Gitika Talukdar | ప్రతిష్ఠాత్మక ఫీఫా వరల్డ్ కప్‌లో అస్సాం అమ్మాయి.. ఏకైక భారతీయ మహిళా ఫోటో జర్నలిస్ట్‌గా చరిత్ర!

Gitika Talukdar | త్రినేత్ర.న్యూస్ : పురుషుల ఫిఫా వరల్డ్ కప్ 2026 (FIFA World Cup 2026) కవరేజ్ కోసం అధికారికంగా ఎంపికైన ఏకైక భారతీయ మహిళా ఫోటో జర్నలిస్ట్‌గా గీతికా తాలూక్దార్ (Gitika Talukdar) చరిత్ర సృష్టించారు. దాదాపు రెండు దశాబ్దాలుగా స్పోర్ట్స్ ఫోటోగ్రఫీ రంగంలో ఆమె కొనసాగుతున్నారు. పురుషాధిక్య రంగంగా భావించే క్రీడా జర్నలిజంలో తనదైన ముద్ర వేస్తూ ఆమె ఎంతో మందికి స్ఫూర్తిగా నిలుస్తున్నారు.

అస్సాం సీఎం ప్రశంసలు

అరుణాచల్ ప్రదేశ్‌లో జన్మించిన గీతికా.. అస్సాం రాష్ట్రానికి చెందినవారు. ఫీఫా వరల్డ్ కప్ ఈవెంట్‌కు ఎంపికైన ఆమె అరుదైన ఘనతను అస్సాం ముఖ్యమంత్రి హిమంత బిశ్వ శర్మ (Himanta Biswa Sarma) కొనియాడారు. ఆమె నిబద్ధత రాబోయే తరాలకు ఎంతో ప్రేరణనిస్తుందని ఆయన ప్రశంసించారు.

HCM Dr. @himantabiswa congratulates Gitika Talukdar for becoming the only Indian woman photojournalist accredited for FIFA World Cup 2026, lauding her inspiring journey from Russia and Qatar World Cups and her dedication that continues to motivate the next generation. pic.twitter.com/M843Yh7qSF

— Chief Minister Assam (@CMOfficeAssam) June 7, 2026

వరల్డ్ కప్ జర్నీలో హ్యాట్రిక్

పురుషుల ఫిఫా వరల్డ్ కప్‌కు గీతికా ఎంపికవడం ఇది తొలిసారి కాదు. గతంలో 2018 రష్యా వరల్డ్ కప్, 2022 ఖతార్ వరల్డ్ కప్‌లలోనూ ఆమె ఫోటో జర్నలిస్ట్‌గా తన సేవలు అందించారు. తాజా 2026 వరల్డ్ కప్ కవరేజ్‌తో ఆమె హ్యాట్రిక్ (మూడోసారి) సాధించారు. ఈ ప్రతిష్ఠాత్మక టోర్నమెంట్‌ను కవర్ చేసేందుకు వరుసగా మూడోసారి ఫిఫా అక్రిడిటేషన్ (FIFA accreditation) పొందడం పట్ల గీతికా హర్షం వ్యక్తం చేశారు. అఖిల భారత ఫుట్‌బాల్ సమాఖ్య (AIFF), ఆసియా ఫుట్‌బాల్ కాన్ఫెడరేషన్‌లకు ఆమె కృతజ్ఞతలు తెలిపారు. భారత్ ఫిఫా వరల్డ్ కప్‌కు అర్హత సాధించని సమయంలో, ఒక భారతీయురాలిగా ఆమె ఈ ఘనత సాధించడం విశేషం.

ఒలింపిక్స్ నుంచి ఐపీఎల్ దాకా

కేవలం పురుషుల టోర్నమెంట్లకే పరిమితం కాకుండా 2019 (ఫ్రాన్స్), 2023 (ఆస్ట్రేలియా, న్యూజిలాండ్) ఫిఫా మహిళల వరల్డ్ కప్‌లను కూడా ఆమె కవర్ చేశారు. అంతేకాకుండా, టోక్యో (2020), పారిస్ (2024) ఒలింపిక్స్ (Olympics) కవరేజ్ కోసం ఇంటర్నేషనల్ ఒలింపిక్ కమిటీ (IOC) నుంచి నేరుగా గుర్తింపు పొందిన తొలి, ఏకైక భారతీయ మహిళా ఫోటోగ్రాఫర్‌గా కూడా గీతికా రికార్డులకెక్కారు. వీటితో పాటు ఐపీఎల్ (IPL), ఐఎస్ఎల్ (ISL), కామన్వెల్త్ గేమ్స్, ఐసీసీ (ICC) క్రికెట్ వరల్డ్ కప్‌ల వంటి మెగా ఈవెంట్లను కవర్ చేసిన అపార అనుభవం ఆమె సొంతం.

విద్యాభ్యాసం, కెరీర్

కేంద్రీయ విద్యాలయాల్లో తన పాఠశాల విద్యాభ్యాసాన్ని పూర్తి చేసిన గీతికా.. దక్షిణ కొరియా క్రీడా, సాంస్కృతిక మంత్రిత్వ శాఖ నుంచి స్కాలర్‌షిప్ అందుకున్నారు. సియోల్ నేషనల్ యూనివర్సిటీ (Seoul National University)లో గ్లోబల్ స్పోర్ట్స్ మేనేజ్‌మెంట్‌లో డిగ్రీ పూర్తి చేశారు. అక్కడ స్పోర్ట్స్ మీడియాలో జెండర్ ఇనీక్వాలిటీ (లింగ అసమానతలు) అనే అంశంపై ఆమె పరిశోధన చేయడం గమనార్హం.

2008లో ప్రారంభమైన ఆమె ప్రొఫెషనల్ జర్నీ నేడు ప్రపంచస్థాయికి చేరింది. ఇండియా టుడే, పీటీఐ (PTI), ఏఎఫ్‌పీ (AFP) వంటి అగ్రశ్రేణి జాతీయ, అంతర్జాతీయ మీడియా సంస్థల్లో ఆమె ఫోటోలు ప్రచురితమయ్యాయి. క్రీడా జర్నలిజంలోకి అడుగుపెట్టాలనుకునే యువతకు గీతికా తాలూక్దార్ ప్రయాణం ఒక అద్భుతమైన మార్గదర్శి అనడంలో ఎలాంటి సందేహం లేదు.