (18), విరాట్‌ కోహ్లీ (5), శ్రేయస్‌ అయ్యర్‌ (22) స్వల్ప స్కోర్లకే పెవిలియన్‌ చేరారు. దీంతో భారత్‌ కష్టాల్లో పడింది. ఈ దశలో ఇషాన్‌ కిషన్‌ (46), అక్షర్‌ పటేల్‌ (46) కీలక ఇన్నింగ్స్‌లతో జట్టును ఆదుకున్నారు. న‌మన్‌ ధీర్‌ (22), మహమ్మద్‌ సిరాజ్‌ (14), అర్ష్‌దీప్‌ సింగ్‌ (14) ప‌ర్వాలేద‌నిపించ‌డంతో భారత్‌ 209 పరుగులు చేసింది. కివీస్‌ బౌలర్లలో జాకబ్‌ డఫీ, మిచెల్‌ శాంట్నర్‌ చెరో మూడు వికెట్లు పడగొట్టారు. మాథ్యూ ఫిషర్‌కు రెండు వికెట్లు దక్కాయి.

కట్టుదిట్టమైన బౌలింగ్‌

210 పరుగుల లక్ష్యంతో బరిలోకి దిగిన న్యూజిలాండ్‌ భారత బౌలర్ల ధాటికి 187 పరుగులకే పరిమితమైంది. విల్‌ యంగ్‌ (22), టిమ్‌ సీఫర్ట్‌ (14), నిక్‌ కెల్లీ (24), డీన్‌ ఫాక్స్‌క్రాఫ్ట్‌ (31) పరుగులు చేసినా జట్టును గెలిపించలేకపోయారు. మిచెల్‌ శాంట్నర్‌ 24 పరుగులు చేయగా.. క్రిస్టియన్‌ క్లార్క్‌ 16 పరుగులు చేశారు. మిగతా బ్యాటర్లు విఫలమవడంతో కివీస్‌ ఓటమి తప్పలేదు. చివరికి భారత్‌ 22 పరుగుల తేడాతో విజయం సాధించింది. ఈ గెలుపుతో వన్డే సిరీస్‌ను 3-1తో సొంతం చేసుకున్న టీమిండియా.. ఇదే జోరును తదుపరి టెస్టు సిరీస్‌లోనూ కొనసాగించాలని భావిస్తోంది.